Joba 40
40
1 Pfhumu Nungungulu a di engedza a embela Joba, khuye:
2“Ina uye a dwanago ni mune
nya Tshivba Yatshavbo
a ngu kodza gu mu hevbudza, gani?
Wule a ningago nandru Nungungulu
a na mu ninge phindrulo!
Phindrulo nya guhegule ya Joba ga Nungungulu
3Khu guralo, Joba a di phindrula Pfhumu
Nungungulu, khuye:
4Pfhumu, olu nyi gu gilo nyamba phasa gilo
avbo gwago,
nyi na phindrula kheni ginani,
nyi na vega mandza vbalikanatunu gwangu.
5Nyi ganede gumogo,
kha nyi na engedza gambe
mwendro guvili,
kha nyi na ganela gambe.
Phindrulo nya guhegisa ya Nungungulu ga Joba
6 Pfhumu Nungungulu a di ninga phindrulo Joba
nari khu vbakari nya gipupwane, khuye:
7Dzi hunge u dzi phara khu nga mwama,
nyi na gu gira siwudziso,
aholu uwe u na nyi ninga phindrulo.
8Ina u na futa gululama gwangu, u nyi kona, gani?
Gasi u kodza gu dzi handza, gani?
9U na ni tshivba yi fananago ni ya Nungungulu, gani?
Lito lago li ngu kodza gu zindza gu fanana ni lito laye, gani?
10Dzi ambagise khu wugulu ni wudhumo,
u ambala gungangamela ni wuzundzo.
11U guhula giviti nya likhulo lago,
u khedza vatshavbo va dzi khusedzago,
u va vbwasamisa.
12Khedza vatshavbo va dzi gugumugisago
U va thesa vbavbatshi,
U gandredzela sighohi satshavbo malangani gwawe.
13Vatshavbo va futele khu mafu,
dzikhovbe dzawe dzi na fenengedzwe khu gidema.
14Khavbo avbo, eni neni nyi na gu embeledzela gukheni
mandza yago ya nyamudye ma gu tshudziside.
15Nga khedza nvuwu nyi yi vangidego
kha nga idzo nyi vangidego khidzo uwe,
iyo ya gu hodza mwasi kha nga mombe.
16Tshivba yi gu nayo longoni gwaye!
Tshivba yaye, ya gu duga khu misivbani ya
rumbuni gwaye.
17Ngila waye wu tiyide kha nga simbo nya simbiri;
ni misivba nya sikongolo saye yi molanide.
18Marambo yaye ma gu fanana ni misengele nya sugu,
ni sivbango saye gukhwatshi madingo
nya dzisimbi.
19Iyo khiyo mithumo nya guphele nya sigiro
sa Nungungulu.
Khu guralo, Muvangi waye a ngu dzi kodza
gu vboha vbafuvbi gwaye nari ni litshari.
20Sigomo sa gu yi ninga mwasi watshavbo wu bugago umo,
umo sirengo satshavbo nya likhabi si haganago umo.
21Ya gu lala mitsani nya misimbo,
yi sihala dzitshavani vbafuvbi ni maraga.
22Misimbo ya gu yi fenengedza khu mitsa yaye
yi fenengedzwa khu mwasi nya matsongo.
23Ambari tsongo wa gu gugumuga wu tala,
kha yi thavi gilo;
ambari tsongo wa Joridhani wa gu gugumuga kala
dzithonvuni gwaye, iyo kha yi khathali.
24Khu mani a tiyelago gu ema mbeli gwaye a yi mola,
gasi gu yi thela khalo thonvuni?
Guganela khu mahungu nya ngona
25Ina u na kodza gu mola ngona khu gilowo,
bwelo khavbo u yi hunga lidimi laye khu ngodzi, gani?
26Ina u ngu kodza gu thela ngodzi thonvuni gwaye,
mwendro gu yi pola gigundru gyaye u thela lisindra, gani?
27Ina, yi nga lila avbo gwago yi lomba gu divaledwa,
mwendro gu ganela nago khu magana nya
guvbevbuge, gani?
28Ina, yi nga gira nago gidzumeledzwano,
gasi yi gu thumela kala gupindruga, gani?
29Ina, u ngu kodza guhagana nayo, kha nga ginyoni,
mwendro gu yi hungelela gasi yi tsakisa sanana sago
nya sagadzyana, gani?
30Ina, vathu va na gira bhindzu khiyo,
va kabanisela va nya wugwewo, gani?
31Ina, u nga khodza gu fenengedza lidowo laye khu silowo,
mwendro gu tadza hungo waye khu silowo
sa vatshevi, gani?
32Nga linga gu handzega mandza yago
vbatshani gwaye,
u dwana naye,
u na dzi laya u si engedzi gambe.
Currently Selected:
Joba 40: BGG2014
Highlight
Share
Compare
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
