Judhite 6
6
Akiyori a ngu ningedwa ga Israyeli
1Avbo li nga vbelago ligwaha nya vathu va nga bani va randrede huwo, Holoferini, muthangeli nya khongolo nya masotshwa ya Vaasiriya, a di embela Akiyori ni va na Mowabhi vatshavbo mbeli ga masotshwa nya gute khu mambe mayigo, khuye: 2“Gasi khuwe mani uwe Akiyori, khenu va mani enu, vathu va rengisidwego va Efrayimi, nya gukala mu profeta vbakari gwathu kha nga idzo mu ngari gu girago muhuno, gu hi embelani gukhenu hi si dwani ni va na Israyeli, kholu Nungungulu wawe a na va vhikela? Khu mani nungungulu vbavbandze ga Nabhukodhonosori? Uye a na rumela masotshwa yaye gasi guya va fuvisa mafuni momu, ni Nungungulu wawe kha na dzi kodza gu va vbanyisa.” 3Gasi ethu sithumi sago, hi na va pala gukhwatshi ha gu dwana ni mwama moyo basi, avo kha va na dzi kodza gu tiya va ema mbeli nya tshivba nya dzikavalu dzathu. 4Hi na va vbisa, ni sigomo sawe si na lewa khu novba wawe, mahangeni gwawe gu na fenengedzwa khu sirumbi sawe. Kha va na tiya gu ema mbeli gwathu. Va nafa vatshavbo khu mafelo nya tshanisa. Ganede kharati mufumeli Nabhukodhonosori, mune nya litigo latshavbo; Uye kha ganela mahala.
5Khu guralo, uwe Akiyori, gighevenga nya guthodwe, wa na Amoni, u nga tiyago gu ganela magana yaya nya wulogovedzi, kha wu na tshukha u wonide gambe khovbe yangu, gukhugela litshigu la muhuno, kala litshigu nyi na gu dzi phodzelago ga lifumbu leli li nga thavago khu tigoni ga Egipito. 6Khavbo avbo, u na songwa khu litshari ni sighalala sa masotshwa yangu, u na thega gumogo ni vale va na bayiswago, avbo nyi na gu wuyago. 7Sithumi sangu si na gu dzega si gu yisa kala tigoni nya sigomo, si ya gu vega ga limwedo nya madhoropa ya dzibambe gakone, 8uwe khu na ngafa kala ufa gumogo navo. 9“Khu monyoni gwago, u na vbisega na wu gu suva gukhuwe va si modwi, aholu eni nyi ganede, ni limwedo basi nya magana yangu kha li na dzimela.”
10Khavbo avbo, Holoferini, a di leletela sithumi saye si nga bani na siri tshatshani, khuye va dzege Akiyori, va mu yisa Bhetuliya, va mu ningela ga sanana sa Israyeli. 11Sithumi si di mu mola si mu dusa vbavbandze nya lithembwe khu ndzila nya guye panini. Khu gulandrela, va di vbindra panini va thonona sigomoni, va vboha kala milamboni ya kovani, vbavbatshi ga Bhetuliya. 12Avbo vathu va dhoropani li vbahidwego vbatshani nya gigomo, va nga va wonago, va di dzega matshari, va duga khu dhoropani vama vatshavbo na vari ni sibhalakatsa, va di va himbedzela gu gwela gigomo, khu gu va rinyela siwindri. 13Aholu, avo va di dzi vhikela khu gu tshiredzwa khu gigomo, kala va gu hunga Akiyori va mu diga vbavbatshi nya gigomo, va bwelela va wuya ga mune wawe.
14Avbo va na Israyeli va nga relelago khu mugigomoni, va dita mu mana, va mu tshula, va mu yisa Bhetuliya, va ya mu bikela ga vathangeli nya lidhoropa. 15Khu gikhati gyogyo, vathangeli va diri ava: Uziya, mwamana wa Mika, nya lihundzo la Simiyoni ni Kabiri mwamana wa Gotoniyeli ni Karimi, mwamana wa Malakiyeli. 16Va di ramba madhota yatshavbo ya dhoropani, sanana sawe satshavbo gumogo ni vagadzi vawe va hongola tshanganotunu. Akiyori va di mu vega vbakari nya vathu vatshavbo, a wudziswa khu Uziya, mayelano khiso si nga mu dugelela. 17Uye a di va hakha, a va embeledzela satshavbo iso huwo ya Holoferini yi hungidego ni gu funga. Satshavbo iso uye kamwe a nga ganelago vbakari ga vathangeli va sanana sa Asuri, gumogo gambe ni magana nya gu dzi khusedze ya Holoferini, nya gukanyise ndranga ya Israyeli.
18Khavbo avbo, vathu va di khidzima va noga, va khozela Pfhumu Nungungulu, va lila va ganela, khavo: 19“Pfhumu Nungungulu wa ndzadzini, wona matshandza yawe, u pwela gisiro vathu va na gyathu va hembuludwago. Litshigu la muhuno, wona dzikhovbeni ga vale va phasedwego Uwe!” 20Khu gulandrela, va di tangadzisa Akiyori gumogo ni gu mu zundza, va mu bonga khu tshivba. 21Uziya a di mu dzega khu vbatshanganotunu a hongola naye gaya gwaye, aya dongisela buzo nya gugirele madhota. Va vbedzide wutshigu watshavbo na va gu lombelela guphaswa khu Nungungulu wa Israyeli.
Currently Selected:
Judhite 6: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.