Dzindzimo 32
32
Makategwa nya muthu a ditshedzwago sighoho
Ndzimo nya gihevbudzo ya Dhavhidhe
1Kategide wule a divaledwago sighoho saye,
wule giwono gyaye gi futidwego.
2 # Wona gambe: Rom 4:7-8. Kategide muthu wule, a si wonwigo nari ni nandru khu Pfhumu Nungungulu;
wule a gu mwalo mahingigedzo nya wukanganyisi.
3Gikhati nyi nga degula, marambo yangu ma di banga,
khu gudilela gwangu nya matshigu yatshavbo.
4Kholu wutshigu ni mihani mandza yago ma di nyi lemela,
tshivba yangu yi di vbela khu guvbisa nya lihani.
5Nyi dawulede gwago giwono gyangu,
kha nya gu sihela guvbanya gwangu;
eni nyi di ganela, kheni: “Nyi ngu
hongola ga Pfhumu Nungungulu,
nyi ya dawulela guvivba gwangu!”
Uwe u di handza guvivba gwangu,
u nyi divalela guvivba nya gighoho gyangu.
6Khu guralo, watshavbo uye a gu gihathwa gyago,
a na lomba gwago gikhati nya sigaradzo,
wa gu manega talo nya ndrambi,
uye gima kha na vbohedwa khuwo.
7Uwe u wuthavelo wangu;
u ngu nyi vbulugisa sigaradzoni,
nyi gire nyipwa basi dzindzimo nya gupale.
8Nyi na gu hevbudza nyi gu nonedza ndzila u na yi landrago;
nyi na gu khedzisela, nyi khala singalagadzi wago.
9U nga giri kha nga kavalu mwendro buru,
a gu sirengo nyambana mapimo,
si kodzwago basi khu gu thedwa matomu ni khalo;
nyambana iso, gima kha si hidzimeli vbafuvbi gwago.
10Va nya guvivbedwe khu myonyo va ngu wona sisaniso nya singi,
aholu lihaladzo la gu furumedza avo va tumbago
Pfhumu Nungungulu.
11Nengelani ga Pfhumu Nungungulu,
kulungelani enu va nya gululama,
embelelani dzindzimo nya gutsake,
enu mwatshavbo nya myonyo nya yadi.
Currently Selected:
Dzindzimo 32: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
