Dzindzimo 21
21
Nombelo nya gubonge gupala
Ga muthangeli nya vaembeleli. Ndzimo ya Dhavhidhe
1Mufumeli a ngu nengela khu tshivba yago; Pfhumu Nungungulu,
a ngu tsaka khu guvbanyisa gwago!
Kholu u mu ningide gupala.
2U mu girede gugola nya monyo waye,
khwa muma esi a nga lombago khu likana laye.
3Kholu uwe wa gu mu thangela khu makategwa nya makhongolo,
u ngu mu ambagisa gihugu nya ndralama hungoni.
4Uye a di gu lomba guvbanya,
uwe u mu ningide matshigu nyamba hegisa
kala gupindruga.
5Gupala gwago gu dandriside wuzundzo waye,
u mu ambagiside wudhumo ni gungangamela.
6Ina, u mu vegide kha nga gikategiso kala gupindruga,
u mu tadza khu gunengela mbeli gwago.
7Mufumeli a ngu tumba Pfhumu Nungungulu,
khu lihaladzo la oyu a khugegidego ngudzu
gima kha na kanakana.
8Mandza yago ma na manela valala vago vatshavbo,
Nyamudye wago a na manela avo va gu nyenyago.
9Uwe u na va gira va dzura kha nga nilo litshigu u na dzi wonegisago,
Pfhumu Nungungulu a na va midza khu likhulo laye,
va na tsagamiswa khu nilo;
10A na fuvisa livelego lawe mafuni,
a fuvisa situgulwana sawe vbakari nya vathu.
11Ambari va nga gu girela matshoho,
va luga makungo, kha va na gira gilo;
12kholu uwe u na va tutumisa
u khwandra wulaho u va hekha girumbu,
u gu va bayisa khu sighalala.
13Khuga khu tshivba yago Pfhumu Nungungulu,
ethu khu dzingoma ni dzindzimo
hi na rungudza tshivba yago.
Currently Selected:
Dzindzimo 21: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
