Isaya 28
28
V. GITIVISO NYA TSAYISO WA EFRAYIMI NI JUDHA
Gupfhungumudwa ga Samariya
1Libango ga Samariya, gihugu nya matshandza nya sidhakwa sa Efrayimi!
Lidhoropa li vbahidwego vbatshani nya kova nya gunone,
wumburi nya wuzundzo waye
wa gu fanana ni genge nya wumburi nya guwune
gi vegidwego hungoni nya vathu va levidego.
2Wonani nya gukhenu Pfhumu
a na rumela mwama nya ndrena ni tshivba
kha nga ndzadzi nya maralala
ni phuvbo nya gingulu, yi pfhungumulago
kha nga talo nya khongolo nya mati ma khulungago
khu tshivba, ma kemba mafu.
3Gihugu nya wufumu nya matshandza
nya sidhakwa sa Efrayimi,
gi na gandredzedwa khu migondro.
4Genge nya guwune nya wumburi waye,
egi gi guromo vbatshani nya kova wu nonidego,
olu gya gu fanana ni genge nya guwune.
Gi na fanana ni dzikhindru dzi vidzidwego
dzi si guvbohedwi khu gikhati,
vavbindri nya ndzila va gu dzi wona,
va gu dzi hava va hodza.
5Ga litshigu lolo, Pfhumu Nungungulu nya Tshivba Yatshavbo
a na khala gihugu nya wuzundzo
ni wumburi ga mitshaledwa nya vathu vaye.
6A na khala liphuvbo nya gululame ga vale
va khalago miphathani gasi gu lamula mahungu,
ni tshivba ga vale va gu na ni wundrena nya gu tutumise valala kala dzinyangwani gwawe.
Isaya a ngu vbenyela vaphasi nya mhamba
(Jeremiya 6:16; 1 Vakorinto 14:21; Matewu 11:28; 23:37)
7Aholu avo navo va ngu dhedhereka khu kotani nya vbinyu,
kha va kodzi ni gu ema, kholu
va sedego wadwa nya guvave.
Ambari vaphasi nya mhamba ni vaprofeti
va ngu dhedhereka khu kotani nya
wadwa nya guvave ngudzu.
Va levide khu vbinyu, va ngu dhedhereka
khu kota nya wadwa;
va gu profeta, va gu ganela mapongowongo,
va tshomborosela mahungu gulamulani gwawe.
8Kholu, dzimeza dzatshavbo dzi tade khu magose ni ndzilo;
gu mwalo ni wulanga wu ngamba nyenyeziswa.
9Va gu wudzisa, khavo: “A gu pimisa gukhuye na hevbudza mani wugengeli, na?
A gu pimisa gukhuye a na tshamusela mani
mahungu va ma pwidego?
Ina kamwe ethu hi ngari sanana nya sidugwane
si ngari gulumudwago, gani?
Esi si ngari gu digago libele, gani?
10Kholu iso si ganedwago khesi:
Milayo vbatshani nya Milayo,
milayo, mi engedza mimbe milayo;
nongameto vbatshani nya nongameto, nongameto wu engedza wumbe nongameto;
sidugwana avba, sidugwana vbale.”#28:10 maganelelo nya Gihebheru ma di khayo: Tsav latsav, tsav latsav kav lakav, kav lakav Gutshamusago gupwani Milowo khu milowo, milayo khu milayo.
11Kholu Pfhumu Nungungulu a na ganela ga vathu vava khu lidimi nya gukhukhumele ni lidimi la vambe vathu,
12 # Wona gambe: 1 Kor 14:21. avbo a nga va embela, khuye:
“Owu wulanga nya guhefemule,
digani a hefemula uye a garadego;
owu wulanga nya gupepemele”;
aholu avo kha va dzina gu yingisa.
13Khu guralo, magana ya Pfhumu Nungungulu ma na khala
milayo vbatshani nya milayo,
milayo gu engedza yimbe milayo;
nongameto vbatshani nya nongameto,
nongameto wu engedza wumbe nongameto;
sidugwana avba, sidugwana vbale;
gasi gikhati va gimbilago,
va thega khu nyagihwane;
va tshunganiswa va modwa khu naphwi.
