Dzindzimo 22
22
Gusaniseka ni gupala nya muthu nya gululame
Ga vathangeli nya tsawa nya vaembeleli. “Yisya ya Wuronga.” Ndzimo ya Dhavhidhe
1 # Wona gambe: Dzind 10:1; Mat 27:46; Mark 15:34. Nungungulu wangu, Nungungulu wangu,
khu ginani u nyi digidego?
Ambari nyi wombago dzihuwa,
nombelo wangu kha wu vbohi gwago.
2Nungungulu wangu, nyi ngu lila vbakari nya mihani,
uwe khu nyi hakhi,
wutshigu gima kha nyi mani gurula.
3Ambari khu kharato, Uwe u agide,
u vbanyago
vbakari nya wudhumo wa Israyeli.
4Vababe vathu va di tumba uwe;
va di gu tumba, uwe u di va vbanyisa;
5va di lila gwago, va tshulega,
va di tumba uwe, gima kha va dzi laya.
6Gasi eni, nyi giwungu, kha nyiri muthu;
nya gu hegwa khu vathu, nyi nyenywa khu litigo;
7 # Wona gambe: Mat 27:39; Mark 15:29; Luk 23:35. vatshavbo va nyi wonago va gu nyi hembulula;
va hama likana, va khiniga mihungo, khavo:
8 # Wona gambe: Mat 27:43. “Tumbide Pfhumu Nungungulu, a na vbanyiswe khuye;
a na mu vbanyise a gu bani a mu haladza.”
9Kholu khuwe u nga nyi dusa khu ndrani,
u nyi vega vbamarumbitunu ga mayi wangu.
10Eni nyi ningedwe gwago gukhugela
litshigu nya guvelegwe gwangu;
uwe u Nungungulu wangu gukhugela ndrani ga mayi wangu.
11U nga khali hwindzo, kholu mhango yomo vbafuvbi,
nyi mwalo muthu nya gu nyi phase.
12Nyi randredwe khu valala nya gutale,
kha nga dzimombe nya tshivba dza tigoni ga Bhasani;
13dza gu nyi tulela magana yawe,
kha nga nghala yi ngurangurago, gasi gu nyi vbadzulela.
14Nyi vbaladzidwe vbavbatshi kha nga mati,
marambo yangu yatshavbo ma gu kunugela;
monyo wangu wa gu fanana ni sera
yi nyiviligago ndrani gwangu.
15Khanani gwangu gu bangide kha nga gindzengele nya libumba;
lidimi langu li dandramede sihayani,
uwe wa gu nyi rinya avbo nya kudzudzwane nya lufu.
16Nya gu randredwa khu tsawa nya sighevenga;
kha nga dzimbwa,
wu nyi vbadzulede mawogo ni mawundru.
17Nyi ngu kodza gu saya marambo yangu yatshavbo;
avo va gu nyi khedza khu gu nyi ronogela.
18 # Wona gambe: Mat 27:35; Mark 15:24; Luk 23:34; Joh 19:24. Va kabana khu gyawe guambala gwangu,
va gira nyatumbatumbane khu libhadzi langu.
19Khu guralo, Pfhumu Nungungulu, u nga hambani ni eni;
uwe khuwe tshivba yangu, vbiredza u ta nyi phasa.
20Vbulugisa hefemulo wangu ga litshari,
u nga nyi digi nyi hodzwa khu dzimbwa.
21Nyi vbulugise kanani nya nghala
ni dzikhehoni nya nyari;
ina, nyi ninge phindrulo.
22 # Wona gambe: Hebh 2:12. Nyi na huwelela lina lago ga vandriyangu;
nyi na embelela wudhumo vbakari nya tshangano;
23enu mu thavago Pfhumu Nungungulu, mu rungudzeni;
mu dhumiseni enu mwatshavbo situgulwana sa Jakobe;
mu ningeni githawo enu mwatshavbo livelego la Israyeli.
24Kholu kha nyenya gilo ambari gu venga
gu vbisega nya gisiwana,
ambari gu mu sihela khovbe yaye,
aholu a mu ningide avbo a nga lombago giphaso.
25Nyi na gu dhumisa nyamba garala
vbakari nya tshangano nya khongolo,
vbakari ga vale va gu ningago githawo,
nyi na tiyisa gisambanyo gyangu.
26Sisiwana si na hodza si khura;
avo va vbwetago Pfhumu Nungungulu, va na mu rungudza.
Myonyo yawe yi na vbanye kala gupindruga.
27Vathu va mafuni gwatshavbo va na muti Pfhumu Nungungulu
va vbindrugedza avbo gwaye;
mbeli gwaye mayigo yatshavbo ma na mu khozela.
28Kholu Pfhumu Nungungulu a ngu fuma,
khuye a fumago vathu vatshavbo.
29Vakhongolo vatshavbo va tigoni va na hodza
va noga mbeli gwaye;
ni vatshavbo vale va fudego va na noga mbeli gwaye,
kala ni wule a gumba dzi kodza abune gu vbanyisa womi waye.
30Melego wawe wu na mu thumela;
va na tivisa Pfhumu ga mimela ni mimelana yi nga gutago.
31Va na tivisa gululama gwaye ga lihundzu li na velegwago,
satshavbo esi Pfhumu a giridego.
Currently Selected:
Dzindzimo 22: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
