Dzindzimo 102
102
Gu dzi laya ni gutumba
Nombelo wa muthu a sanisekago ni gu vbela tshivba, a lilago mbeli ga Pfhumu Nungungulu
1 Pfhumu Nungungulu, yingisa nombelo wangu, gulila gwangu gu na vbohe iyo gwago!
2U nga nyi siheli khovbe yago
nya gu bani nyi romo sigaradzoni;
neredza ndzeve yago u nyi yingisa;
vbiredza gu nyi hakha gikhati nyi gu ranago.
3Kholu matshigu yangu, ma gu mwalalega khwatshi wutshi,
ni marambo yangu ma vbide gukhwatshi magala.
4Monyo wangu wu hekhidwe wu banga kha nga mwasi;
nya gu divala ni gu hodza.
5Khu kotani nya gu dilele ngudzu,
nyi wondride nyi tshala khu sikongolo.
6Nya gu fanana ni lisekwa la giwulani,
nyi fanana ni lipfhuguli la marumbini.
7Wutshigu watshavbo kha nyi mani ligovbe,
gukhwatshi nyi ginyoni nyi tshidwego ni wutundzu, vbatshani nya nyumba.
8Gikhati gyatshavbo nya gu vadwa khu valala vangu,
avo va nyi vengago va gu nyi yuyutela khu lina langu.
9Wulangani nya gibaba, nya gu hodza nguma
ni gusela gwangu gwa gu patana ni marongo yangu,
10khu kotani nya gu goroge ni likhulo lago,
kholu u di nyi khusa u nyi rinya hwindzo.
11Matshigu yangu ma gu mwalalega gu fanana ni mutsa nya silambo,
ma gu wu na ma banga gu fanana ni mwasi.
12Aholu, uwe Pfhumu Nungungulu, u ngu fuma kala gupindruga,
lina lago li na alakanywa khu mimela ni mimelana.
13U na khuga u ema u girela wuhindzi Siyoni,
gikhati nya gu u mupwela gisiro,
khigyo egi gikhati gi emisedwego.
14Kholu, sithumi sago si ngu gola siwindri sa Siyoni,
ni gupwa wuvi khu kotani nya marumbi yawe.
15Mahundzu yatshavbo ya mafuni,
ma na rungudza lina la Pfhumu Nungungulu,
ni vafumeli vatshavbo va mafuni va na dhumisa wugulu waye.
16Kholu Pfhumu Nungungulu a na vbahedza nyaluphye Siyoni
a dzi wonegisa khu wudhumo waye.
17A na yingisa nombelo nya khulungu
kha na nga nyenya nombelo waye.
18Satshavbo sesi si na lovedwe situgulwana si nga gutago,
gasi vathu va na velegwago hwane
va dhumisa Pfhumu Nungungulu.
19 Pfhumu Nungungulu khedzide vbavbatshi
nari khu giluveloni gwaye nya guage,
wonide litigo nari khu ndzadzini,
20gasi gupwa gudilela ga vale va khothedwego,
ni gu tshula ava va konedwego gu songwa;
21gasi gu tiviswa Siyoni lina la Pfhumu Nungungulu,
va huwelela wudhumo waye dhoropani ga Jerusalema;
22gasi avbo va na tshanganago vathu nya mayigo,
ni mifumo va khozela Pfhumu Nungungulu.
23Uye a nyi vbedzide tshivba vbakari nya ndzila,
a rodzisa matshigu yangu nya guvbanye.
24Nyi di ganela, kheni: “Nungungulu wangu,
u nga nyi dzegi na nyi ngari vbakari nya matshigu nya guvbanye.”
Myaga yago yi thaphelago mimela ni mimelana.
25U tiyiside mafu gukhugela guhegulani;
ni ndzadzini i thumo nya mandza yago.
26Satshavbo si na vbindra, aholu uwe u na simama u tiya;
satshavbo si na hagala kha nga dzingandzu,
u na si tshiphisa kha nga guambala, iso si na mwalalega.
27 # Wona gambe: Hebh 1:10-12. Aholu uwe khuwe kamwe wa moyo,
myaga yago yi mwalo mahegiso.
28Sanana sa vathu vago, si na vbanya na si tiyide,
ni situgulwana sawe si na tiyiswa mbeli gwago.
Currently Selected:
Dzindzimo 102: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
