Valamuli 16

Samisoni a ngu ningedwa khu Dhalila

1Samisoni a di hongola Gaza, aya wona nyamayi nya liphuphulu, a bhaya naye. 2Gu di pwala ndruma ga vavbanyi va Gaza gupwani nya Samisoni vbohide tigoni gwawe. Wutshigu watshavbo va di vega dzighadhi, va di mu randrela khu vbanyangwatunu nya lidhoropa. Wutshigu watshavbo va di mu ghadha nyamba gira ligwaha, na va gukhavo: “Hi na mu khevisela kala gugya, gasi hi mu songa.”

3Aholu, Samisoni a di lala kala vbakari nya wutshigu basi, khu hwane a di wuga a hongola nyangwani nya lidhoropa, aya sigula malimba ya mavili gumogo ni madingo yaye, a si rwala magatani a gwela naso tshokhatunu nya gigomo gi khedzanago ni Hebroni.

4Khu hwane nya ugo, Samisoni a di dogorela nyamayi nya gudugele kovani wa Soreki, nya gupwani khu Dhalila. 5Vathangeli nya Vafilisitiya va di embela nyamayi, khavo: “Mu sengedzele gasi u kodza guti avbo gu dugelago avbo tshivba yaye nya yikhongolo, hi kodza guti hi na mu mola mamolelo muni, gasi hi mu hunga, hi mu vbedza tshivba. Moyo ni moyo nya ethu hi na gu ninga gyuma nya likhumi na limwedo maza (1.100) dzisikulu nya parata.”

6Khavbo avbo, Dhalila a di wudzisa Samisoni, khuye: “Nya gu lomba gukheni u nyi embele avbo yi dugelago avbo tshivba yago nya yikhongolo, mahungelo muni va yelago gu gu hunga khayo?”

7Samisoni a di mu hakha, khuye: “Va gu nyi hunga khu dzingodzi nya wulaho nya gunagane, nyi na rereka, nyi fanana ni mumbe muthu.”

8Khavbo avbo, vathangeli nya Vafilisitiya va di resela Dhalila, livbandre na dzimbili dzingodzi nya wulaho na dzi nga gunagana, a ta hunga khidzo Samisoni. 9Va diromo vama va nga bani va sihade nyumbani ga Dhalila, uye a di mu rana khuye Samisoni, u ngu dhumedwa khu Vafilisitiya! Aholu, uye a di kavila dzingodzi nya wulaho a gira khwatshi a gu kavila khindra nya gikhwenga yi vbyago khu nilo. Khu guralo, mwalo a nga bani a guti umo yitago khumo tshivba yaye.

10Dhalila a di embela Samisoni, khuye: “U nyi poyide, u nyi embela malipha, nyi embele wa gu hungwa khu hayi.”

11Uye a di mu embela, khuye: “Mwa gu nyi hungani ngudzu khu dzingodzi nya dziphya dzi si gu thumiswigo, nyi na vbela tshivba nyi fanana ni mumbe muthu.”

12Dhalila a di dzega dzingodzi nya dziphya, a mu hunga khidzo, khu hwane a huwelela, khuye: “Samisoni, Vafilisitiya va nguta gu dhumela!” Vama va di sihade nyumbani. Aholu, uye a di kavila dzingodzi dza mawogoni gwaye kha nga khwatshi a gu kavila khindra.

13Dhalila a di mu embela, khuye: “Kala nolu u nga gu nyi kanganyisa u nyi liphela, gasi olu, nyi embele wa gu yela gu hungwa khu hayi.”

Uye a di mu embela, khuye: “Wa gu luga livbandre na dzimbili dzimbobo nya ndzudzu wa hungoni gwangu, u dzi luga khu dzingodzi va lugago khidzo, nyi na vbela tshivba nyi rereka nyi fanana ni mumbe muthu.” Khu guralo, uye na nga lade, Dhalila a di luga livbandre na dzimbili dzimbobo nya ndzudzu wa hungoni gwaye umo nya mwendra. 14A di dzi hunga a dzi dzombedza vbalidingotunu, a embela Samisoni, khuye: “Samisoni, Vafilisitiya va nguta va ta gu dhumela.” Khavbo avbo, a di khendzuga ligovbeni a homola lidingo avbo nya dzimbobo nya gulugwe, gumogo ni gilugelo.

15Khavbo avbo, uye a di mu embela, khuye: “Khu ginani u gukhuwe u ngu nyi haladza, narigu monyo wago kha wu nyi tumbi. Olu nyondro tharu na wu gu nyi kanganyisa u si nyi embeli umo u manago tshivba yago nya yikhongolo.” 16Khu litshigu ni litshigu, Dhalila a di garadza Samisoni a mu vbedza tshivba khu magana yaye. Hefemulo waye wu di garadzega ngudzu nya gukhwatshi a nafa.

