Judhite 13
13
Judhite a ngu pila hungo wa Holoferini
1Avbo gu ngahwa lidambo, dzindruna dzaye dzi di vbiredzela gu khuga dzi hongola. Bhagowa a di sega makhuvi nya tshatsha khu phuvbo ga vbavbandze, a ndreyisa vatshavbo va nga bani na vari mbeli ga mune waye, vatshavbo va hongola vaya lala. Avo va di garade ngudzu, kholu va di sede guvbindra pimo. 2Judhite a di tshala enga tshatshani ni Holoferini a nga bani na dzi ladzide vbadawutunu gwaye, na padwe khu wadwa nya vhinya.
3Judhite a di embela githumi gyaye khuye gi khale khu vbavbandze gi khedzisela ndzila nya guduge khiyo, kha nga a nga bani nari giolovedzo gyaye gu duga a hongola guya lombelela. Uye a di embede Bhagowa khu mahungu yoyo ya mamowo. 4Vatshavbo va di khuga vbafuvbi gwaye, gukhugela avo nya vadugwane kala ni avo nya vakhongolo, mwalo a nga tshalago makhuvini. Judhite a di ya ema khu bambe nya lidawu la Holoferini, a ganela khu monyoni gwaye, khuye: “Pfhumu, Nungungulu nya Tshivba Yatshavbo, wona thumo nya mandza yangu ga gikhati gegi gasi gu rungudza lidhoropa la Jerusalema. 5Khigyo egi gikhati nya gusayise thomba yago ni gu gimbidzisa gikungo gyangu, nya gumbembise valala va nga hi wugelago.” 6Khavbo avbo, a di hidzimela mihungotunu nya lidawu, vbafuvbi ni avbo wu nga bani wu romo hungo wa Holoferini, a di dzega litshari laye li nga bani li vbayegidwe vbale, 7a hidzimela vbadawutunu, a mu phara khu ndzudzu a ganela, khuye: “Pfhumu, muhuno nyi ninge tshivba, uwe Nungungulu wa Israyeli.” 8Khu gulandrela a di mu koka guvili ngoloni khu tshivba yaye yatshavbo, a mu pila hungo; 9a reda givili gyakone vbadawutunu, a dusa myendra nya makhuvi khavbo nya sivbayego nya madingo. Hwane nya gikhati nya gukari, a di duga a ningela hungo wa Holoferini ga githumi gyaye nya nyamayi, 10gi wu thela umo nya saku yaye nya dzimbuva.
Khu hwane va di duga vatshavbo gumogo kha nga a nga bani nari giolovedzo gyawe, nya guye gira nombelo. Va di vbindra khu vbakari nya lizumbo, va dzundruluga gigomo, va ya gwela gigomo gya Bhetuliya, vaya vboha dzinyangwani nya lidhoropa.
11Judhite a di embela vawoneleli nya dzinyangwa, na ngari khu hwindzo, khuye: “Tulani, tulani lidimba! Pfhumu, Nungungulu wathu, a na ni ethu, gasi gu yeyedza wufumu waye tigoni ga Israyeli, ni tshivba yaye ga valala, kha nga idzo a giridego muhuno.”
12Avbo vama va dhoropani va ngapwago lito laye, va di relela khu guvbiredza nyangwatunu va ramba madhota ya dhoropani. 13Va di tutuma vatshavbo, vakhongolo ni vadugwana, kholu va di si tumbi ni gu alakanya gukhavo a na wuya. Va di tula lidimba va gu va hakha, va di khondrisa nilo va kodza gu mu wona, va tshangana vatshavbo va va randrela. 14Uye a di khusa lito a ganela khu tshivba, khuye:
“Bongani Pfhumu, mu bongeni,
bongani Nungungulu a si divaledwigo
khu wuhindzi waye,
khu kotani nya nyumba ya Israyeli,
aholu a mbembiside valala vathu
wutshigu wowu khu mandza yangu.”
15Khavbo avbo, a di dusa hungo khu sakuni, a va yeyedza a va embela, khuye:
“Wonani, owu khu hungo wa Holoferini, ndruna nya nyimbi ya Vaasiriya, wonani gambe ni myendra nya makhuvi a nga bani na lade avbo, na levide. Pfhumu Nungungulu a mu songide khu mandza ya nyamayi. 16Nyi ngu sambanya avbo gwanu khu Nungungulu a vbanyago, a nyi sayisidego lipfhumbani gwangu, gukheni khovbe yangu yi nga mu vbandza gukala aya gumbembani, nyamba tshukha a nyi thela dzitshoni ambari gu nyi nyenyezisa khu gughoha naye.”
17Vathu vatshavbo va di liwuga, va khidzima khu mazolo, va khozela Nungungulu, va ganela khu lito limwedo, khavo: “U na bongwe, uwe Nungungulu wathu, u mbembisidego muhuno valala va vathu vago.”
18Uziya a di ganela, khuye:
“U kategide uwe, mwanangu,
khu Nungungulu a Khusegidego Ngudzu,
u vbindrago vanyamayi vatshavbo va mafuni,
a na bongwe Pfhumu Nungungulu, muvangi nya ndzadzi ni mafu,
khuye a gu hetedzidego,
gasi guya pila hungo wa muthangeli
wa valala vathu.
19Gitumbo gyago kha gi na duga
myonyoni nya vathu,
avbo va na gu dundrugago tshivba ya Nungungulu
kala gupindruga.
20Nungungulu a na gu gire u khusedzwa gikhati gyatshavbo
u tala khu makategwa yaye,
kholu kha wa bomba gu ningela womi wago
khu tshanisa nya lifumbu lathu,
aholu u phodzede gumbembiswa gwathu,
u gimbila khu ndzila nya gululame,
mbeli ga Nungungulu wathu.”
Vathu vatshavbo va di hakha, khavo:
“Amen!
Amen!”
Currently Selected:
Judhite 13: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.