Valamuli 17
17
Mika ni gifananiso gya ndrangani gwaye
1A diromo mwama moyo nya gupwani khu Mika wa gigomoni gya Efrayimi, 2a di ganela ga mayi waye, khuye: “Gyuma nya likhumi na limwedo mazana (1.100) singerengere nya parata u nga bani u wandredwe u nga kala u ganela guvivba khu kotani nya igyo, kheni nyi gu nagyo.” Khavbo avbo, mayi waye a di mu embela, khuye: “Pfhumu Nungungulu a na gu kategise, mwanangu.”
3Khu guralo, Mika a di bweledza singerengere sile nya likhumi na limwedo mazana (1.100) ga mayi waye; aholu mayi waye a di mu embela, khuye: “Khu mandzani gwangu, nyi ngu ningela gyuma gegi ga Pfhumu Nungungulu khu gipandre gya mwamana wangu, gasi gu gira gifananiso nya guvatwe, olu, nyi ngu gi bweledza gambe iyo gwago.”
4Khu guralo, Mika a di bweledza singerengere sile nya parata ga mayi waye, gasi uye a dusa mazana mavili singerengere nya parata aya si ningela ga mupfhuli a gira khiso gifananiso nya guvatwe nigyo nya gupfhudwe, gi ya khala nyumbani ga Mika.
5Mwama yoyu nya gupwani khu Mika, a diri ni nyumba nya vanungungulu, a di dzi girela efodhe ni dziterafine, a phasela moyo nya sanana saye, gasi a khala muphasi nya mhamba. 6#Wona gambe: Val 21:25. Khu gikhati gyogyo, gu diri mwalo mufumeli tigoni ga Israyeli, muthu ni muthu a di gira iso si nga bani si tsakisa maho yaye ni gu gola gu si gira.
7Gu diromo lidzaha limwedo nya Mulevhi nya gudugele Bhetlehema ga Judha, nya lihundzu la Judha, uye a di luvede mule. 8Mwama yoyu, a di rura khu dhoropani ga Bhetlehema wa Judha gasi gugimbila a luvela umo a nga gu golago. Vbakari nya lipfhumba laye, a di vboha gigomoni gya Efrayimi, ndrangani ga Mika.
9Mika a di mu wudzisa, khuye: “Wa guta khu hayi?” Uye a di hakha, khuye: “Nyi Mulevhi nya gute khu Bhetlehema ga Judha, nya gu gimbila nyi vbweta wulanga nya guvbahe umo, avbo nyi na gu golago.”
10Khavbo avbo, Mika a di mu embela, khuye: Khala ni eni, u na khala babe wangu ni muphasi wangu nya mhamba, khu mwaga ni mwaga nyi na gu ninga likhumi singerengere nya parata, guambala ni gu gu hodzisa. Mulevhi a di bela.
11Mulevhi a di nengela khu gu khala ni mwama yoyu, lidzaha leli li di khala nga gyanana gyaye. 12Mika a di emisa lidzaha leli gu khala muphasi nya mhamba, li khala ndrangani ga Mika. 13Khavbo avbo, Mika a di khuye: “Olu nyi ngu dziti nya gukheni Pfhumu Nungungulu a na nyi girela silo nya sadi, kholu nyi gu ni muphasi nya mhamba nya Mulevhi.”
Currently Selected:
Valamuli 17: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
