Mitengo 34
34
Mivbingano nya litigo la Khanani
(Josuwa 13—19)
1 Pfhumu Nungungulu a di engedza a embela Mosi, khuye: 2“Ruma sanana sa na Israyeli, khuwe: Mu na bela tigoni gwa Khanani nyamba hwela, khilo eli litigo li na mi lumbago kha nga thomba; litigo la Khanani gukhedza khu mivbingano yaye.”
3Khu phuvbo ga Marandzi, vbingano wanu wu na khugela giwulani gya Zimi, kala Edhomi; khu guralo, vbingano wowu wa Marandzi avbo gwanu wu na phelela tshokatunu nya Yiphwa nya Munyu#34:3 Yiphwa nya Munyu, vambe khavo Yiphwa nya Gufe: gu thudwa Litsiva li manegelago phuvbo ga Marandzi nya Giwula gya Judha, vbafuvbi ni mahegiso nya Tsongo wa Joridhani. Khumo Tshongo yoyu wu vbaladzago umo mati yaye. Wa gu ranywa Yiphwa nya Munyu kholu mati yaye ma vavago ngudzu munyu. Wa gu ranwa gambe pwani Yiphwa nya Gufe kholu gimwalo givangwa gi vbanyago umo khu kotani nya munyu. khu phuvbo ga Khugadambo; 4vbingano wu na dzundruluga khu phuvbo ga Marandzi khu ndzila yi gwelago gu hongola Akirabhimi, wu vbindra khu Zimi, wu vboha Marandzi ga Kadhesi-Bharineya; khu hwane wu na vbindra khu Hazari-Adhari, wu tsemakanya Azimoni. 5Khu Azimoni, vbingano wu na dzundruluga wu thonona gitsongwanani gya Egipito, wu ya hegisela phwani.
6Vbingano wa Muhwadambo wu na bani wuri Yiphwa nya Yikhongolo, uwowo wu na bani wuri vbingano wanu wa Muhwadambo.
7Vbingano wanu wa Wuronga, khowu: Mu na pandra gukhugela ga Yiphwa nya Yikhongolo kala gigomoni ga Hori; 8khu gigomotunu ga Hori mu na wu pandra kala nyangwani ga Hamati, vbingano waye wu na bani wuri mahegiso ga Zedhadi; 9khu vbale wu na khugela Ziforoni kala Hazari-Enani. Owu wu na bani wuri uwo vbingano wanu khu phuvbo ga Wuronga.
10Enu mu na pandra vbingano wanu khu phuvbo ga Khugadambo gukhugela Hazari-Enani kala Sefani; 11khu guralo, vbingano wanu wu na khugela Sefani wu relela kala Ribila, khu phuvbo ga Khugadambo ga Ayini, wu simama gu relela khu gu landra bambe nya Yiphwa ya Kinereti#34:11 Yiphwa ya Kenereti: Gu ngu kodzega gambe gukhuwe Yiphwa ya Galileya. khu phuvbo ga Khugadambo; 12khavbo avbo, wu na relela wu landra tsongo wa Joridhani, wu ya hegisa ga Yiphwa nya Munyu. Eli li na bani liri litigo lanu gumogo ni mivbingano yaye khu maphuvbo yatshavbo. 13#Wona gambe: Mit 26:52-56. Mosi a di leletela va na Israyeli, khuye: “Eli khu litigo mu yelago gu li kabanisela khu gu lola dzisolo, Pfhumu Nungungulu a rumedego gu ningela ga livbandre na mana mahundzu ni gipandre. 14Lihundzu la na Rubheni, gukhedza khu dzinyumba dzawe, lihundzu la na Gadhi, gukhedza khu dzinyumba dzawe ni gipandre nya lihundzu la na Manasi, va hakhide thomba yawe. 15Mahundzu yaya yamavili ni gipandre ma hakhide thomba yawe khisikheyi nya tsongo wa Joridhani, mbeli ga Jeriko, khu phuvbo ga Khugadambo.”
Avo va lumbwago khu gukabanisela litigo
16 Pfhumu Nungungulu a di ganela gambe ga Mosi, khuye: 17Malina ya vama va na gu kabaniselago litigo vbakari gwanu, khaya: Khu muphasi nya mhamba Eleyazari ni Josuwa, mwamana wa Nuni. 18Gu diga nya ava, mu na dzega gambe muthangeli moyo khu lihundzu ni lihundzu, gasi va kodze gu kabanisela litigo.
19Malina ya vama vovo khaya:
Ga lihundzu la Judha, khu Kalebi, mwamana wa Jefoni;
20ga lihundzu la na Simiyoni,
khu Samuweli, mwamana wa Amiyudhi;
21ga lihundzu la Bhejami,
khu Elidhadhi, mwamana wa Kisiloni;
22ga lihundzu la na Dhani,
muthangeli khu Bhuki, mwamana wa Jogili;
23ga livelego la Josefe; nya lihundzu la na Manasi,
muthangeli khu Haniyeli, mwamana wa Efodhi;
24ga va na Efrayimi,
muthangeli khu Kemuweli, mwamana wa Sifitani;
25ga lihundzu la na Zabhuloni,
muthangeli khu Elizafani, mwamana wa Parinaki;
26ga lihundzu la na Isakari,
muthangeli khu Palitiyeli, mwamana wa Azani;
27ga lihundzu la na Aseri,
muthangeli khu Ayudhe, mwamana wa Selomi;
28ni ga lihundzu la na Nafitali,
muthangeli khu Pedhayeli, mwamana wa Amiyudhi.
29Ava khavo va leletedwego khu Pfhumu Nungungulu gasi gu va kabanisela litigo la Khanani ga va na Israyeli.
Currently Selected:
Mitengo 34: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
