Dzindzimo 27
27
Nombelo wa wule a thavago Nungungulu
Ndzimo ya Dhavhidhe
1 Pfhumu Nungungulu khuye wenengedzo
ni guvbanyiswa gwangu;
nyi na thava mani?
Pfhumu Nungungulu muvhikeli nya guvbanye gwangu;
nyi na thava mani?
2Gikhati sighevenga si nyi randrelago,
gasi gu tsagudzela nyama yangu;
Khavo valala vangu va nyi nyenyago,
va tshunganelago va thega.
3Ambari nyi fenengedzwa khu dzinyimbi,
gima kha nyi na thava gilo;
ambari valala vangu va gu nyi randrela,
monyo wangu kha wu na thava gilo,
nyi na simama nyi tumba.
4Gilo gimwegyo basi nyi lombago ga Pfhumu Nungungulu,
nyi gi dogorelago khu monyo wangu watshavbo:
Khu gu khala Nyumbani ga Pfhumu Nungungulu
matshigu yatshavbo nya guvbanye gwangu,
nyi fela gunengela khu gutshamba ga Pfhumu Nungungulu
ni gu alakanya Nyumba yaye.
5Kholu uye a ngu nyi siha Tshatshani gwaye,
litshigu nya sigaradzo;
a gu nyi siha gusihalani nya Tshatsha waye;
a nyi khusedza vbatshani nya giwindri.
6Olu nyi na khusedza hungo wangu
vbatshani ya valala va nyi randredego,
nyi na bela nyumbani gwago nyi ningela
miphaso nya mhamba nya gubonge.
Nyi na embelela nyi womba dzingoma,
nyi rungudza Pfhumu Nungungulu.
7Yingisa Pfhumu Nungungulu lito nya nombelo wangu,
nyi pwele gambe wuhindzi u nyi hakha.
8Monyo wangu wu ngu nyi embela, khuwo:
“Vbweta khovbe yaye.”
Khu guralo, nyi na vbweta khovbe yago Pfhumu Nungungulu.
9U nga nyi siheli khovbe yago,
u nga dzudzugi githumi gyago khu likhulo;
uwe khuwe basi muphasedzeli wangu,
u nga nyi digi, gambe u nga nyi hotshi,
Nungungulu muvbanyisi wangu.
10Kholu, babe ni mayi wangu va gu nyi diga,
Pfhumu Nungungulu a na nyi hakha.
11Nyi hevbudze ndzila yago Pfhumu Nungungulu,
nyi gimbidzise khu ndzila nya gululame
khu kotani nya talo ya valala vangu;
12u nga nyi ningeli ga valala vangu, va gira kheni guhaladza gwawe,
kholu va nyi wugede va nyi singedza malipha,
va tade khu wughevenga.
13Nyi ngu tumba gukheni nyi na wona
wuwadi wa Pfhumu Nungungulu nyi nga gu vbanya mafuni.
14Tumba Pfhumu Nungungulu u tiya,
tiyisa monyo wago, u tumba Pfhumu Nungungulu.
Currently Selected:
Dzindzimo 27: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
