Valamuli 18
18
Va na Dhani va ngu hatha lidhoropa la Layisi gu khala thomba yawe
(Josuwa 19:40-48)
1Khu gikhati gyogyo, tigoni ga Israyeli, gu di bani gu ngari mwalo mufumeli, lihundzo la na Dhani, li di guvbweta litigo nya guvbahe umo li khala thomba yawe, kholu, kala ga gikhati gyogyo va di bani va si gu kavedwi litigo nya thomba yawe vbakari nya mahundzu ya Israyeli. 2Va na Dhani va di rumela livbandre vama nya linyumba lawe, nya dzindrena, na va gu dugela dhoropani ga Zora ni Esitaholi, guya li sola ni gu li wona gwadi. Va di va embela, khavo: “Indrani mu ya sola gwadi litigo.” Vama vale va di vboha gigomoni gya Efrayimi vaya bela ndrangani ga Mika, va ya lala avbo. 3Na vari vbafuvbi ni ndrangani ya Mika, va dipwa lito la lidzaha lile nya Mulevhi, va di hidzimela va mu wudzisa, khavo: “Khu mani a nga gu resago avba? Gasi ginani u girago avba? Ginani u gu nagyo avba?”
4Lidzaha lile li di va embeledzela iso li nga giredwago khu Mika, a va embela, khuye: “Uye a di nyi thola gu mu thumela kha nga muphasi nya mhamba.”
5Khavbo avbo, va di mu lomba, khavo: “A gu bani ari kharato, nga wudzisa ga Nungungulu gu lipfhumba hi gu nalo li na gimbila gwadi, gani?”
6Uye a di va embela, khuye: Indrani khu gurula, lipfhumba mu gu nalo li thangedwe khu Pfhumu Nungungulu.
7Khavbo avbo, vama vale nya livbandre va di hongola kala vaya vboha Layisi, va diya wona nya gukhavo vathu va vbanyago ga ilo va khadzisegide gwadi va mwalo sigaradzo, mayelano khu mavbanyelo nya Vasidhoni, na va tengide ni gu tumbana; tigoni mule gwawe, gu di bani gu ngari mwalo mufumeli nya gu va fumele ambari gu va tshanisa guvbanyani gwawe. Va di guvbanya venga, gu diri mwalo limbe lihundzu li nga bani li va thurugisela.
8Avbo va nga bwelelago dhoropani ga Zora ni Esitaholi, va na gyawe va di va wudzisa, khavo: “Malosedzela muni mu hi wuyelago nawo?”
9Avo va di va hakha, khavo: “Hongoleni hi ya va dhumela! Kholu hi wonide nya gukhethu litigo lawe khyadi ngudzu. Khalani na mu tangade, ginani gi mu hwedzago? Mu nga khali migara, hongoleni hi ya li khozisa, hi li dzega. 10Avbo mu na guya vbohago, mu naya wona nya gukhenu, vathu va si thavigo gilo. Litigo lakone likhongolo ngudzu li anamide; gambe Nungungulu a li ningede mandzani gwanu, wulanga wu si hamugegigo gilo nya satshavbo si guromo tigoni!”
11Khavbo avbo, lihundzu la na Dhani, va di khuga khu dhoropani ga Zora ni Esitaholi, livbandre na limwedo mazana (600) vama na va somide matshari nya guye dwana nyimbi. 12Va di gwela vaya ghova Kiriyati-Jeyarimi, tigoni ga Judha, wulanga gu ranwago pwani, Mahani-Dhani, kala na muhuno, wulanga wowu wu khade khu hwane ga Kiriyati-Jeyarimi. 13Khu vbale, va di khuga vaya gigomoni gya Efrayimi, va vboha kala ndrangani ga Mika.
Va na Dhani va ngu dzega nyumbani ga Mika gifananiso ni Mulevhi
14Khavbo avbo, vama vale nya livbandre va nga hongolago vaya sola litigo la Layisi, va di embela va na gyawe, khavo: “Mu di gu dzitini nya gukhenu mudzinyumbani momu, yomo efodhe ni terafinisi, ni githombe nya guvatwe ni gimbe nya gupfhudwe, gani? Olu wonani iso mu yelago gu gira.”
