Dzindzimo 107
107
LIBHUKU NYA LIVBANDRE
Nungungulu a ngu vbulugisa
1 # Wona gambe: 1 Dzik 16:34; 2 Dzik 5:13; 7:3; Ezek 3:11; Dzind 100:5; 106:1; 118:1; 136:1; Jer 33:11. Rungudzani Pfhumu Nungungulu kholu khwadi,
kholu wuhindzi waye wu ngu simama kala gupindruga.
2Va na ganele vale Pfhumu Nungungulu a va vbanyisidego,
vale a va tshudego mandzani ya valala,
3ni vale a va tombanisidego khu mayigoni
ya Wuronga ni ya Marandzi,
ya Khugadambo ni ya Muhwadambo.
4Va di dzimede va legalega giwulani nya gihala,
nyambana ndzila nya guye dhoropani nya guvbanye umo.
5Va di saniswa khu ndzala ni lidora,
mihefemulo yawe yi di rereka yi vbela tshivba.
6Aholu vbakari nya sigaradzo sawe, va di lila ga Pfhumu Nungungulu,
uye a di va vbanyisa sigaradzoni gwawe.
7A di va nonedza ndzila nya yadi nya gululame,
gasi guya khiyo dhoropani nya guvbanyele umo.
8 Rungudzani Pfhumu Nungungulu khu lihaladzo laye,
khu mithumo nya gusamadzise a girelago vathu!
9Kholu sedzide vathu a va tshima lidora lawe,
a ninga guhodza nya guenele avo va pwago ndzala.
10Va di gu vbanya gidemani ni mwedzini nya gufe,
na va hungeledwe khu sisaniso ni makhetshe,
11khu kotani nya guyeyise ni guwugela Nungungulu,
ni gu nyenya makungo ya oyu a Khusegidego ngudzu,
12Nungungulu a di va rwega sigaradzo nya sikhongolo;
va garala va thega nyamba mana muthu nya gu va phase.
13Aholu vbakari nya sigaradzo sawe va di lila ga Pfhumu Nungungulu,
uye a di va vbanyisa ga sigaradzo sawe.
14A di va dusa gidemani ni mwedzini nya lufu,
a gu kavilela makhetshe yawe.
15 Rungudzani Pfhumu Nungungulu khu lihaladzo laye,
khu mithumo nya gusamadzise a girelago vathu!
16Kholu pandrelede malimba nya sikete,
a fanyeledzela migonyo nya dzisimbi.
17Vambe va di khala sipumbu khu kotani nya sighoho sawe,
vambe va dwala khu kotani nya mithumo yawe nya guvivbe.
18Gu mwalo guhodza va nga bani va gu dzumela,
va diri vbafuvbi nya guhadza gufa.
19Khu guralo, vbakari nya sigaradzo sawe va di lila ga Pfhumu Nungungulu,
uye a di va vbanyisa ga sigaradzo sawe.
20A di rumela magana Yaye aya va vbanyisa,
a va vbulugisa gufa.
21 Rungudzani Pfhumu Nungungulu khu lihaladzo laye,
khu mithumo nya gusamadzise a girelago vathu!
22Mu ningeni miphaso nya dzimhamba nya gubonge,
mu tivisa mithumo yaye khu gutsaka.
23Vale va tsemakanyago linene khu mataro,
va gira wugwewo vbakari nya mati nya makhongolo.
24Avo va wonide sigiro sa Pfhumu Nungungulu,
ni silo nya gusamadzise a girago phwani nya guete.
25Kholu a ngu dzina a wusa phuvbo nya yikhongolo
yi khusedza mavimbi nya tshivba linene.
26Ma khusedzwa vbatshani ndzadzini,
ma wuya ma reledzwa kala guetani nya nondrwa,
ni mihefemulo yawe yi di nyega khu gu thava mhango.
27Va di khala lidzungu, va dhedhereka kha nga muthu nya guleve,
ni wugengeli wawe wu si va phasi gilo.
28Gugaradzegani gwawe va di lila ga Pfhumu Nungungulu
va lomba gu phaswa,
uye a di va vbanyisa dzimhangoni gwawe.
29A di kawuka gingulu, higyo kape;
ma vbwasama mavimbi, gu manega malenga.
30Avo va di tsaka khu gu wona linene gurula,
va vbohiswa gwadi siwoni va gu vbwetago.
31 Rungudzani Pfhumu Nungungulu khu lihaladzo laye,
khu mithumo nya gusamadzise a girelago vathu!
32A na kulungedwe tshanganoni nya vathu,
a na rungudzwe vbakari nya madhota.
33Nungungulu giride mitsongo yi khala giwula;
ni sibuga nya mati si khala gihala.
34Wulime nya wadi a di wu vbindrugedza wu khala munyu,
khu kotani nya wuvivbi wa avo va khalago umo.
35Giride giwula gi khala litsiva nya mati,
ni mafu nya gubange a ma gira sibuga nya mati.
36A di vega umo vale va gu ni ndzala,
va vbaha dzindranga dzawe va gu vbanya umo,
37va limide va yala misimbo nya mikandzu,
va mana mihandro nya gutale.
38Nungungulu a di kategisa vathu vaye,
avo va di velega sanana nya singi,
wu di si vbungugi tengo nya sifuyo sawe.
39Aholu avo va di vbungudwa va khala vadugwana,
khu gu vbwasamiswa, ni sigaradzo ni mabango.
40Nungungulu a di nyenya vatshanisi,
a va dzimedza va legalega giwulani nyambana ndzila.
41A na dusa sisiwana gusanisekani gwawe,
a dandrisa dzingamo dzawe khwatshi mitshambi.
42Vathu nya vadi va gu siwona, va na nengela khiso,
aholu va nya guvivba va na hamuga nigyo nya guganele.
43Oyu a gengedego a ngu thela kota khu silo sesi,
a pimisa gwadi lihaladzo la Pfhumu Nungungulu.
Currently Selected:
Dzindzimo 107: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
