Judhite 10
10
Judhite a nguya dwanisa Holoferini
1Avbo a nga vbedzago gulombelela ga Nungungulu wa Israyeli ni gu pwadza magana yatshavbo yaya, 2Judhite a di khuga khavbo a nga bani na khidzimide, a rana githumi gyaye nya nyamayi, a relela ga ndranga a nga bani na guya khala avbo khu matshigu nya dzisabhadho ni ayo nya mibuzo. 3A di tshula guambala nya dzisaku a nga bani na ambade, a tshula gambe ni guambala nya silendra, a hamba givili gyaye khu mati, a tola mafura nya gunungele. Khu gu landrela a di samula ndzudzu wa hungoni gwaye, a ambala gihugu nya wuzundzo, a ambala dzingandzu nya guye khidzo buzotunu, dzile a nga bani na gu tala gu ambala na nga gu vbanya mwama waye, Manasi. 4A di ambala silato migondroni, a dzi mburisela khu mikarara, maniya ni dziphera dza nyalani ni dza dzindzeveni, ni simbe simburiselo nya guvbandze maho nya vama va na mu wonago. 5A di pharisa githumi gyaye gigasi nya wadwa nya dziuvha ni liboteri nya mafura; a tadza gisakwana khu wuguvbi nya mala, ni gibaba nya gugirwe khu mihandro nya gubange, sibaba ni dzifiyoso, a si fumbela gwadi khu wuzundzo a rwegisa githumi gyaye nya nyamayi.
6Khu gulandrela, va di duga gumogo va thonona nyangwatunu nya lidhoropa la Bhetuliya, vbale a nga bani ari avbo Uziya gumogo ni madhota nya lidhoropa, Kabiri ni Karimi. 7Avbo avo va nga mu wonago na phorode khovbeni khu mafura na vbindrugedzide guambala, va di samala ngudzu khu wumburi waye, va di mu embela, khavo: 8“Nungungulu wa vababe vathu a na gu kategise u mana wuhigo u dugelela gwadi ga gikungo gyago gasi gu dhumisa va na Israyeli ni gu khusedza Jerusalema.” 9Uye a di khozela Nungungulu, a va embela, khuye: “Va embeleni va nyi tulela lidimba nya lidhoropa, eni nyi na duga gasi guya tadzisa satshavbo esi mu ganedego ni eni.” Khavbo avbo, va di leletisa madzaha gu va mu tulela lidimba kha nga idzo a ganedego khidzo. 10Avo va di gira kharato. Judhite a di duga, uye gumogo ni githumi gyaye nya nyamayi. Vama va di simama gu mu khevisela kala a vbedza gurelela khu mugigomoni a tsemakanya kova va si mu woni gambe.
11Avo va di gimbila va lulama ni kova, kala va gu wonwa khu muwoneleli wa Vaasiriya a va khinga. 12Va di mu mola va mu wudzisa, khavo: “U wa lifumbu muni, wa guta khu evbi, wa gu hongola hayi?” Uye a di va hakha, khuye: “Nyi nyamahegyane nya Muhebheru nya gu thava vathu vangu, kholu vomo vbafuvbi ni gu dzi ningela avbo gwanu gasi va mbembiswa. 13“Khu guralo, eni nya guta dzi ningela mahoni ga Holoferini, muthangeli nya masotshwa yanu, gasi gu mu embela lisine latshavbo ni gu mu yeyedza ndzila a yelago gubela khiyo gasi guya khozisa gipandre gyatshavbo nya sigomo, nyamba luzekedwa khu moyo nya masotshwa yaye.”
14Avbo vama vale va ngapwago magana yaye, va gu khedza khovbe yaye yi nga bani yi wonega mbeli gwawe na yi mburide ngudzu, va di mu embela, khavo: 15“U vbanyiside womi wago khu gu hegulela gu relela uta dzi ningela mbeli ga mune wathu; hongole hi gu yisa kala tshatshani gwaye. Vambe va na gyathu va na gu vbwelegedza vaya gu ningela mandzani gwaye. 16Wa guya vboha vbafuvbi gwaye, u nga khali hwanga monyoni gwago, ganela gambe magana u nga hi embelago uye a na gu sayisa gwadi.”
17Va di hatha vbakari nya masotshwa lizana vama va patana ni uye gumogo ni githumi gyaye va va yisa tshatshani ga Holoferini. 18Wughoveloni gwatshavbo gu di manega nyenganyenga, avbo mahungu yaya ma nga pwalago umo nya tshatsha ni tshatsha. Va dita randrela Judhite, avbo a nga bani na emide vbavbandze nya tshatsha, na gu lirela, gukhuye vaya tivisa ga Holoferini mahungu nya guvbohe gwaye. 19Va di samala khu wumburi waye, bwelo khavbo va samala sanana sa na Israyeli khu mahungu yaye, va embeledzana khu gyawe, khavo: “Khu mani a dzi kodzago gu nyenya litigo li gu na ni vanyamayi nya gumbure ngudzu kharati, gukhuye khandri la gilo? Hi nga dzumedzisi gukhethu ni moyo basi nya vama vawe a vbanye kholu, ha gu va diga, va ngu dzi kodza gu hambanisa mapimo nya litigo latshavbo.”
20Vangana va Holoferini va di duga gumogo ni sithumi saye satshavbo, va mu vbwelegedza tshatshani. 21Holoferini a di lade vbadawutunu gwaye nya gubhiywe khu makhuvi nya myendra nya wumburi nya giwunguwungu, ndralama, esmeralidha ni siwindri nya lisima. 22Avbo va nga mu embelago khu mahungu ya Judhite, uye a di duga ata kala vbamwanyatunu nya tshatsha, mbeli na gu thangide situmi ni dzikandriya nya parata. 23Avbo Judhite a nga vbohago mbeli ga Holoferini ni ga sithumi saye, avo va di tala khu gusamala khu kotani nya wumburi nya khovbe yaye. Uye a di thega khu khovbe mafuni, mbeli ga Holoferini, sithumi si di mu phasa guwuga.
Currently Selected:
Judhite 10: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.