Judhite 16
16
Ndzimo ya Judhite
(Valamuli 5:2-21)
1Judhite a di ganela, khuye: Bongani Nungungulu wangu khu dzingoma ni sitshatsharo;
embelelani ga Pfhumu, ndzimo nya yiphya,
mu khusedzeni ni gu huwelela lina laye.
2Kholu Nungungulu, khuye Pfhumu a vbedzago dzinyimbi.
Kholu a nyi wuyiside nyaluphye wughoveloni, vbakari nya vathu vangu, a nyi wandride mandzani ga avo va nyi lundrago.
3Vaasiriya va dita khu sigomoni sa Wuronga
ni talo nya vadwani vawe nya nyimbi.
Mabutho yawe ma di bangisa mati nya sitsongwana,
ni dzikavalu dzawe dzi di fenengedza sigomwana.
4Muasiriya a di sambanya gu vbisa litigo langu,
ni gu sasela madzaha yangu khu matshari,
ni gu gikha vbavbatshi sanana sangu sa ngosini, sanana sangu a si gira sibotshwa,
ni gu dzega vanyamahegyane vangu nya makendzi a va yisa wugumbitunu.
5Aholu Pfhumu nya Tshivba Yatshavbo a mu bayiside,
a mu ningela mandzani ga nyamayi, a pidwa khuye hungo.
6Muthangeli wawe kha thegela mandzani ga madzaha nya gudwane nyimbi,
gambe khandri dzindrena mwendro vadandrangulu,
va nga mu thesago,
aholu khu Judhite, nyamahegyane wa Merari,
a mu fuvisidego khu wumburi nya khovbe yaye.
7A di tshula ngandzu yaye nya gilendra,
a ambala dzingandzu nya mibuzo,
gasi gu ninga wudhumo va na Israyeli.
8A di phorodza khovbe yaye khu mafura,
a hunga ndzudzu waye khu gihugu nya wuzundzo,
a ambala ngandzu nya seda, gasi gu mu vbedza mapimo. 9Silato saye si di vbandza maho yaye;
ni wumburi waye wu di tshanisa hefemulo waye, ni litshari laye li di mu pila hungo!
10Vaperisiya va di ndrendremela khu wugengeli waye,
gasi Vamedhiya va di garadzega khu gutiya gwaye. 11Khu kharato, vanyagusolega vangu,
va di womba dzihuwa nya nyimbi,
vathu vangu nyambana tshivba, va di laledza,
valala va di ndrendremela,
va di khusedza malito yawe,
valala va khala hwanga.
12Va di bayisedwa gukhwatshi sanana sa vanyamayi nyambana lisima,
va gu songwa kha nga sanana nya vathu va thavago.
Va songidwe litungani, va mbemba mbeli nya mabutho ya Pfhumu yangu.
13Nyi na emba ndzimo nya yiphya ga Nungungulu wangu, Pfhumu, Uwe u khongolo nuri ni wudhumo.
U na ni tshivba yi samadzisago nyamba padwa. 14Sivangwa sago satshavbo si na gu thumele,
olu u nga ganelago, iso si girega.
U si wumbide u si thela liphuvbo lago,
mwalo a tiyelago lito lago.
15Tshivba nya mati yi di sigulela sigomwana malangani yawe, ni
siwindri si di nyiviliga kha nga nyedzi mbeli gwago.
Aholu uwe u na simama
gu yeyedza wuwadi wago
ga vale va gu ningago githawo. 16Kholu kha yi phasi gilo miphaselo yatshavbo
ni miningelo nya mahema nya gusalalegise,
ni mafura yaye nya guvbiswe, kha ma phasi gilo.
Aholu uye a ningago githawo Pfhumu,
a na khusedzwa gikhati gyatshavbo.
17Libango ga mayigo ma nga wugelago vathu vangu!
Kholu Pfhumu Nungungulu nya Tshivba Yatshavbo
a na va phodzela litshiguni nya gulamudwe,
a na va rumela nilo ni siwungu nyamani gwawe,
avo va na lila khu gupwa wuvi nyamba hegisa.
Mahegiso nya matimo ya Judhite
18Avbo va nga vbohago Jerusalema, va di khozela Nungungulu. Hwane nya gu vathu na va dzi agiside, va di ningela miphaso yawe nya guvbiswe, ni miningelo yawe nya wadwa ni yimbe miningelo. 19Judhite a di phasela ga Pfhumu sombo satshavbo sa Holoferini, esi vathu va nga mu ningago, gumogo gambe ni myendra nya makhuvi a nga yi dusago khu nyumbani, gasi gu yi lumba uye. Isoso niso a di si phasela ga Pfhumu kha nga ningelo nya gisambanyo. 20Vathu vatshavbo va di nengela dhoropani ga Jerusalema gipimo nya migima miraru, na vari nyumbani nya miphaso, Judhite nuye a di simama gu khala navo. 21Khu hwane nya gikhati gyogyo, vathu va di bwelela dzindrangani gwawe, ni musipetoni gwawe, gasi Judhite, a di bwelela Bhetuliya, aya khala petoni gwaye, a di zundzwa khu vathu nya vangi va tigoni gwatshavbo, matshigu yatshavbo nya guvbanye gwaye. 22Vama nya vangi va di gu gola gu dzegana naye, aholu uye a di bomba a simama gu khala noni matshigu yatshavbo nya guvbanye gwaye, gukhugela litshigu a nga fedwago khu mwama waye Manasi aya patana ni valongo vaye. 23Uye a diya mbeli khu gupwala ndruma, a vbanya myaga nya yingi nyumbani ga mwama waye, kala a enedza tanga nya lizana ni livbandre (105) myaga. A di tshula khumbi yaye yi hongola.
Fede dhoropani ga Bhetuliya a dzingwa thowoni ga mwama waye, Manasi. 24Va na Israyeli va di mu lila gipimo nya livbandre na mavili matshigu. Na si gufi, a di kabanisela thomba yaye ga valongo va mwama waye Manasi, gumogo ni ga valongo vaye nuye.
25Aholu gikhati gyatshavbo nya guvbanye ga Judhite, ni myaga nya gulaphe hwane nya gu na fude, mwalo ni moyo a nga tiya gu dwanisa va na Israyeli.
Currently Selected:
Judhite 16: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.