Isaya 29
29
Jerusalema ni valala vaye
1Libango lago uwe Ariyeli! Ariyeli, lidhoropa lile
Dhavhidhe a nga vegago umo lizumbo laye!
Engedzelani khu mwaga ni mwaga,
gu manega mibuzo.
2Khu guralo, nyi na randrela lidhoropa la Ariyeli
khu malanga yatshavbo,
gu na manega umo gililo ni wuvi;
ilo avbo gwangu li na khala nga gikho nya giluvelo.
3Kholu nyi na gu randrela khu lizumbo langu,
nyi gu randrela khu mabutho yangu,
nyi gu segela u si kodzi gu duga.
4U na theswa vbavbatshi, u na ganela nuri vbavbatshi nya mafu,
lito lago khu vbavbatshi nya kudzudzwane, li na duga na liri mwalo tshivba,
lito lago li na pwala vbavbatshi nya mafu li fanana ni lito nya gikono;
li na womba ndrodzi khu vbavbatshi nya kudzudzwane.
5Gidzemo ya valala vago, gi na fanana ni lipfhi nya kudzudzwane,
ni gidzemo nya vatshanisi, gi na fanana ni mavivi
ma vbuvbiswago khu phuvbo;
khu gikhati gidugwana, isoso si na girega.
6 Pfhumu Nungungulu nya Tshivba Yatshavbo, a nata gu tsayisa
khu mabara, sirevareva, ni gudzuma nya guthise,
ni singulu ni sipupwane ni malavbelavbe nya nilo
nya gumbembise.
7Gidzemo nya mayigo yatshavbo gi na dwanisago Ariyeli,
gi na khala kha nga ndroro ni giwoniso nya wutshigu,
gu na girega gambe ga vatshavbo vale va zamago gu mu dwanisa,
ni gukhungumula lidhoropa ni mabhiyo yaye, va li phanga.
8Gufanana gambe ni muthu apwago ndzala a lorago na gu hodza,
aholu, a gu wuga a gu simama gupwa ndzala;
mwendro muthu apwago lidora a lorago na gu sela mati,
aholu, a wuga na gu dagarela khu lidora,
gu na girega kharato ni sidzemo nya mayigo yatshavbo,
si na dwanago ni gigomo gya Siyoni.
9Thurugani mu samala,
tshikhani maho, mu simama gu khala sikhumu;
levani, na mwa sa sela vbinyu,
dhedherekani, na mwa sa sela wadwa nya guvave.
10 # Wona gambe: Rom 11:8. Kholu, Pfhumu Nungungulu guhude vbatshani gwanu
liphuvbo nya ligovbe nya likhongolo,
a sega maho yanu, a gu vaprofeti;
a fenengedza vathangeli vanu, a gu vama nya liwoni va tugulago misihalo.
11Siwoniso satshavbo si vbindrugedzide avbo gwanu si fanana ni mahungu ma lovidwego libhukuni li gu lemwa, eli li ningedwago ga uye a kodzago gu hevbula, mu mu embela, khenu: “Hi ngu gu lomba u hi hevbulela esi;” uye a hakha, khuye: “Kha nyi dzi kodzi gu li hevbula, kholu li lemidwe.”
12Mwendro, la gu ningedwa ga muthu a si kodzigo gu hevbula, pwani: “Hi ngu gu lomba u hi hevbulela esi,” uye a na hakha, khuye: “Kha nyi kodzi gu hevbula.”
Gukhodwa nya lisine
13 # Wona gambe: Mat 15:8-9; Mark 7:6-7. Kholu Pfhumu ganede, khuye:
Kha nga olu vathu vava va hidzimelago
avbo gwangu khu magana ma dugago khu kanani gwawe,
va gu nyi dhumisa khu magana basi,
aholu myonyo yawe yomo hwindzo ngudzu ni Eni,
kholu githawo gyawe ni Eni gya gu manega basi khu milayo va mi hevbudego ni vathu.
14 # Wona gambe: 1 Dzik 1:19. Khu guralo, nyi na simama gu gira mithumo nya gusamadzise vbakari nya vathu vava,
eyi yi liwugisago ni guthurugisa;
kholu guti ga va nya gugengela vawe gu na fuva,
ni gupima ga vathu vawe nya gugengele gu na vbela.
15Libango ga vathu vale va sihago makungo yawe,
va sihela Pfhumu Nungungulu, va gira mithumo yawe
mugidemani, na va gu ganela, khavo:
“Khu mani a na gu hi wonago, khu mani a hitigo?”
16Sipumbunu!
Ina muwumbi a ngu fananiswa ni libumba, gani?
Ina gilo gi giridwego khu muwumbi waye, gi ngu kodza gu, khigyo:
“Eni kha nya girwa khuye, gani?”
Mwendro muthu a gu gira gilo,
gilo gi ngu kodza gu embela mugiri waye, khigyo:
“Uye khati gilo, gani?”
Gudzegiswa ga Israyeli
17Ina khu gikhati gidugwana Libhanoni,
kha na vbindrugedza a khala lithembwe nya gunone, gani?
Ni lithembwe li nonidego kha li na vbindrugedza li khala likhabi, gani?
18Khu litshigu lolo, sivbwiri si napwa mahungu nya libhuku,
ni maho nya sikhumu ma guromo gusivbalani nya gidema,
ma na wona.
19Va nya gurula va na mana gunengela ga Pfhumu Nungungulu,
sisiwana ni vahamugi vbakari nya vathu, va na nengela
va ghiya ga Nyaguage wa Israyeli.
20Vathu nya dzihanyi ni vatshanisi, va na fuviswa khu Pfhumu Nungungulu,
gumbembiswa gambe vatshavbo va thumago guvivba,
21vatshavbo avo va rwegago nandru muthu khu guhoheta nya gukari,
ni valamuli va rengeledwago gasi gu rwega nandru
wule a ngamba ghoha.
22Khu guralo, khu mahungu nya nyumba ya Jakobe,
Pfhumu Nungungulu a nga tshudzisago Abrahama,
a ngu ganela kharati, khuye:
Jakobe gima kha na nga thedwa dzitshoni gambe,
ni khovbe yaye gima kha yi na thuviga.
23Aholu, avbo uye gumogo ni sanana saye va na wonago
vbakari gwawe mithumo ya mandza yangu,
va na ninga githawo lina langu,
va dhumisa oyu a Agidego wa Jakobe,
ni gu ninga githawo Nungungulu wa Israyeli.
24Vathu va ndreyidego ndzilani nya gululame, va na mana mapimo,
ni avo nyamba khathala khu gilo, va na dzumela gu hevbudzwa.
Currently Selected:
Isaya 29: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
