Dzindzimo 17
17
Nombelo nya muthu nya wadi
Nombelo wa Dhavhidhe
1Yingisa Pfhumu Nungungulu, gululama nya mahungu yangu,
hakha gulila gwangu;
yingisa nombelo wangu,
kha wu dugi khu kanani nya malipha.
2Gulamudwa gwangu gu nate khiyo gwago,
maho yago ma na wone gululama gwangu.
3Ambari u khedzisa monyoni gwangu,
u nyi linga vbakari nya wutshigu,
u nyi lingedzela khu nilo,
gima khu na nga mana guvivba ga eni;
likana langu gima kha la yeyisa,
4kha nya gira guvivba kha nga vambe vathu.
Eni nyi digide dzindzila nya wughevenga,
nyi landrisa ndzila nya nayo wago.
5Migondro yangu kha ya tshunganela,
nyi di simama gu landrisela khu migondroni gwago.
6Eni nya gu rana uwe, kholu u ngu nyi hakha,
Nungungulu wangu!
Neredza ndzeve yago eno gwangu,
upwa nombelo wangu.
7Nonedza lihaladzo lago,
Uwe u vbanyisago ga valala
oyu a thavelago nyamudye gwago.
8Nyi vegise kha nga ndzololo nya liso lago,
nyi sihe vbavbatshi nya mambapi yago,
9hwindzo ni va nya guwegela va nyi tshanisago
ni valala va nyi randredego.
10Avo va gu bangisa myonyo yawe,
va ganela matshandza khu magana yawe.
11Va gu landrelela migondro yathu, olu va hi randrede.
Va gu hi ronogela, na va fela gu hi thesa vbavbatshi!
12Va gu fanana ni nghala yi gu na ni mahika khu pfimba waye;
ni ginghalana gi varamidego phalani gwaye.
13 Pfhumu Nungungulu, wuga u ema!
Dwana navo! U va thesa vbavbatshi!
Litshari lago li na nyi vbulugise ga muthu nya guvivbe.
14Khu mandza yago, Pfhumu Nungungulu,
nyi vbanyise vbakari nya vathu nya mafu,
avo va hakhide tshatshazelo wawe
va nga gu vbanya mafuni momu.
Aholu, vale va gu tumbago va khurise khu thomba yago,
thomba yi enelago gu khurisa sanana sawe
yi bwelo khavbo yi tshalela situgulwana sawe.
15Gasi eni, khu lisine, nyi na wona khovbe yago;
gikhati nyi wugago nyi na khura
khu gu wona giyemo gyago.
Currently Selected:
Dzindzimo 17: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
