Dzindzimo 106
106
Gumba tumbega ga va na Israyeli
1 # Wona gambe: 1 Dzik 16:34; 2 Dzik 5:13; 7:3; Ezek 3:11; Dzind 100:5; 107:1; 136:1; Jer 33:11. Dhumisani Pfhumu Nungungulu!
Bongani Pfhumu Nungungulu, kholu khwadi,
kholu lihaladzo laye khya gupindruga.
2Khu mani a na tshamuselago mithumo ya tshivba ya Pfhumu Nungungulu?
Khu mani a na pwadzago wuzundzo waye watshavbo?
3Va kategide avo va landrisago milayo yaye,
va girago esi si lulamidego gikhati gyatshavbo.
4Alakanya, Pfhumu Nungungulu khu lihaladzo nya vathu vago,
delu U nyi resela guvbanyisa gwago.
5Nyi gire nyi wona guandra ga vathu vago,
nyi hengela makategwa nya litigo lago,
gutsakani ga vale va lumbago uwe.
6Ethu hi ghohide gu fanana ni vababe vathu;
hi giride esi nya gunyenyeze ni guvivba.
7 # Wona gambe: Eks 14:10-12. Vababe vathu gikhati va nga bani vari tigoni ga Egipito;
kha va thela kota khu siliwugiso sago,
kha va alakanya lihaladzo lago nya likhongolo,
gambe va gu wugede vbafuvbi ni Yiphwa, a gu Yiphwa nya Gufuvile.
8Ambari ulo a di va vbanyisa khu kotani nya gisambanyo gyaye,
afela gu wonegisa tshivba nya wugulu waye.
9A di kawuka Yiphwa nya Gufuvile mavbwa mati,
a va thangela guetani nya nondrwa,
gukhwatshi va gu gimbila giwulani nyambana mati.
10A di va vbanyisa kharati ga valala vawe,
a va tshula mandzani ga vale va va vengago.
11Mati ma di khubhunyeta valala vawe,
va mbemba vatshavbo nyamba tshala ni moyo basi.
12 # Wona gambe: Eks 14:21-31. Khavbo va nga khodwa ga situmbiso sa Nungungulu,
va embelela dzindzimo nya gu mu dhumise.
13Aholu kha va hwela gu divala sigiro saye,
kha va virela gu wona mahegiso nya gisambanyo gyaye.
14Vari giwulani va di sengwa khu gunavela nya guvivbe,
va linga Nungungulu.
15 # Wona gambe: Mit 11:4-34. Nungungulu a di va ninga esi va nga lomba,
aholu a di va tsayisa khu ngumbe nya gusonge.
16Vari mitshatshani va di girela lidiwo Mosi,
ni Aroni, gihathwa nya gukatege gya Pfhumu Nungungulu.
17Mafu ma di tulega ma midza Dhatani,
Abhiramo ni ngamo yaye va di midzwa navo.
18 # Wona gambe: Mit 16:1-35. Wu di tshiga nilo vbakari nya valandreli vawe,
wu gu vbisa vathu vale vatshavbo nya guvivbe.
19Gigomoni gya Horebhi, va di wumba gimombyana nya gugirwe khu ndralama,
va gu khidzimela gifananiso nya gugirwe khu simbi nya gunyiviligiswe.
20Va di diga Nungungulu wawe nya wuzundzo,
va gu khozela gifananiso nya girengo nya guhodze mwasi.
21Avo va di divala Nungungulu, Muvbanyisi wawe,
a nga va girela sisamadziso tigoni ga Egipito.
22Giride siliwugiso nya sikhongolo tigoni ga Kami,
ni silo nya guthise Yiphwani nya Gufuvile.
23 # Wona gambe: Eks 32:1-14. Nungungulu a di khuye a na mbembisa va na Israyeli;
Mosi, githumi gyaye nya gigodwa,
a di ema mbeli ga Nungungulu
a lombelela gasi gu bosisa likhulo laye.
