Judhite 11
11
Holoferini a ngu hakha Judhite
1Holoferini a di mu embela, khuye: “Nyamayi u nga thavi, nyi tumbe, kholu eni gima nyi si gu gireli guvivba ga muthu a dzumelago gu thumela Nabhukodhonosori, mufumeli wa mafuni gwatshavbo. 2Naripwani vathu vago va vbanyago malangani ya sigomoni, kha va nga nyi yeyisa, eni nya sa khusa litshari nyi va wugela. Aholu avo khavo va nga dzi girela vabune silo sesi. 3Olu, nga nyi embela, gasi khu ginani u va thavidego uta avba gwathu? Rula, kholu wutshigu wowu u na vbanya kala ni mambe matshigu matago mbeli. 4Mwalo a na gu girelago guvivba, aholu u na sayisega gwadi, kha nga idzo si giregago ga avo va thumelago mune wangu, mufumeli Nabhukodhonosori.”
5Judhite a di mu hakha, khuye: “Dzumela gupwa magana ya githumi gyago, dzumedzisa gukhuwe githumi gyago gi ganele mbeli gwago gasi eni kha nyi na ganela malipha ga mune wangu wutshigu wowu. 6Uwe wa gu landrisa magana ya githumi gyago, Pfhumu Nungungulu a na gira gitumbiso nya gukari, khavbo gwago uwe, mune wangu, u na dugelela ga makungo yago yatshavbo. 7Nyi ngu sambanya khu womi wa Nabhukodhonosori, mufumeli wa mafuni gwatshavbo, khu tshivba yaye a gu rumedego guta fumela sivangwa satshavbo nya guvbanye, khu kotani yago, khandri vathu basi va mu thumelago, aholu ambari ni sirengo sa khabini ni sinyoni sa ndzadzini si na vbanya khu tshivba yago thumoni ga Nabhukodhonosori ni ndranga yaye yatshavbo. 8Ethu hi pwide gu ganedwa khu guti ni mapimo yago, litigo latshavbo la gu ganela khilo khuwe basi u gu wadi mufumoni gwatshavbo, khu tshivba nya guti gwago nya gusamadzise, khu wugengeli nya gugimbidzise dzinyimbi. 9Gasi khu mahungu ma ganedwego khu Akiyori huwoni nya madhota yago, ethu hi si pwide iso a ganedego, kholu vathu va Bhetuliya va di mu vbulugisa, uye a di va embeledzela satshavbo iso a ganedego mbeli gwago. 10Khu guralo, mune ni muhevbudzi wangu, u nga divaledwi khu magana yaye, ma vegedze monyoni gwago, kholu khya lisine. Kholu lifumbu lathu, gima kha li na nga tsayiswa ambari gu songwa khu litshari, vbavbandze nya gu avo na va ghohede Nungungulu wawe.
11Aholu, uwe mune wangu, gasi u si padwi, u si bweleli liphanga, avo va na thegedwa khu lufu, kholu, avo va giride gighoho, kha nga olu va nga gorosago Nungungulu wawe, khu gu gira iso va ngamba yela gu gira. 12Kha nga olu va gu mwalo guhodza, ni mati ma engedzelago gu hamugega, avo va giride gikungo nya gusonge mitshambi yawe yatshavbo nya dzimombe ni gu hodza satshavbo iso Nungungulu, a va himbedzedego gu hodza umo nya milayo yaye. 13Mihandro nya guhegule nya mavbila, mihengo nya likhumi nya wadwa ni mafura, va nga bani va si vegide ni gu si sayisa, gasi gu ningela ga vaphasi nya mhamba, va guromo Jerusalema vbafuvbi ni Nungungulu wathu. Avo va fungide gu hodza satshavbo, iso si himbedzedwago, a gu mwalo ni moyo vbakari nya vathu a gu ni fanelo nya gu si kuhe khu mandza.
14Avo va di rumela vama Jerusalema, kholu ambari avo va vbanyago iyoyo, va ngu gira navo isoso, gasi guya ninga gitiviso gegi nya gu va gira navo. 15Avbo gitiviso gegi gi na gu va vbohelago, va phela gu gira esi, khu litshigu lolo kamwe va na dzegela gu ningedwa va mbembiswa. 16Khiso esi si nga gira gu eni githumi gyago, avbo nyi nga si pwago, nyi thava vbakari gwawe. Nungungulu a nyi rumede gasi guta pwadza avbo gwago, silo si na gu samadzisago litigo latshavbo, vatshavbo va na si pwago na gu ganedwa khiso. 17Kholu eni, githumi gyago, nyi mukhodwa, nyi ngu thumela Nungungulu wa ndzadzini wutshigu ni mihani. Khu guralo, mune wangu, eni nyi na khala nago. Aholu matshigu yatshavbo vbawutshigutunu, githumi gyago gi na relela kovani gasi guya lombelela ga Nungungulu, Uye a na nyi embela litshigu va na gu bani va giride gighoho gyawe. 18Khavbo avbo, nyi na wuya nyita gu embela gasi u duga ni libutho lago latshavbo, mwalo wa vbakari gwawe a na gu tiyago gu ema mbeli gwago. 19“Khu hwane, nyi na gu gimbidzisa khu tigoni ga Judheya kala u vboha Jerusalema. Nyi naya tiyisa mufumo wago vbakari nya lidhoropa, uwe u na va gimbidzisa kha nga tshambi nyambana muhavisi, kha gu na manega ambari yimbwa mweyo yi na gu tulago likana gasi gu gu huhula. Nyi di tuledwa guti satshavbo sesi si si gu giregi, nyi tivisidwe, nyi gu rumedwa gasi guta gu tivisa silo sesi satshavbo.”
20Magana yaya ya Judhite ma di tsakisa Holoferini ni vatshavbo vathumegeli vaye, avo va di samadziswa khu guti gwaye. Va ganela khu gyawe, khavo: 21“Gukhugela mahegiso kala mambe mahegiso nya litigo, mwalo mumbe nyamayi nya nga oyu, khu wumburi, ni guti nya gukodze gu ganela!” 22Holoferini a di mu embela, khuye: “Nungungulu giride gwadi a nga gu rumela u thanga mbeli ga vathu, gasi guta ninga mandza yathu tshivba nya gupale ni gu ninga gumbembisa vale va kanyisago mune wangu. 23Uwe khandri u di mbura basi khu giyemo ni khovbe, aholu khu guti nya gukodze gu ganela, wa gu kala u gira satshavbo kha nga idzo u ganedego, Nungungulu wago a na bani ari Nungungulu wangu neni, uwe u na khala nyumbani ga mufumeli Nabhukodhonosori u na pwala ndruma tigoni gwatshavbo.”
Currently Selected:
Judhite 11: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.