Dzindzimo 31
31
Nombelo vbakari nya sigaradzo
Ga muthangeli nya tsawa nya vaembeleli. Ndzimo ya Dhavhidhe
1 Pfhumu Nungungulu, eni nyi nguta sihala avbo gwago;
nyi nga khali dzitshoni;
nyi vbulugise, khu gululama gwago nyi tshule.
2Neredza dzindzeve dzago eno gwangu,
u nyi vbanyisa khu guvbiredza;
khala giwindri nya wuthavelo wangu,
likhokhola nya gu nyi vbanyise.
3Aholu khuwe libhiyo langu;
khu lina lago nyi endredze u nyi nonedza ndzila.
4Nyi duse dzikhogani va nyi thesedego,
kholu khuwe tshivba yangu.
5 # Wona gambe: Luk 2:46. Mandzani gwago nyi ngu ningela hefemulo wangu;
uwe khuwe u nyi dzegisago, Pfhumu,
Nungungulu nya lisine.
6Eni nyi ngu va nyenya avo va khozelago
vanungungulu nya liphanga;
gasi eni nya gu tumba uwe Pfhumu Nungungulu.
7Nyi na nengela nyi tsaka khu lihaladzo lago,
kholu u wonide tshanisa yangu,
u tide gusaniseka nya hefemulo wangu.
8Khwa nyi ningela mandzani ga valala,
u tiyiside migondro yangu wulangani nya guaname.
9Nyi pwele wusiwana, Pfhumu Nungungulu,
kholu nyi womo gusanisekani;
wuvi wu ngu hodza maho yangu,
hefemulo ni givili gyangu, si ngu wu na.
10Kholu womi wangu wu ngu vbela khu gusaniseka,
myaga yangu khya gu dilela;
tshivba yangu yi ngu vbunguga khu wumbwa
ni marambo yangu ma khuyugede.
11Khu kotani nya vatshanisi vatshavbo nyi gu navo,
nyi khade givalo;
ga vaakelane vangu nyi khade wa gu gunyenyeza,
ga dzipari dzangu nyi khade gighevenga.
Avo va nyi wonago ndzilani,
va gu thava va ndreya hwindzo ni eni.
12Va nyi divade kha nga muthu a fudego;
nyi womo kha nga gyombo gi pandridwego.
13Nya gupwa milembo nya vathu nya vangi;
nyi tala khu hwanga.
Avo va gu tshangana va nyi lemba,
va gu luga mano nya gu nyi songe.
14Aholu, eni nya gu tumba uwe Pfhumu Nungungulu,
nyari, kheni: Uwe khuwe Nungungulu wangu.
15Matshigu yangu momo mandzani gwago;
nyi tshule mandzani ya valala ni vatshanisi vangu.
16Nyi nonedze gungangamela nya khovbe yago;
u nyi vbanyisa khu lihaladzo lago.
17 Pfhumu Nungungulu, nyi nga khali dzitshoni gu gu rana;
va nya guvivbedwa khu myonyo va na khale dzitshoni,
va na degule va relela phalani nya vafi.
18Ma na dumare magana ya vakanganyisi,
ma ganelago guvivba khu muthu nya gululame,
khu matshandza ni linyenyo.
19 Pfhumu Nungungulu, wuhindzi wago wukhongolo ngudzu,
wa gu wu vegela vale va gu ni githawo ga uwe,
u wu ningela ga vale va thavelago avbo gwago,
uwo u wu thumisago mbeli nya vathu.
20Uwe u na va siha sihaloni nya khovbe yago,
hwindzo nya mayunga nya vathu
u gu va siha tshatshani gwago,
hwindzo nya malimi ma fakazago malipha.
21A na rungudzwe Pfhumu Nungungulu
kholu a nyi girede siliwugiso nya lihaladzo, dhoropani nya gubhiywe.
22Eni, vbakari nya gudilele gwangu, nyi di, kheni:
“Nyi dusidwe nyi vegwa hwindzo nya maho yago.”
Aholu uwe u di yingisa lito nya gilombo gyangu,
gikhati nyi nga lila nyi gu rana.
23Golani Pfhumu Nungungulu, enu mwatshavbo sihathwa saye.
Pfhumu Nungungulu a ngu sayisa ava va tumbegidego,
aholu a ngu tsayisa khu tshivba va nya matshandza.
24Tiyani, mu tiyisa myonyo yanu,
enu mwatshavbo mu tumbago Pfhumu Nungungulu.
Currently Selected:
Dzindzimo 31: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
