Judhite 14
14
Va na Israyeli va ngu dhumela Vaasiriya
1Judhite a di va embela, khuye: “Vandriyangu, nyi yingiseni, dzegani hungo wowu mu wu vbayega vbatshani nya ndzari nya libhiyo lanu.” 2Avbo gugyago, gukhugani nya lidambo, vama vatshavbo nya dzindrena va na dzege matshari yawe, va duga khu dhoropani. Emisani muthangeli, mu gira gukhwatshi mwa guvbweta gu relela muya panini guya dhumela tsawa nya guthange wa Vaasiriya, aholu mu nga relelini. 3Khavbo avbo, avo va na dzega matshari yawe va tutuma guta mulitungani, va na wusa dzindruna nya nyimbi dza Vaasiriya, avo va na tutumela guya tshatshani wa Holoferini, va guya mu hamuga va na taledwa khu hwanga, va tutuma mbeli gwanu va mi thava. 4Enu ni vatshavbo va vbanyago ndrani nya mivbingano ya Israyeli, mu na va lundra mu va tshikhela ndzila va thavago khiyo.
5Aholu, na mu si gu giri isoso, nyi reseleni avba mbeli gwangu Akiyori, wa na Amoni, gasi a ta muti ni gu wona mwama a nga hembulula ndranga ya Israyeli, a nga mu rumelago avbo gwathu na gu pimisa gukhuye a na ta songwa.
6Khavbo avbo, va di rumela guya ranwa Akiyori ndrangani ga Uziya. Avbo Akiyori a nga belago a wona hungo wa Holoferini mandzani ga moyo nya vathu va tshanganoni , a di thega khu khovbe mafuni a titivala. 7Avbo va nga mu wusago, a di dzi thesa migondroni ya Judhite, a khidzima mbeli gwaye a ganela, khuye: “U kategide uwe vbakari nya litigo latshavbo la Judha, ni vbakari nya mayigo yatshavbo! Avbo va na gupwago gu ganedwa khu lina lago, va na thuruga. 8Gasi olu, nga nyi embela u giriside kharini satshavbo sesi, khu matshigu yaya?” Judhite, na emide vbakari nya vathu, a di mu embeledzela satshavbo iso a nga girago, gukhugela litshigu a nga khugago khilo, kala gikhati a nga bani na gu ganela navo. 9Gikhati a vbedzidego gu ganela, vathu va di phela gu huwelela khu lito nya gukhugege, gu di pwala mikulungwane nya gutsake dhoropani gwatshavbo. 10Avbo Akiyori a si tidego satshavbo iso Nungungulu wa Israyeli a giridego, a di khodwa khu guvbelela ga Nungungulu, a gu hana wugwera a dzi tshanganisa ga vathu va na Israyeli, a mana ndranga yaye lifumboni la na Israyeli kala na muhuno.
11Gukhugani nya lidambo, va di vbayega hungo wa Holoferini ndzarini nya libhiyo, vama vatshavbo va di dzega matshari yawe va duga, vatshavbo na va kabanisedwe khu sikwata, khu sindzilana sa gigomoni. 12Avbo Vaasiriya va nga va wonago, va di rumela guya tivisa dzindruna. Avo va diya bhasopisa dzindruna nya dzikhongolo ni vathangeli nya sikwata nya likhumi mazana (1.000) vama ni vathangeli vawe vatshavbo. 13Khu gulandrela, va diya tshatshani gwa Holoferini va ya embela muthangeli nya mithumo yaye yatshavbo, khavo: “Wusa mune wathu, kholu dzikhumbi dzi tiyede gurelela kala eno gwathu gasi guta hi dwanisa va fela gumbemiswa vatshavbo kala muthu nya guhegise.”
14Bhagowa a di bela a khokhotha makhuvini nya tshatsha, kholu a di gu pimisa gukhuye Holoferini a di nga lade ni Judhite. 15Avbo a nga mbapwa muthu, a di funungula makhuvi a bela nyumbani, aya mu mana na fude, na thegide vbavbatshi, na pidwe hungo. 16Bhagowa a di khusa lito a laledza, na gu wombeledzela dzihuwa ni gulila khu tshivba, a di pferula dzingandzu dzaye, kha nga giwonegiso nya wuvi waye. 17Khu hwane a di bela tshatshani a nga yela nari umo Judhite, aholu kha ngaya mu mana. Khavbo avbo, a di tutuma guya avbo va nga bani na va romo avbo vathu, na gu womba huwa, khuye: 18Dzikhumbi dzile nya vanyamayi dzi hi wugede! Nyamayi moyo basi nya Muhebheru, poyide ndranga ya mufumeli Nabhukodhonosori. Wonani! Holoferini thegide, mwalo gambe hungo! 19Avbo dzindruna nya nyimbi ya Vaasiriya va ngapwago esi, va di pferula dzingandzu dzawe, va garadzega ngudzu mihefemuloni gwawe, gulila ni dzihuwa dzawe, dzi di phalalega panini gwatshavbo.
Currently Selected:
Judhite 14: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.