Dzindzimo 30
30
Gubonga Nungungulu khu guvbulugiswa mhangoni
Ndzimo nya gukategise Nyumba. Ndzimo ya Dhavhidhe
1Eni nyi ngu gu khusedza, Pfhumu Nungungulu,
kholu u nyi vbanyiside,
khwa diga valala vangu va ghiya hwamboni gwangu.
2 Pfhumu Nungungulu wangu, eni nyi lide avbo gwago u nyi halawugisa.
3 Pfhumu Nungungulu, u wogode womi wangu phalani nya vafi;
u nyi wuside gasi nyi si releli thowoni.
4Embelelani dzindzimo ga Pfhumu Nungungulu,
enu mwatshavbo vakhodwa yaye,
rungudzani lina laye nya guage.
5Kholu likhulo laye kha li hweli guvbindra;
makategwa yaye ma gu pindruga gikhati gyatshavbo,
vbasilambotunu, gu manega gililo,
vbadzimindrutunu, gu wuga gutsaka.
6Gasi eni nyi di ganela na nyi tangade, kheni:
“Gima kha nyi na dzudzugwa.”
7 Pfhumu Nungungulu, wuhigo wago wu di nyi ninga tshivba ni wudhumo;
aholu, u sihide khovbe yago, eni nyi tedwa khu rerema.
8Eni nyi di lila ga Uwe Pfhumu Nungungulu,
nyi di lomba ga Nungungulu wangu, kheni:
9Nya gufa eni, ginani u na wuyedwago khigyo?
U na bhindzula ginani nya gu relela thowoni?
Ina kudzudzwane wu na gu dhumisa, wu tivisa lisine lago, gani?
10Yingisa, Pfhumu Nungungulu, nyi pwele wuhindzi;
khala muphasedzeli wangu, Pfhumu Nungungulu!
11U vbindrugedzide gililo gyangu khu gutsaka;
U nyi tshude gilendra, u nyi ambagisa mwendra nya gutsake.
12Khu guralo, monyo wangu wu ngu embelela gwago nyamba garala.
Pfhumu Nungungulu wangu, nyi na gu rungudza kala gupindruga.
Currently Selected:
Dzindzimo 30: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
