Judhite 15
15
Gupadwa ni guthava ga Vaasiriya
1Na va pwide esi avo va nga bani vari mitshatshani, va di hambanega mapimo khu esi si nga dugelelago. 2Va di tedwa khu hwanga nya wukhongolo ngudzu, avbo va nga phela gundrendremela ni gumba vbweta gukhavo muthu ni muthu a khale vbafuvbi ni muthu kwawe. Va di phalalega va thava, muthu ni muthu khu ndzila yaye, va tutuma khu dzindzila dzatshavbo nya lipani nidzo nya litigo li khadego sigomoni. 3Ni vale gambe va nga bani va ghovide khu mugigomoni, bambe ga Bhetuliya va di tutuma navo.
Khavbo avbo, va na Israyeli ni vatshavbo vadwani nya litunga, va di va lundra. 4Uziya a di rumela myango madhoropani ya Bhetomesitayini, Bhebhayi, Kobhayi, Kola ni tigoni gwatshavbo gwa Israyeli, gasi guya tivisa iso si nga dugelelago, ni gu lomba vatshavbo gukhuye va sasela valala gasi gu va fuvisa. 5Avbo va na Israyeli va ngapwago esi, vatshavbo va di dzegela gu khuga khu gumogo va gu va lundra kala Koba. Gu dita gambe ni avo va nga bani na vari Jerusalema ni gipandre gyatshavbo nya sigomo, kholu va di tivisidwe iso si nga dugelelago wughoveloni ga valala vawe. Gu dita gambe ni avo va nga bani na vari tigoni ga Gileyadhi ni Galileya guta va phasedza, gu sasela gu diri gukhongolo gu nga endrelega kala khisikheyi ga Dhamasiko ni mivbinganoni gwaye. 6Avo va nga tshalago nya vavbanyi va Bhetuliya, va diya pomela wughoveloni ga Vaasiriya, va wu phanga va dzega dzithomba nya dzingi. 7Avbo va na Israyeli va nga wuyago khiyo nya gusasele, va dita dzega satshavbo iso si nga tshidwago. Vathu va madhoropani ni mitalalani ya musigomoni ni ya panini, va di mana navo gipandre nya gingi nya iso nya guphangwe, kholu gu diri ni dzithomba nya dzingi ngudzu nyamba dzi kodza gu dzi saya.
8Muphasi nya khongolo nya mhamba, Jowakimi ni huwo nya madhota ya na Israyeli, ni vavbanyi va Jerusalema, va dita gasi guta wona wuwadi wa Pfhumu Nungungulu a giredego va na Israyeli, ni guta wona Judhite va ganela naye ni gu mu losa. 9Na va vbohide vbafuvbi gwaye, vatshavbo va di mu losa khu gumogo va mu embela, khavo:
“Uwe khuwe rungudzo wa Jerusalema,
litsako nya likhongolo la Israyeli,
uwe khuwe wuzundzo nya wukhongolo nya litigo lathu.
10U giride satshavbo sesi khu mandza yago,
u girela wuwadi va na Israyeli
ni Nungungulu a ngu tsakiswa khiso.
A na gu kategise Pfhumu,
Nungungulu nya Tshivba Yatshavbo,
khu gupindruga ni gupindruga.”
Vathu vatshavbo va di hakha, khavo:
“Amen!”
11Vathu vatshavbo va di phanga wughovelo gipimo nya magumararu matshigu. Va di luva Judhite khu tshatsha wa Holoferini, ni parata yaye yatshavbo, malawu yaye, sombo saye satshavbo ni silo saye satshavbo. Uye a di dzega satshavbo, a si rwegisa vbaburutunu, a wungedzela satshavbo a vbagela dzikaretani. 12Vanyamayi vatshavbo va na Israyeli va di tombana gasi guta mu wona ni gu mu bonga. Vambe va di hana mbeli gwaye. Uye a di lugela dzitshimbo nya matamu a ningela ga vanyamayi va nga bani na vari vbale. 13Vatshavbo vanyamayi va di ambala sihugu nya mahagane nya miolivha hungoni. Judhite a di thanga mbeli ga vathu vatshavbo, na gu hana, a thuledzela uye dzindzimo dza vanyamayi.
Vama vatshavbo va na Israyeli va di va landrela, na va vbagaride matshari yawe, na va ambade dzitshimbo nya senge hungoni, na va gu embelela dzindzimo nya rungudzo. 14Khu gikhati gyogyo, Judhite a di thula ndzimo yeyi nya gubonge vbakari ga va na Israyeli vatshavbo, a khusedza lito khu tshivba a pwadza rungudzo yoyu.
Currently Selected:
Judhite 15: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.