14Khu guralo, yingisani magana ya Pfhumu Nungungulu,
enu vatseketseli mu fumelago vathu vava
va vbanyago Jerusalema.
15Mu ngu dzi zundza mu ganela, khenu:
Mu hungide pwanano ni lufu,
ni gukhenu litigo nya vafi pari yathu,
ambari tsayiso wu khulunga wu fanana ni talo,
gima kha wu na hi vbohela,
kholu malipha, wuthavelo wathu,
ni wudambane, wulanga nya gusihale avbo.
16 # Wona gambe: Dzind 118:22-23; Rom 9:33; 10:11. Khu guralo, Mune Pfhumu Nungungulu
a ngu ganela kharati, khuye:
Wonani nyi vegide Siyoni giwindri nya giseketelo
gi tiyidego, a gu giwindri nya gutiye ni wumburi,
uye a khodwago gwaye,
gima kha na khala hwanga.
17Nyi na lamula khu pimo nya gululame,
lipimo nya gupime ndzari,
ni maralala ma na vbiyela wuthavelo nya malipha,
ni wuthavelo wawe wu na taledwa khu mati.
18Gidzumeledzwano gyanu mu hungidego ni lufu gi na futwa,
ni wupari mu hungidego ni litigo nya vafi, kha wu na tiya;
ni avbo wu natago talo nya mati ni tsayiso wanu,
mu na ta kukulutwa khuwo.
19Gikhati gyatshavbo wu na vbindrago talo wu na mu kukuluta,
kholu gugya ni gugya, wu na vbindra khaavbo
wutshigu ni mihani;
uye a na embedwago khu mahungu nya libango leli,
a na thuruga ngudzu!
20Kha nga livingo li gu, khilo: Lidawu li na rola ngudzu nyamba enela,
ga oyu a golago gu dzi nawula;
ni vholo wu na honga ngudzu,
nyamba enela gu dzi fenengedza khuwo.
21 # Wona gambe: 2 Sam 5:20; 1 Dzik 14:11; Jos 10:10-12. Kholu Pfhumu Nungungulu a na khuga a ema
nga idzo a nga girago gigomoni gya Perazimi,
a goroga kha nga idzo a nga girago kovani wa Gibheyoni,
gasi gu gira thumo waye,
thumo nya guthise, a vbedzisa thumo waye, thumo waye nya gu samadzise.
22Olu, digani gu hembulula,
gasi mu si hungwi khu makhetshe nya guvbindre pimo;
kholu nyi pwide khu ga Pfhumu Nungungulu nya Tshivba Yatshavbo,
na gu ganedwa
khu gumbembiswa litigo,
gumbembiswa gogu, gu tiyide, gu na girega tigoni gwatshavbo.
Guti ga Nungungulu
23Tulani dzindzeve mu yingise lito langu,
upwani mahungu nyi mi embelago.
24Ina kamwe mulimi a gu lima lithembwe gasi gu yala,
a gu simamisa gu lima basi nyamba thuma gimbe gilo, gani?
A gu pola misele
ni gu dongisela wulime basi, gani?
25Ahihi, hwane nya gu bani a vbedzide gu dongisela wulime,
a gu swaya dzimbewu nya tembura ni dzinyemba;
mwendro gu yala umomo tirigu khu sasamedzo, ni mala ni sivbila malangani yaso.
26Kholu Nungungulu waye a ngu mu hevbudza
ni gu mu yeyedza esi a yelago gu gira.
27Kholu dzinyemba kha dzi vbudwi khu givbulo,
gambe dza gu vbudwa khu ndronga,
ambari gu vbudwa khu lirodha nya kareta; dza gu vbudwa khu gighomba.
28Tirigu kha yi hindzwi, kha yi vbudwi gikhati gyatshavbo,
gambe kha yi vbudwi khu marodha nya kareta yaye,
ambari gu fanyeledzedwa khu dzikavalu dzaye.
29Satshavbo sesi sa guta khu
ga Pfhumu Nungungulu nya Tshivba Yatshavbo,
kholu wusingalagadzi waye wu ngu samadzisa,
gambe khongolo khu guti.
Currently Selected:
Isaya 28: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
