Judhite 8
8
Magana ya Judhite ga vathangeli nya lidhoropa
1Khu matshigu yoyo, satshavbo sesi si nga dugelela, si di vboha dzindzeveni ga Judhite, nyamahegyane wa Merari, mwamana wa Oki, mwamana wa Josefe, mwamana wa Oziyeli, mwamana wa Hilikiya, mwamana wa Eliyabhi, mwamana wa Nataniyeli, mwamana wa Salamiyeli, mwamana wa Sarasadhayi, mwamana wa Israyeli.
2A diri ngadza Manasi, nya lihundzu la limwedo ni uye, wa linyumba la limwedo naye, fude matshiguni nya guvbwere mala. 3Kha nga uye a nga bani na thuma gu ghadha avo va nga bani na va gu hungelela dzinyandra thembweni, a di vetwa hungoni khu nilo nya lidambo, a thega vbadawutunu afa dhoropani gwaye Bhetuliya. Dzingidwe umo nya lithembwe li khadego khu vbakari ni vbakari ga Dhotani ni Bhalamoni.
4Judhite a di gu vbanya ndrangani gwaye, a diri noni, a di tshanganiside myaga miraru ni migima mina na fedwe khu mwama waye. 5A di vbahide tshatsha waye khu vbatshani nya nyumba yaye, a di hunga keka nya saku giwununi, a ambala myendra nya silendra. 6Matshigu yatshavbo nya wunoni waye, a di hala, gudiga nya Sabhadho ni matshigu nya gudongisele, ni mibuzo nya gumege ngima ni matshigu nya gudongisele, umo nya mibuzo ni matshigu nya gutsake nya nyumba ya na Israyeli.
7Judhite a di mburide ngudzu nari ni giyemo nya gutsakise. Mwama waye Manasi a di mu tshiyede thomba nya ndralama ni parata, sithumi nya vama niso nya vanyamayi, sifuyo ni marembwe, uye a di vbanya khu dzithomba dzaye. 8Mwalo a nga bani na gu tiyela gu ganela guvivba khu uye, kholu a diri ni githawo ngudzu ni Nungungulu.
9Judhite a dipwa mahungu nya magana nya gulemele ma nga ganedwago khu vathu nya guwugele muthangeli wawe, kholu va di vbede tshivba khu kotani nya guhamuge mati. A di pwide gambe gu ganedwa khu satshavbo iso va nga embedwago khu Uziya, avbo a nga sambanya gu ningela lidhoropa ga Vaasiriya hwane nya gu na ma vbindride livbandre matshigu.
10A di rumela githumi gyaye nya nyamayi, a nga bani a gi vegide gu sayisa dzithomba dzaye dzatshavbo, uye a di gi ruma guya rana Kabiri ni Karimi, ni vasingalagadzi va dhoropani.
11Avbo va nga vbohago vbafuvbi gwaye, a di va embela, khuye: “Nya gu mi lombani gukheni mu nyi yingisani, enu vathangeli va vathu va vbanyago dhoropani ga Bhetuliya, kholu kha ma lulama magana mu nga embelani vathu, litshigu mu nga girago gisambanyo vbakari gwanu ni Nungungulu, mu nga ganelani khu guningela lidhoropa ga valala vathu hwane nya livbandre matshigu, mwa gumba resedwa giphaso khu Nungungulu.” 12Gasi khenu vamani enu nya gukala mu lingani Pfhumu Nungungulu kha nga idzo mu giridego muhuno, mu dzi vegago wulangani ga Nungungulu, vbakari nya sanana nya vathu? 13Olu enu mwa gu linga Pfhumu nya Tshivba Yatshavbo, aholu gimwalo mu gitigo kala mahegiso nya dzinango, 14olu mu gumba tugula iso si guromo guetani nya monyo nya muthu ni gumbati iso a si pimisago khu wugengeli waye. Mwa gu vbweta gu dzi kodza kharini guti Nungungulu a vangidego satshavbo sesi, ni guti esi si guromo mapimoni gwaye ni gu tugula iso a si pimisago? Vandriyangu, gima kha mu na si kodza esi; mu nga wusini likhulo la Pfhumu, Nungungulu wathu. 15Kholu, ambari Uye a gumba dzina gu hi rumela giphaso ndrani nya matshigu yaya nya livbandre, a na ni tshivba nya gu hi vhikele ga valala vathu khu ga gevbini gikhati a na gi golago. 16Gasi enu olu, mu nga zami guhambanisa guhaladza gwa Pfhumu Nungungulu wathu, kholu Uye kha fanani ni vathu, va dzi kodzago gu thusedzedwa, mwendro gu fanana ni gyanana nya muthu nya guganedzisane Naye, hi mu pemba khu situmbiso. 17Khu magirelo yoyo, olu na hi gu lindrela gutshudziswa khuye, hongoleni hi mu rane khu milombelo gasi a hi phase, uye a na yingisa lito lathu, a gu bani nari gudzina gwaye.