24Gambe va di nyenya litigo nya gumbure ngudzu,
kholu kha va khodwa ga situmbiso a nga girago.
25Va di khala mitshatshani gwawe va phela gu ngurangura,
va bomba gu yingisa lito la Pfhumu Nungungulu.
26 # Wona gambe: Mit 14:1-35. Khu guralo, a di khusa mandza a sambanya, khuye:
A na va gira vafa giwulani;
27 # Wona gambe: Levh 26:33. a na phalalegisa sanana sawe vbakari ga va nya mayigo,
a va ningela vafa mandzani ga valombo.
28Va di khozela gambe nungungulu nya gupwani khu Bhahali-Peyori,
va hodza dzimhamba dza vanungungulu nya gufe.
29Va di gorosa Nungungulu khu mithumo yawe nya guvivbe;
gu di manega tungu vbakari gwawe.
30Aholu Fineya a di khuga a tsayisa avo va nga ghoha,
tungu wu di vbela.
31 # Wona gambe: Mit 25:1-13. Khu kharato uye khade muthu nya gululame,
a na ranwa kharato uye ni situgulwana saye kala gupindruga.
32Va di gorosa gambe Nungungulu matini ya Meribha,
Mosi a di mana libango khu kotani yawe.
33 # Wona gambe: Mit 20:2-13. Kholu va di mu vbisisa monyo waye,
a kala a ganela esi nyamba yela.
34Kha va mbembisa mayigo, kha nga edzi Pfhumu Nungungulu
a nga va rumago khidzo gu ma mbembisa.
35Aholu va di ya dzi pata gumogo ni va nya mayigo,
va gu hevbulela tumbunugo wawe.
36 # Wona gambe: Val 2:1-3; 3:5-6. Va di khozela sifananiso sa va nya mayigo,
va mbembiswa khu kotani nya isoso.
37 # Wona gambe: 2 Dzipf 17:17. Kholu va di songa sanana sawe nya sikhwathana,
niso nya sagadzyana, va phasela khiso madhimoni.
38 # Wona gambe: Mit 35:33. Va vbaladzide milovba nya vathu nyambana nandru,
novba nya sanana sawe nya vama ni vanyamayi,
va phasela vanungungulu Vakhanani,
ni litigo li di nyenyeziswa khu novba wawe.
39Khu isoso avo navo va dzi nyenyeziside wurumba wawe,
khu mithumo yawe yatshavbo nya guvivbe.
40Likhulo la Pfhumu Nungungulu li di khondra ga vathu vaye,
a va tsukula, vathu va gu thomba yaye.
41A di va ningela mandzani ga va nya mayigo;
gasi va fumedwa khu vale va va vengago.
42Valala vawe va di va tshanisa,
va gu va gira dzikhumbi dzawe.
43A va vbanyiside dzinyondro nya dzingi,
aholu, avo va di hambana ni dzindzila dzaye,
va engedzela gu siga maragani nya guvivbe gwawe.
44Aholu, gikhati va nga lila, Nungungulu a di vapwa,
ata va phasa musigaradzoni gwawe.
45A di alakanya gidzumeledzwano a nga gira navo,
a va pwela wusiwana khu wuhindzi waye nya wungi.
46 # Wona gambe: Val 2:14-18. Khu kotani nya isoso a di kuha myonyo ya vale va nga vbagela va na Israyeli,
va phela gu va pwela wusiwana.
47Uwe Pfhumu Nungungulu wathu, hi vbanyise,
hi tshanganise U hi dusa vbakari ga va nya mayigo,
gasi hi kodze gu rungudza lina lago nya gukatege,
hi gu dhumisa na hi tsakide.
48 # Wona gambe: 1 Dzik 16:35-36. A na rungudzwe Pfhumu Nungungulu wa Israyeli,
olu kala gupindruga,
vathu vatshavbo va na ganele, khavo: “Ameni!”
Dhumisani Pfhumu Nungungulu!
Currently Selected:
Dzindzimo 106: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
