Dzindzimo 25
25
Nombelo nya gulombe gu vhikedwa khu Nungungulu
Ndzimo ya Dhavhidhe
1Ga uwe Pfhumu Nungungulu,
nyi ngu khusedza hefemulo wangu.
2Nungungulu wangu, eni nya gu tumba uwe,
nyi nga khali dzitshoni,
valala vangu va nga nyi pali.
3Avo va tumbago uwe, kha va khali dzitshoni;
va na thedwe dzitshoni avo va gu dangago
khu silo nyamba phasa gilo.
4Nyi nonedze dzindzila dzago Pfhumu Nungungulu,
nyi hevbudze dzindzila dzago.
5Nyi gimbidzise khu lisine lago, nyi hevbudze,
kholu uwe khuwe Nungungulu, muvbanyisi wangu,
nyi ngu tumba uwe gikhati gyatshavbo.
6 Pfhumu Nungungulu, dundruga wuhindzi ni lihaladzo lago,
ga ethu, gukhugela
gupindruga nya gupindruge.
7U nga alakanyi sihoso sangu,
ambari sighoho nyi giridego wudzahani wangu.
Nyi dundruge khu lihaladzo lago,
khu kotani nya wuwadi wago Pfhumu Nungungulu.
8 Pfhumu Nungungulu khwadi, gambe lulamide,
khu guralo, a ngu nonedza ndzila sighohi.
9A ngu gimbidzisa va nya gusolega khu nayo,
a hevbudza va nya gurula ndzila yaye.
10Dzindzila dza Pfhumu Nungungulu
dzatshavbo lihaladzo ni lisine,
ga vatshavbo va vegisago gidzumeledzwano gyaye
ni sileletelo saye.
11 Pfhumu Nungungulu, khu kotani nya lina lago,
tsetselela giwono gyangu; kholu gikhongolo ngudzu.
12Muthu a thavago Pfhumu Nungungulu,
Uye a na mu hevbudza ndzila nya gubele khiyo;
13a na vbanya na tsakide,
sanana saye si na fuma litigo.
14 Pfhumu Nungungulu a gu
tulela guti sihalo waye vale va mu thavago,
a va tivisa gidzumeledzwano gyaye.
15Maho yangu ma gu khedzisela Pfhumu Nungungulu
gikhati gyatshavbo,
kholu uye a ngu dusela milaphwi migondroni gwangu.
16Khedza eno gwangu, nyi pwele wuhindzi,
kholu nyi musaniseki nyambana mubangaladzi.
17Gu engedzelanide gusaniseka nya monyo wangu,
nyi tshatugise sigaradzoni gwangu.
18Wona gugaradzega ni guvbisega gwangu,
u nyi divalela siwono sangu satshavbo.
19Wona valala vangu va engedzelanago gutala,
va gu nyi venga ngudzu khu tshivba.
20Sayisa guvbanya gwangu. U nyi vbanyisa.
Nyi nga khali dzitshoni khu gu thavela avbo gwago.
21Lisine ni gululama si na nyi sayise;
kholu eni nya gu tumba uwe Pfhumu Nungungulu.
22Nungungulu, tshula Israyeli
ga sigaradzo saye satshavbo.
Currently Selected:
Dzindzimo 25: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