17Khu guralo, uye a di mu lembedza sihalo waye, khuye: “Gukhugela nyi velegwa nyi si gu gaywi ndzudzu, kholu nyi Munaziri wa Nungungulu. Nya gu kala nyi gaywa ndzudzu wa hungoni gwangu, tshivba yangu yi na duga, nyi vbela, nyi khala nga mumbe muthu.”

18Avbo Dhalila a nga wonago nya gukhuye a mu tulede monyo waye watshavbo, a di ruma vathu vaya rana vathangeli nya Vafilisitiya, a va embela, khuye: “Gwelani mute eno, kholu olu, uye a nyi tulede sihalo waye watshavbo.” Vathangeli nya Vafilisitiya va di gwela ga Dhalila, na va pharide dzitsapawu mandzani. 19Dhalila a di ladzisa Samisoni marumbini gwaye, a ranisa mwama moyo, a ta mu gaya dzimbobo dzile nya livbandre na dzimbili dza hungoni gwaye. Dhalila a di phela gutshanisa Samisoni, kholu a di mu vbedzide tshivba.

20A mu embela, khuye: “Samisoni, u nguta dhumedwa khu Vafilisitiya!” Uye a di khendzuga khu ligovbeni, na gu pimisa, khuye: “Nyi na duga nyi hongola gufanane nidzo nyi dzi vbulugisago khidzo mambe matshigu.” Aholu, kha nga dziti nya gukhuye Pfhumu Nungungulu a di mu digide.

21Khavbo avbo, va di bela Vafilisitiya va ta mu mola, va mu polela maho, va mu dzega va relela naye Gaza, vaya mu hunga khu makhetshe mavili nya sugu, a tshindra sivbila pasoni. 22Aholu ndzudzu wa hungoni gwaye wu diya na wu gu dandra nyaluphye khu guvbiredza.

Gufa ga Samisoni

23Va di tombana vathangeli nya Vafilisitiya, va gira buzo nya guningele mhamba ga nungungulu wawe Dhagoni, kholu va di gukhavo: “Nungungulu wathu a hi ningide mandzani gwathu nala wathu Samisoni.”

24Avbo vathu va tigoni, va nga wona Samisoni, va di rungudza nungungulu wawe, kholu va di gukhavo:

“Nungungulu wathu a ningede

mandzani gwathu nala wathu,

a nga bani a pfhungumula litigo lathu,

uye a nga saselago vathu nya vangi va na gyathu.”

25Avbo va nga bani va tsakide ngudzu, va di khavo: “Ranani Samisoni a ta hi hegisela. Va diya rana Samisoni pasoni a ta va hegisela, na va mu emiside vbakari nya madingo nya nyumba ya nungungulu wawe.” 26Khavbo avbo, Samisoni a di embela lidzaha li nga bani li mu pharedzela khu libogo, khuye: “Nyi hidzimise nyi ya pharedzela madingo ma tiyisago nyumba gasi nyi kodza gu tiya khayo.” 27Nyumbani mule gu di tade khu vama ni vanyamayi, gu diromo gambe umomo vathangeli vatshavbo nya Vafilisitiya, khu vbatshani gakone gu diromo tanga nya mazana mararu magumi (3.000) vama ni vanyamayi, va nga bani va wona Samisoni na va hegisela.

28Khavbo avbo, Samisoni a di rana Pfhumu Nungungulu, a ganela, khuye: “Uwe Pfhumu Nungungulu, nya gu gu lomba gukheni nyi alakanye! Uwe Nungungulu, nyi ngu lomba gukheni, nyi ninge gambe tshivba, gikhati gegi basi, u nyi gira gu nyi dzi phodzela ga Vafilisitiya, khu kotani nya maho yangu ya mavili.” 29Khavbo avbo, Samisoni a di mola madingo ya mavili ya vbakari, ma nga bani ma tiyisa nyumba ya nungungulu wawe. Libogo la nyamudye li mola limwedo, la nyambade li mola limbe, 30Samisoni a ganela, khuye: “Nyi nafe gumogo ni Vafilisitiya.” Nyumba yi di wegela khu tshivba, yi thega vbatshani ga vathangeli ni ga vathu vatshavbo va nga bani va romo umomo. Vathu a ngafago navo, vangi ngudzu guvbindra avo a nga songago na nga gu vbanya.

31Khavbo avbo, vandruye va Samisoni va di relela gumogo ni valongo vatshavbo va nyumbani ga babe waye, va ta mu dzega va gwela naye vaya mu dzinga thowoni ga babe waye Manowa, vbakari ni vbakari ga lidhoropa la Zora ni Esitawoli. Samisoni khade mulamuli wa Israyeli gipimo nya magumavili myaga.

Currently Selected:

Valamuli 16: BGG2014

Highlight

Copy

Compare