Dzindzimo 19
19
A na rungudzwe Pfhumu Nungungulu muvangi ni muwumbi
Ga muthangeli nya tsawa nya vaembeleli. Ndzimo ya Dhavhidhe
1Ndzadzini gu ngu tivisa wudhumo wa Nungungulu,
ndrengelenge wu ngu tivisa sigiro nya mandza yaye.
2Litshigu la gu ningedza mahungu ga limbe litshigu,
wutshigu wa gu ma tivisa ga wumbe wutshigu,
3nyambana lidimi, nyambana magana,
kha gu pwali lito vbakari gwawe.
4 # Wona gambe: Rom 10:18. Ambari ulo gudzuma gwawe gu ngu pwala tigoni gwatshavbo,
lito lawe li ngu pwala kala mahegiso nya mafu;
khiyo a vbahedego tshatsha lidambo.
5Ilo la gu duga kha nga mudzegi a dugago khu makhuvini,
kha nga ndrena yi gimbilago ndzilani na yi tsakide.
6Ilo la gu wonega mahegiso ga Khugadambo,
li hegisa liendro laye mahegiso ga Muhwadambo,
gi mwalo gilo gi si furumedzwigo khu lihani laye.
7Nayo wa Pfhumu Nungungulu wu lulamide,
wu ngu hefemudza monyo;
wufakazi wa Pfhumu Nungungulu wu tiyide,
gihevbudzo ga oyu nyambati gilo.
8Sileletelo sa Pfhumu Nungungulu si lulamide,
si ngu tsakisa monyo,
guruma ga Pfhumu Nungungulu gomo safani,
gu ngu wenengedza maho.
9Githawo ga Pfhumu Nungungulu,
gi agide kala gupindruga,
gulamula ga Pfhumu Nungungulu lisine,
gu tade khu gululama.
10Gu ngu tsakisa ngudzu guvbindra ndralama nya gutale,
ni siwindri nya lisima ngudzu;
magana yaye ma ngu lombela ngudzu guvbindra wulombe.
11Ni githumi gyago gi ngu ningwa khayo guti;
oyu a ma landrisago, a na mana tshatshazelo.
12Khu mani a kodzago gu tugula abune sihoso saye?
Nyi handze siwono si sihadego!
13Tshula matshandza githumi gyago,
gasi nyi si fumedwi khayo,
khavbo nyi na khalago muthu nya gululame,
nyi vbuluga nandru nya wukhongolo ngudzu.
14Magana yangu ma na gu tsakise,
ni mahingigedzo ya monyoni gwangu
ma na vbohe mbeli gwago,
Pfhumu Nungungulu, muvhikeli ni muvbanyisi wangu.
Currently Selected:
Dzindzimo 19: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
