Mavingu 26
26
1Gufanana ni thondrwane ya gu thega vbamarongatunu
ni ndzadzi yiwago gikhatini nya guvbwere,
kharato nugo gipumbu kha gi faneli gu zundzwa.
2Gukhwatshi khu ginyoni gi vbuvbago nyamba mbaka, gukhwatshi khu ndrewulewu guvbuvbani gwaye,
kharato nugo guyuyuta nyambana gighelo, kha gu phasi gilo.
3Kavalu ya gu gimbidziswa khu gisephu,
ni buru yi gimbidziswa khu matomu,
gasi hwambo nya gipumbu wu emedwe khu mboma.
4U nga phindruli gipumbu khu wupumbu waye,
kholu uwe nuwe u na fanana nagyo.
5Gi phindrule khu ndzila yi yeyedzago wupumbu waye,
gasi igyo gi si dzi woni na gi gengede.
6Gu rumela mahungu khu mandzani ga gipumbu,
gu fanana ni gu dzi pila
litundru.
7Mavingu ma dugelago kanani ga gipumbu,
ma gu fanana ni mawundru nya gilima ma gu
mwalo tshivba.
8Uye a zundzago gipumbu,
gu fanana ni gu hunga giwindri nya gukhedzige
vbafijigatunu,
u rinya talani nya nguma.
9Mavingu ma dugelago kanani nya gipumbu,
ma gu fanana ni litamo nya miba
li payago mandzani ga maleveni.
10Uye a tholago muthu nya guvivbedwe khu monyo ni
sindragamilayo,
a gu fanana ni muthu a hekhago vatshavbo khu sighalala.
11 # Wona gambe: 2 Ped 2:22. Kha nga yimbwa yi gu bwelo khavbo yi hodza magose yaye,
khidzo kharato ga gipumbu, kha gi garali khu gu thuma
wupumbu waye.
12U di nga wona muthu a dzi randrago gugengela, gani?
Gomo gutumba nya gukhongolo ga gipumbu guvbindra uye.
13Ngara wari, khuye: “Yomo nghala ndzilani;
nghala nya guthise yomo dzindzilani nya makondro.”
14Kha nga lidimba li gimbilagimbilago vbamijageritunu gwaye,
kharalo nuye ngara vbadawutunu gwaye.
15Muthu nya ngara a gu bedza libogo mbiyani,
aholu gu khala thumo gu li yisa kanani.
16Ngara a gu dzipwa na gengede,
guvbindra livbandre na vavili vama va ningago phindrulo nya yadi.
17Gu dzi bedzedzela mahunguni nyamba mati,
gu fanana ni uye a molago yimbwa khu dzindzeve.
18Gukhwatshi muthu nya guhandruge a rinyago
magala nya nilo ni sighalala nya gusonge;
19kharato nuye muthu a kanganyisago muakelane waye,
khu hwane, khuye:
“Nyi di gira esi khu guhagana.”
20Gwa gu bani guri mwalo dzikhuni, nilo wa gu tshimega;
kharato nugo, gwa gu bani guri mwalo muthu nya milembo,
mayunga ma gu vbela.
21Gukhwatshi khu magala ni dzikhuni dzi khondrisago nilo,
kharato nuye muthu nya dzihanyi gu wusa mayunga.
22Magana nya muthu nya milembo ma gulombela,
ma gu midzwa khu vatshavbo ma relela kala mahembeni
23Magana nya gunyenyeze ni monyo nya guvivbe,
gu fanana ni sombo nya libumba si namegedzedwego,
maraga nya parata.
24Muthu nya mukanganyisi a gu siha gigaha gi tadego
monyoni gwaye,
monyoni gwaye a gu alakanyela wudambane.
25Ambari a gu tshambisela gu ganela u nga khodwi,
kholu monyoni gwaye, gu tade khu wulala nya gu enedze
livbandre na dzimbili dzinyondro.
26Ambari a gu zama gu siha manyala yaye,
mithumo yaye nya guvivbe, yi na tugudwa khu vathu vatshavbo.
27Uye a kembago liphala, a na thegela umo,
ni uye a rindrividzelago giwindri, a na thegedwa khigyo.
28Lidimi la muthu nya malipha, la gu gira dzimhango nya dzingi,
ni magana yaye nya gulombele, ma gu mu mbembisa.
Currently Selected:
Mavingu 26: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
