Mitengo 35
35
Madhoropa ma lumbago va na Levhi
(Josuwa 21:1-8; 1 Dzikoronika 6:29-66)
1 Pfhumu Nungungulu a di embela Mosi mapanini ya Mowabhi, vbafuvbi ni tsongo wa Joridhani, mbeli ga Jeriko, khuye: 2Tivisa va na Israyeli gukhuwe ga thomba yawe va na ninge va na Levhi madhoropa gasi va vbahe umo, va va ninga gambe marembwe ma dzundrulugelago madhoropa yawe gasi va havise umo mitshambi yawe. 3Madhoropa va na vbaha umo, gasi marembwe va na havisela umo mitshambi yawe, dzimombe dzawe ni sifuyo sawe satshavbo.
4Marembwe nya madhoropa mu na ningago va na Levhi, gu vbwetega na mari ni likhumi mazana (1.000) mikono, gukhugela vbalibhiyotunu nya lidhoropa ma dzundrulugela lidhoropa. 5Mu na pima khu vbavbandze nya lidhoropa magumavili mazana (2.000) mikono khu phuvbo ga Khugadambo, magumavili mazana (2.000) khu Marandzi, magumavili mazana (2.000) khu Muhwadambo ni magumavili mazana (2.000) khu Wuronga, lidhoropa li khala vbakari. Aya a na bani ari marembwe ya madhoropa yawe.
6Gasi khu madhoropa mu na ningelago va na Levhi, livbandre na limwedo ma na khala wuthavelo nya wule a songago muthu khu guphazama; gu diga nya ayoyo, mu na va ninga gambe magumana na mavili madhoropa. 7Madhoropa yatshavbo mu na ningago va na Levhi ma na enedza magumana na livbandre na mararu gumogo ni marembwe yawe. 8#Wona gambe: Jos 21:1-42. Gasi ga madhoropa yoyo mu na gu ma hambanisago ni dzithomba dza na Israyeli, u na vbweta nya singi ga lihundzu nya likhongolo, u lomba nya sidugwana ga ilo nya lidugwana; lihundzu ni lihundzu li na ningela litigo nya madhoropa yawe ga va na Levhi, gukhedza khu gipandre va hakhidego.
Livbandre na limwedo madhoropa nya wuthavelo
(Dhewuteronome 4:41-43; 19:1-12; Josuwa 20:1-9)
9 Pfhumu Nungungulu a di embela gambe Mosi, khuye: 10Ganela ga va na Israyeli, u va embela, khuwe: Gikhati mu na tsemakanyago tsongo wa Joridhani mu bela tigoni ga Khanani, 11mu na ya dzi hathela madhoropa gasi gu khala wuthavelo. Umomo gu na thavela wule a na songago muthu khu guphazama. 12Ayo ma na khala wuthavelo nya gusihalele muphodzeli, gasi musongi a si songwi na si gu vbohi mbeli nya tshangano aya lamudwa. 13Ga madhoropa mu na ningelago nya livbandre na limwedo, ma na khala wuthavelo ga enu vambe. 14Mu na ningelani madhoropa mararu ya khisikheyi ga Joridhani, ni mambe mararu ya tigoni ga Khanani; ma na khala madhoropa nya wuthavelo. 15Madhoropa yaya nya livbandre na limwedo, ma na khala wuthavelo wa va na Israyeli, wa valuveli, wa vaendri va vbahidego vbakari gwanu, ni vambe vathu va vbanyago vbakari gwanu, gasi va thavela umomo, va gu manega na va songide muthu khu guphazama.
Gusonga muthu
(Dhewuteronome 19:11-13)
16Muthu nya gukari a gu veta mumbe muthu khu simbi a mu bayisa afa, muthu yoyo gighevenga; fanede gu songwa nuye. 17A gu veta muthu khu giwindri gi kodzago gu songa khu guralo afa, muthu yoyo gighevenga; fanede gu songwa nuye. 18A gu thumisa simbo wu dzi kodzago gu songa muthu, khu guralo afa, muthu yoyo gighevenga; fanede gu songwa nuye. 19Muphodzeli a na songa gighevenga a gu manana nagyo. 20Khu guralo, muthu nya gukari, khu kotani nya lidiwo, a liginya mumbe, mwendro gu mu veta khu gimbe gilo khu gu vengana naye, uye afa, 21mwendro gu mu veta khu mandza yaye khu gu nyenyana naye, uye afa; uye a mu vetidego a na songwa nuye, kholu gighevenga, muphodzeli a ngu dzi kodza gu mu songa avbo a mu manago.
Dzifanelo dzi ningedwago khu madhoropa nya wuthavelo
(Dhewuteronome 19:4-10)
22Aholu a gu mu liginya khu guphazama, mwendro gu mu rinyela gilo nya gukari nyamba dzi vegisa gu mu girela isoso, 23mwendro gu diga giwindri gi thega, gi dzi kodzago gu songa muthu nya gukari nyamba gira khagwenye, na sindri nala waye ambari gu mu nyenya, 24avbovbo tshangano wu na lamula vbakari ga musongi ni muphodzeli khu nayo yoyu: 25Tshangano wu na vbulugisa musongi mandzani ga muphodzeli, khu gu mu yisa dhoropani nya wuthavelo umo a nga bani a thavede umo; aya khala umo kala afa muphasi nya khongolo nya mhamba a todzidwego khu mafura nya guage.
26Aholu musongi a gu duga vbinganoni nya lidhoropa a thavedego umo, 27muphodzeli a gu mu mana vbavbandze nya lidhoropa nya wuthavelo waye, a gu mu songa, mwalo nandru nya wusongi, 28kholu musongi fanede gu khala dhoropani gwaye nya wuthavelo kala afa muphasi nya khongolo nya mhamba; hwane nya gu na fude muphasi yoyo nya mhamba, a ngu dzi kodza gu bwelela tigoni nya thomba yaye.
29Khu guralo, silo sesi si na khala kha nga nayo avbo gwanu, ga situgulwana sanu satshavbo ni dzindrangani gwanu gwatshavbo.
30Muthu watshavbo a songago muthu kwawe, a na songwa, aholu na gu pwidwe dzifakazi; wufakazi wa muthu moyo basi kha wu dingani gu a songwa muthu.
31Mu nga tshuki mu hakha nivbo nya gudzegise womi wa muthu a fanedego gu songwa, kholu fanede gu songwa khu lisine.
32Gambe mu nga tshuki mu hakha nivbo nya gutshule uye a thavedego dhoropani nya wuthavelo a bwelela tigoni gwaye na si gufi muphasi nya khongolo nya mhamba.
33Khu magirelo yaya, mu nga tshuki mu nyenyezisa litigo leli mu vbanyago ga ilo; kholu novba wu ngu nyenyezisa litigo; gambe ilo li ngu kodza gu handzwa basi khu novba wa wule a vbaladzidego novba. 34Mu nga nyenyezisi litigo leli mu vbanyago umo; khumo nyi khalago umo Eni neni, kholu Eni Pfhumu Nungungulu nya gu khala vbakari ga va na Israyeli.
Currently Selected:
Mitengo 35: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
