Dzindzimo 147
147
Rungudzo ga Nungungulu nya Tshivba Yatshavbo
1Aleluya!
A na dhumiswe Pfhumu Nungungulu,
gwadi gu dhumisa Nungungulu wathu khu dzindzimo;
gululamide, fanede gu dhumiswa.
2 Pfhumu Nungungulu a ngu wusa Jerusalema,
a gu tshanganisa avo va phalalegidego va Israyeli.
3A ngu tangadzisa myonyo yi khuvekidego,
a hungelela silondra sawe!
4Vegide tengo nya dzinyeledzi,
a dzi rana khu malina yawe.
5Khongolo khu Nungungulu wathu nya Tshivba Yatshavbo;
guti gwaye gu mwalo mivbingano.
6 Pfhumu Nungungulu a ngu khusedza va nya gusolega,
a gu tshisa vbavbatshi va nya myonyo nya guvivbe.
7Embelelani ga Pfhumu Nungungulu ni gu mu bonga;
kulungelani Nungungulu wathu khu gitendre.
8Khuye a fenengedzago ndzadzini khu mapfhi,
a wisago ndzadzi mafuni
ni gu bugisa mwasi sigomoni;
9Khuye a hodzisago sirengo,
ni gu lisedzela sifondro nya mahigonganye gikhati si lilago.
10Kha tsakeli tshivba nya dzikavalu,
mwendro gu tsakiswa khu wundrena nya muthu.
11 Pfhumu Nungungulu a gu tsakiswa khu vale va gu ni githawo gwaye,
ni vale va tumbago wuhindzi waye.
12Uwe Jerusalema rungudza Pfhumu Nungungulu;
uwe Siyoni, dhumisa Nungungulu wago.
13Kholu a ngu tiyisa malimba nya dzinyangwa dzago,
a kategisa sanana sago ndrani nya libhiyo lago.
14A ngu tiyisa gurula mivbinganoni nya litigo lago,
a gu khurisa khu wuguvbi nya wadi nya tirigu.
15Uye a ngu rumela milayo yaye tigoni;
magana yaye ma gu vbiredza gu phalalega ma hakhwa.
16A ngu tshisa girame gi aga kha nga mawoya,
a gu swaya maralala gukhwatshi nguma.
17A ngu tshisa siwindri nya mati kha nga maralala,
mwalo muthu a tiyelago girame gyakone.
18A gu rumela magana yaye, siwindri nya mati sa gu nyiviliga;
a wusa phuvbo yi furugedza khu tshivba, ma goga mati.
19A ngu sawutela mahungu yaye ga Jakobe,
ni sileletelo ni milayo yaye ga na Israyeli.
20Uye kha gira silo nya nga esi ga mambe mayigo;
kha ma tulela guti sileletelo saye.
Aleluya!
A na dhumiswe Pfhumu Nungungulu!
Currently Selected:
Dzindzimo 147: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
