Judhite 7
7
GUPALA GA VAJUDHA
Gurandredwa gwa Bhetuliya
1Khu litshigu li landrelago, Holoferini, a di ruma masotshwa yaye ni vathu vatshavbo va nga dzi tshanganisago gwaye umo nya litunga, gukhuye va khuse lizumbo, va kongoma guya dhumela Bhetuliya, va tshika dzindzila dzi gwelago gigomoni, va dwanisa sanana sa na Israyeli.
2Litshigu lolo, vama vatshavbo va dinganago guya nyimbitunu, va di khuga va hongola. Libutho li di girwa khu tengo nya lizana ni livbandre na mavili magumi magumi mazana (170.000) vama nya gugimbile khu mawundru, lizana ni magumavili magumi mazana vama (120.000) nya gukhilele dzikavalu, nyamba sayela gidzemo nya gingi ngudzu nya masotshwa nya gugimbile khu mawundru, va nga bani va gu rwala ni gu sayisa sombo ni silo nya guhodze. 3Va diya ghova kovani, vbafuvbi ni Bhetuliya, bambe nya gifefe nya mati, va phalalega khu kova gukhugela Dhotani, kala Bhelibhayime khu guanama, gukhugela Bhetuliya kala Kiyamoni, gu khadego khu mbeli ga Esidhereloni.
4Avbo va na Israyeli va nga wonago mwandra watshavbo wule, va di thuruga ngudzu, va gu embeledzelana khu gyawe, khavo: “Olu, vathu vava, va na vbiyela litigo latshavbo, ambari sigomo nya gulaphe ngudzu, misele ni sigomwana kha si dzi kodzi gu va tiyela.” 5Hwane nya gu muthu ni muthu na dzegide matshari yaye nya litunga, va di khondrisa sikho makhokholani yawe, va gu khala va ghadha wutshigu wowo watshavbo.
6Khu litshigu nya wuvili, Holoferini a di dusa dzikavalu dzaye dzatshavbo aya dzi fodzisa mbeli ga sanana sa na Israyeli si nga bani na siri Bhetuliya. 7A khedzisa gwadi dzindzila nya gugwele khidzo dhoropani, a dzundrulugela sibuga satshavbo si nga bani si va ninga mati, a vega masotshwa malangani momo, uye wurumba waye, a bwelela ga libutho laye.
8Khavbo avbo, vathangeli vatshavbo va na Esawu, ni dzindruna nya nyimbi dza na Mowabhi, ni dzindruna dza bambe ni yiphwa va di hidzimela gwaye va mu embela, khavo: 9“Mune wathu, dzumela magana ma dugwana basi, gasi masotshwa yago ma si dugi na ma padwe. 10Khu lisine vathu vava va na Israyeli kha va tumbi ngudzu matshari yawe, aholu va gu tumba gulapha nya sigomo va vbanyago umo, kholu gu ngu garadza gu vboha kala dzitshokhatunu nya sigomo sawe. 11Khu guralo, olu uwe mune wathu, u nga dwani navo kha nga idzo hi olovedego khidzo umo nya mayunga, kharato, mwalo a na thegago vbakari nya vathu vago. 12Simama gu khala wulangani gwago, gira masotshwa yago yatshavbo nya nyimbi ma simama gu khala vbafuvbi nago, u rumela gukhuwe ethu sithumi sago hi wonelela umo nya sifefe nya mati dzitshinani nya gigomo, 13kholu khumo mule vavbanyi vatshavbo va Bhetuliya va regago umo mati. Avo va na dagarela khu lidora, va ningela lidhoropa. Khu gikhati gyogyo ethu gumogo ni vathu hi na gwela kala vbatshani dzitshokha nya sigomo, hiya ghova yoyo, hi ghadha, gasi gumba diga muthu a duga khu dhoropani. 14Khu guralo, avo gumogo ni vagadzi vawe ni sanana sawe, va na mbembiswa khu ndzala va si gu vbohedwi khu matshari, va na thegela dzindzilani dza malangani va vbanyago umo. 15Khu gikhati gyogyo, u na va livba khu guvivba, kholu avo kha va dzumela gu gu hakha khu gurula.”