15Khavbo avbo, va di phawuga, vaya bela nyumbani ga lidzaha nya Mulevhi, ndrangani ga Mika, va mu losa. 16Vama vale nya livbandre na limwedo mazana va nga bani va somide matshari, nya sanana sa Dhani, va di emide vbanyangwatunu. 17Aholu, avbo va nga gwelago vama vale nya livbandre, va nga bani va hongode vaya sola litigo, va di bela nyumbani, va dzega gifananiso nya guvatwe, efodhe, terafinisi ni gifananiso nya gupfhudwe, muphasi nya mhamba a di simama gu ema vbanyangwatunu, gumogo ni livbandre na limwedo mazana vama va nga bani va somide matshari nya nyimbi.
18Avbo vama vale va nga bela nyumbani ga Mika, va dzega gifananiso nya guvatwe, efodhe, terafinisi ni gifananiso nya gupfhudwe, muphasi nya mhamba a di va wudzisa, khuye: “Ginani igyogyo mu girago?”
19Avo va di mu hakha, khavo: “Degula, bedza mandza yago kanani! Hi landre. Uwe u na bani nuri babe wathu ni muphasi wathu nya mhamba. Khandri a diri tshukwana gu khala muphasi nya mhamba nya lihundzu ni situgulwana sa Israyeli, guvbindra gu khala muphasi nya mhamba wa muthu moyo, gani?” 20Khavbo avbo, monyo wa muphasi nya mhamba wu di nengela, a dzega efodhe, terafinisi ni gifananiso nya guvatwe, a bela vbakari nya vathu. 21Na va vegide sanana sawe, ni sifuyo sawe gumogo ni dzithomba mbeli gwawe, va di bwelela va gu hongola.
22Avbo va nga bani vari hwindzwana ni nyumba ya Mika, vathu va nga bani va romo mudzindrangani vbafuvbi ni ndranga ya Mika, va di tombana va lundra va na Dhani. 23Va di laledza khu hwane ga va na Dhani, va na Dhani va di thendregedza va embela Mika, khavo: “Gasi ginani u gu nagyo gu kala u ramba vathu vatshavbo vovo?”
24Khavbo avbo, uye a di khuye: “Mu nyi dzegede vanungungulu vangu nyi nga dzi girela, gumogo ni muphasi wangu nya mhamba, mu hongola naye, olu ginani gi nga nyi tshalela?” Olu khu ginani mu nyi wudzisago, khenu: “Ginani u gu nagyo?”
25Va na Dhani, va di mu hakha, khavo: “U nga phikhizani ni ethu, kholu vambe nya gihafane#18:25 Vambe vari khavo gihafane. va na gu ndragela, u luza womi wago ni wa vatshavbo va nyumbani gwago.” 26Khu guralo, va na Dhani, va di phara ndzila yawe, Mika na wonide nya gukhuye avo va na ni tshivba guvbindra uye, a di bwelela gaya gwaye.
27Va na Dhani va di dzega iso si nga bani si giridwe khu Mika ni muphasi nya mhamba waye, va hongola Layisi, ga vathu nya gurule ni gu tumbega. Va diya va sasela khu matshari, va vbisa lidhoropa khu nilo. 28Kha manega ni muthu nya gu va vbulugise, kholu va diri hwindzo ni litigo la Sidhoni, gambe avo va di si theli kota khu vambe vathu, lidhoropa li diri kovani wa Bheti-Rehobhi, khu hwane, avo va di vbahedza lidhoropa va khala umo. 29Va di li thangisa lina la Dhani, kha nga babe wawe, a nga bani na gu ranwa gupwani khu Dhani, a nga velegwa khu Israyeli, khu gale ilo li di ranwa gupwani Layisi. 30Va na Dhani va di dzi emisela gifananiso gile nya guvatwe. Jonatane, mwamana wa Gerisoni, tugulu wa Manasi, gumogo ni sanana saye, va di khala vaphasi nya mhamba nya lihundzu la na Dhani, kala litshigu va nga modwa va vbagedwa va yiswa wugumbitunu. 31Avo va di dzi emisela gifananiso gi nga vatwa khu Mika, gi di khala vbakari gwawe matshigu yatshavbo, avbo Nyumba ya Nungungulu yi nga manega dhoropani ga Silo.
Currently Selected:
Valamuli 18: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