18Kholu, omu nya melana wathu, ambari ga gikhati gegi, gima gu si gu manegi umo nya lifumbu, ndranga mwendro lidhoropa lathu, gu khozedwa vanungungulu nya gugirwe khu mandza nya muthu, kha nga iso si nga bani si gu girega ga matshigu ma vbindridego.
19Khiso si nga girago vababe vathu va ningedwa va sasedwa khu matshari ni gu phangwa. Khu guralo, va manidwe khu dzimhango nya dzikhongolo mbeli ga valala vathu. 20Khu kharato, ethu hi mwalo mumbe Nungungulu hi mutigo vbavbandze ga Uye basi. Khu guralo, hi ngu lirela gukhethu kha na hi diga, ethu, ambari gu diga ni moyo basi nya lifumbu nya valongo vathu. 21Kholu, ha gu kala hi modwa, gu na modwa gambe ni Judheya gwatshavbo, ni wulanga wathu nya miphaso gu na phangwa, gasi Uye a na hi wudzisa khu manyala yoyo.
22Gusongetedwa nya vandriyathu, guvbagedwa hiya wugumbitunu ni guphangwa nya thomba yathu, satshavbo sesi Uye a na si gira si thegela mihungoni gwathu mbeli ga va nya mayigo, ha gu kala hi girwa dzikhumbi, ethu hi na khala gihoso ni gu hembuludwa mbeli ga vale va na hi rengago. 23Wugumbi wathu kha wu na manega wuri ni giphaso ga ethu; aholu Pfhumu Nungungulu wathu, a na wu vbindrugedza wu khala gipoyilo.
24Gasi olu vandriyangu, hongoleni hi vbindrugedze hi khale giwonelo ga vandriyathu, kholu guvbanyani gwawe va gu tumba ethu, kharato gambe ni wulanga nya miphaso, Nyumba ya Nungungulu ni giluvelo, somo mandzani gwathu gasi hi si wonelela. 25Ambari khu guralo, hongoleni hi bonga Pfhumu, Nungungulu wathu, a hi lingago kha nga idzo a giridego ni vababe vathu. 26Dundrugani satshavbo iso Uye a giridego ga Abrahama, idzo a lingidego khidzo Isaki ni iso si nga dugelelago Jakobe tigoni ga Mesopotamiya wa Siriya, avbo a nga bani na gu havisa mitshambi ya Labani, ndruye wa mayi waye. 27“Kholu Uye kha hi linga khu nilo kha nga idzo a giridego gwawe, na gu vbweta gu wona lisine nya myonyo yawe, gambe kha phodza ga ethu, aholu Pfhumu a ngu khendzugisa khu muba vale va hidzimelago vbafuvbi gwaye, gasi gu va bhasopisa.”
28Uziya a di mu embela, khuye: “Satshavbo u ganedego si lulamide, gambe mwalo ni moyo a na gu ganedzago magana yago. 29Khandri wa gu phela muhuno basi gu yeyedza guti gwago; aholu gukhugela guphelani nya guvbanye gwago, vathu vatshavbo va ngu guti, kholu mapimo nya monyo wago ma lulamide. 30Aholu vathu va di tshaniseka khu lidora nya likhongolo ngudzu, hi gurumedzwa gu gira iso hi nga bani hi va tumbiside, va hi gurumedza gu gira gisambanyo egi ethu olu hi gumba kodza gu gi tshula. 31Khu kharato, uwe olu, lombelela khu ethu ga Pfhumu Nungungulu, uwe u gu nyamayi nyamba garala khu gu lombelela, gasi a hi resela ndzadzi hi ta tadza dzikhali dzathu, kha hi na rereka gambe.”
32Judhite a di va hakha, khuye: “Upwani esi nyi mi embelago. Nyi na gira gilo gimwegyo gi na gu dundrugwago khu situgulwana nya mimelana yatshavbo. 33Wutshigu wowu, enu mu naya khala mudzinyangwani nya lidhoropa. Gasi eni nyi na duga ni githumi gyangu nya nyamayi, ndrani nya matshigu enu mu tumbisidego gu ningela lidhoropa mandzani ga valala vathu, Pfhumu Nungungulu a na tshudzisa Israyeli khu gyandza gyangu. 34Aholu, enu mu nga zami gutugula gikungo gyangu, kholu kha nyi na mi tulelani, kala nyi gu wuya na nyi vbedzide iso nyi vbwetago gu gira.”
35Uziya gumogo ni madhota va di mu embela, khavo: “Indra khu gurula, Pfhumu a na thange mbeli gwago, gasi a hi phodzela ga valala vathu.” 36Khavbo avbo, va di duga khu Tshatshani, muthu ni muthu a di hongola wulanga waye.
Currently Selected:
Judhite 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.