Judhite 9
9
Nombelo wa Judhite
1Khavbo avbo, Judhite a di thega khu khovbe mafuni, a phorola nguma hungoni, a tshula guambala nya dzisaku a nga bani na ambade, khu gikhati gyogyo nya silambo gu nga bani na gu vbiswa libani Nyumbani ga Nungungulu, Jerusalema. Judhite a di lombelela ga Pfhumu khu lito nya gukhugege, khuye: 2“Uwe Pfhumu, Nungungulu wa babe wangu Simiyoni, uwe u vegidego litshari mandzani gwaye, gasi gu dzi phodzela ga va nya mayigo va nga funungulago giwunu gya gyagadzyana nya likendzi gasi gu gi sagela, va wonisa marumbi yaye, gasi gu mu thela dzitshoni ni gu nyenyezisa mahembe yaye khu gufela gu mu poyila. Ambari ulo u nga bani u va embede, khuwe: Isoso kha si yeli gu girwa, avo va di si gira kamwe kharato. 3Khu kotani nya isoso, u ningede vathangeli vawe, gasi va sasedwa, ni lidawu lawe li thedwa dzitshoni khu kotani nya manyala va ma giridego, gasi va nyenyeziswa khu novba. Uwe u songide dzikhumbi gumogo ni manganagana, ni vafumeli vbasikhalotunu gwawe nya wufumu. 4U ningede vagadzi vawe va khala pfimba, ni vanyamahegyane vawe va vbagedwa, va yiswa wugumbitunu, ni dzithomba dzawe dzatshavbo dzi kabanedwa khu sanana sago nya sigodwa, si nga yeyedza gupinyamela gu gira guhaladza gwago. Va di goroga ngudzu khu gu wona gunyenyeziswa novba wawe, va di lomba giphaso iyo gwago.
Ama Nungungulu, Nungungulu wangu, olu gira gambe kharato, U nyi yingisa neni, nyi gu noni! 5Kholu u giride silo satshavbo sesi, iso si vbindridego niso si landrelago; u khade u pimisela esi hi si wonago niso si nga gutago gasi iso si nga bani siri mapimoni gwago si tadzisegide. 6Iso u nga bani u dongisede gu si gira, si dzi bikede, khiso: Hi womo avba! Kholu dzindzila dzago dzatshavbo dzi dongisedwe khu gale, ni gulamula gwago gwatshavbo gu phede khugo gu tidwa. 7Vaasiriya va dzude ni tshivba yawe yatshavbo, khu matshandza nya tshivba nya dzikavalu dzawe ni vakhileli vakone. Va gu dzi zundza khu tshivba nya masotshwa yawe nya gugimbile khu mawundru, va vegide gitumbo gyawe avbo nya gitshangu ni vbalitsharitunu, avbo nya wulaho ni giholoma, gambe kha va dziti nya gukhavo Uwe Pfhumu Nungungulu khuwe u mbembisago dzinyimbi.
8Lina lago khuwe Pfhumu Nungungulu! U ngu pfhungumula guena gwawe ni tshivba yawe, u ngu vbedza tshivba yawe khu tshivba nya likhulo lago. Avo va lugide gikungo nya gukhungumule malanga yago nya miphaso ni gunyenyezisa Tshatsha li khalago umo lina lago nya Wudhumo ni gu khungumula giluvelo gyago khu litshari. 9Wona Pfhumu gu dzi khusedza gwawe, u rumela likhulo lago vbatshani nya mihungo yawe, u ninga, eni nyi gu noni, tshivba nya gugire gikungo nyi gi dongisedego. 10Gira nyi va pembe vathu va Asiriya khu magana yangu, gu theswa vbavbatshi dzikhumbi gumogo ni manganagana, linganagana gumogo ni githumi gyaye; tshitinga matshandza yawe khu mandza nya nyamayi. 11Kholu tshivba yago kha yi khedzi khu tengo nya vathu, ambari khu wungwazi nya vama; Uwe khuwe Nungungulu wa va nya gusolega, muphasedzeli wa va nya gutshaniswa, muwundzi wa vale va gu mwalo tshivba, muvhikeli wa vale nyambana wawe, muvbanyisi wa vale va gu mwalo gitumbo. 12Ina! Uwe Nungungulu wa babe wangu, Nungungulu nya thomba ya Israyeli, Pfhumu ya ndzadzini ni mafuni, Muvangi nya mati, ni Mufumeli nya sivangwa sago satshavbo, yingisa gu lomba gwangu, 13gira gukhuwe, malipha yangu ma mbembise ni gu sasela vatshavbo va nga girago makungo yatshavbo yaya, va wugela gidzumeledzwano gyago nya gukatege, ni wulanga wago nya guage u khalago avbo, ni tshokhatunu nya gigomo gya Siyoni, si khalago avbo sanana sago. 14Gira gukhuwe mayigo yatshavbo ni mafumbu, ma dziti nya gukhayo Uwe u Nungungulu u gu ni tshivba yatshavbo, gambe mwalo mumbe a sayisago Israyeli, vbavbandze ga Uwe basi.”
Currently Selected:
Judhite 9: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.