Dzindzimo 109
109
Nombelo wa muthu a singedzwago khu valala
Ga muthangeli nya tsawa nya vaembeleli. Ndzimo ya Dhavhidhe
1Uwe Nungungulu, nyi gu dhumisago,
U nga nyi deguleli!
2Kholu vathu nya guvivbe ni malipha,
va ngu nyi wugela va nyi singedza malipha.
3Avo va nyi randrede khu magana yawe nya livengo,
va nyi dwanisa nyambana nandru.
4Va gu nyi bweledzela lihaladzo langu khu livengo,
aholu eni nyi ngu gira nombelo.
5Va gu nyi bweledzela wuwadi khu guvivba,
va bweledzela lihaladzo langu khu livengo.
6Hatha mulamuli nyambasi wadi
a lamula nala wangu.
Sathane a na khale khu nyamudye gwaye.
7A na thuledzwe a ningwa nandru khu nala waye,
a lamudwa a konega,
ni nombelo waye wu na vbindrugedze wu khala giwono.
8 # Wona gambe: Mith 1:20. A na vbanye matshigwana madugwana,
dzithomba dzaye dzi na hodzwe khu nombo.
9Sanana saye si na khale dzikhulungu,
ni mwangadzi waye a na khale noni.
10Sanana saye si na legalege si lomba zomola,
va na tutumiswe va pengela hwindzo nya marumbi
yawe va vbanyago umo.
11Va na dzege silo sawe satshavbo va livba khiso mangava yawe,
valombo va na phange mihandro nya thumo wawe.
12A nga manegi ni moyo nya gu mu pwele wuhindzi,
ambari wa gu pwela wusiwana sanana saye.
13Livelego laye latshavbo li na vbele hilo bhi,
ni lina laye li na futwe ga situgulwana si nga gutago.
14 Pfhumu Nungungulu a na alakanye guvivba ga nyehe waye,
mayi waye a nga tsetseledwi siwono saye.
15Guvivba nya siwono sawe
gu na wonege mbeli ga Pfhumu Nungungulu,
aholu Nungungulu a na fuvise lihundzu laye mafuni.
16Kholu oyu muthu kha alakanya gu pwela wusiwana,
aholu a di sanisa sisiwana ni va nya gu hamuga.
A landrelela va nya gu vbela tshivba a va songa.
17Uye a di gu gola gu vala vathu vakwawe,
olu givalo nya vathu gi na mu thegele uye;
a di si goli gu kategisa,
olu gima a nga kategiswi.
18A di ambala guvala gukhwatshi ngandzu,
guvala gwaye gu na bele mahembeni gwaye kha nga mati,
gu naganisa marambo yaye khwatshi mafura.
19Guvala gwaye gu na mu fenengedze gukhwatshi guambala,
gu mu hunga gukhwatshi libhandri a hungago gikhati gyatshavbo.
20 Pfhumu Nungungulu a na livbe kharati valala vangu,
ni vatshavbo va ganelago guvivba khu eni.
21Aholu, uwe Pfhumu Nungungulu nyi emele u nyi vbulugisa
khu kotani nya lina lago, nyi vbanyise
khu wuhindzi ni lihaladzo lago.
22Kholu nyi tade khu wusiwana ni sigaradzo,
ni monyo wangu wu ngu vbisega ngudzu ndrani gwangu.
23Nya guya na nyi gu vbela
gukhwatshi mwedzi gupfolani nya lidambo;
phuvbo ya gu nyi pengisa gukhwatshi nyi khaba.
24Khu guhala, dzi rerekide dzikhungumudzi dzangu,
nyi wondride ngudzu khu gumbana guhodza.
25 # Wona gambe: Mat 27:39; Mark 15:29. Va gu nyi wona va gu nyi hega;
va ziviza va kutsunga mihungo.
26Nyi phase, Pfhumu Nungungulu wangu!
Nyi vbanyise khu lihaladzo lago.
27Gasi va dziti, Pfhumu Nungungulu,
gukhavo khuwe u giridego esi khu mandza yago.
28Kha nyi khathali nya gu vadwa khu avo,
nya gikhongolo khu gu kategiswa khu uwe;
valala vangu va na thedwe dzitshoni,
gasi eni githumi gyago nyi na nengele.
29Avo va nyi nyenyago va na tale khu dzitshoni,
dzitshoni dzawe dzi na va fenengedze kha nga guambala.
30Nyi na emba nyamba garala nyi bonga Pfhumu Nungungulu;
nyi na mu rungudza vbakari nya vathu nya vangi,
31kholu uye a ngu emela gisiwana,
a gi vbulugisa ga avo va vbwetago gu gi songa.
Currently Selected:
Dzindzimo 109: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