16Magana yaya ma di tsakisa Holoferini gumogo ni dzindruna dzaye nya nyimbi, a di laya gukhuye si girega satshavbo iso si nga ganedwago. 17Khu guralo, masotshwa ya va na Amoni ma di hongola na ma gu bangaladzwa khu livbandre magumi magumi mazana (50.000) vama nya lifumbu nya Vaasiriya, va ya ghova kovani, va wandra madhamu ni sifefe nya mati sa va na Israyeli. 18Va na Esawu ni va na Amoni, va di gwela vaya ghova khu musigomoni mbeli ga Dhotani, va rumela vathu nya gukari va na gyawe va gimbila khu phuvbo ga Marandzi ni Khugadambo, khu mbeli ga Egerebheli, gu khalago vbafuvbi ni Khutshi mugitsongwanani ga Mokimuri. Gasi vatshavbo vambe nya masotshwa ya Vaasiriya va nga tshalago, va di ghova panini, va fenengedza litigo latshavbo. Mitshatsha, ni matshari yawe, si di phalalega malangani yatshavbo kha nga mafu; gu diri gidzemo nyamba kodza gu saywa.
19Va na Israyeli va di lombelela ga Pfhumu, Nungungulu wawe, na va vbede tshivba, kholu avo va di randredwe khu valala vawe, na va gu wona gukhavo yi mwalo ndzila nya guvbuluge vbakari gwawe. 20Masotshwa yatshavbo ya Vaasiriya, ayo nya gugimbile khu mawundru, dzikareta nya nyimbi ni vakhileli nya dzikavalu, va di randrela lidhoropa va simama umo kala magumararu na mana matshigu. Dzikhali dzatshavbo nya gutheledzele mati dza vavbanyi va Bhetuliya dzi vbela mati dzi khala maphanga; 21milambo yawe yi di phela guvbela mati, va hamuga ni mati nya gusele nya pimo va selago khu litshigu ni litshigu, kholu mati ma di pimedwa. 22Sanana sa beleni si di wondra, vanyamayi ni madzaha va di rereka khu lidora va thega mu dzindzilani ni dzinyangwani nya lidhoropa. Va di vbeledwa khu tshivba. 23Vathu vatshavbo, madzaha, vanyamayi ni sanana va diya tshangana ga Uziya ni ga vathangeli nya lidhoropa, va lombelela na va gu womba dzihuwa mbeli ga madhota, khavo: 24“Nungungulu a na khale mulamuli vbakari gwathu nanu, kholu enu mu giride gihoso nya gikhongolo ngudzu khu gumba lomba pwanano ni Vaasiriya! 25Olu mwalo a yelago gu hi phasa, kholu Nungungulu a hi rengiside a hi vega mandzani ga Vaasiriya, gasi hi thega na hi rerekide khu lidora mbeli gwawe hi dzegela gumbembisedwa muphelo. 26Khu guralo, va raneni mu va ningani lidhoropa latshavbo gasi li phangwe khu vathu va Holoferini ni masotshwa yaye yatshavbo. 27Gasi ethu, i tshukhwana hi khale pfimba waye. Hi na khala dzikhumbi dzaye, aholu hi na vbanyisa womi wathu, gasi hi si woni sanana sathu na si gufa mbeli gwathu, ambari gu wona vagadzi vathu ni madzaha yathu na va gu sala kala va hegisa gudagata, vafa. 28Hi ngu lombelela kha nga dzifakazi khu mahungu yanu, ndzadzi ni mafu ni Nungungulu wathu ni Pfhumu ya vababe vathu, a na hi lamule gukhedza khu sighoho sathu ni gukhedza khu milandru ya vababe vathu, gasi a si dzumedzisi si girega muhuno iso mu ganelago!”
29Khu vbakari nya tshangano gu di pwala huwa nya yikhongolo ngudzu. Khu gumogo vatshavbo va di lombelela ga Pfhumu Nungungulu khu lito nya gukhugege. 30Uziya, a di va embela, khuye: “Timiselani vandruye! Hongoleni hi lirele gambe kala livbandre matshigu, avbo Pfhumu Nungungulu a na wuyisago wuhindzi waye avbo gwathu, kholu, Uye gima kha na nga hi digela muphelo. 31Aholu ndrani nya matshigu yoyo a gumba hi resela giphaso gyaye avbo gwathu, avbovbo, nyi na gira iso mu ganelago.” 32Khu gulandrela, a di phalalegisa vathu vatshavbo malangani yawe nya litunga, avo va di hongola khu phuvbo ya makhokholatunu, numo nya dzilangwe nya lidhoropa, va rumela vanyamayi ni sanana va hongola dzindrangani gwawe. Dhoropani gwatshavbo gu di tala khu wusiwana.
Currently Selected:
Judhite 7: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.