Isaya 27
27
Nungungulu a ngu gola vathu vaye a va vbanyisa
1 # Wona gambe: Job 41:1; Dzind 74:14; 104:26. Khu litshigu lolo, Pfhumu Nungungulu a na tsayisa khu litshari laye nya likhongolo, nya tshivba, levhiyatani, nyoga nya tshivba ni mazambo, nya gu dzi tshomborosele, ni gu songa mwamilambo, nyoga yi guromo linene.
2Khu litshigu lolo, gu na bani na guri ni lithembwe
li tadego khu mihandro,
va na embelela ga ilo, khavo: 3Eni Pfhumu Nungungulu kheni nyi li sayisago,
nyi na li theledzela mati gikhati gyatshavbo,
nyi li ghadha wutshigu ni mihani,
gasi a si manegi muthu nya gute li ghohetela.
4Eni kha nyi na goroga, khu gu manega umomo
miba ni sirangalabwa!
Nyi na dwana naso
nyi si hengeledzela dangamwedo, nyi si vbisa.
5Sa gumba dzina gu gira kharato, si nate sita lomba gurula ni Eni,
si na pwanane ni Eni,
nyi na vbanya naso khu gurula.
6Ma nguta matshigu, avbo Jakobe a na bugago mikhamba,
Israyeli a nyuga a thela wenge,
a tadza tigoni gwatshavbo khu mihandro.
7Ina kamwe Pfhumu Nungungulu vetide Israyeli,
kha nga idzo a vetidego khidzo avo va nga mu vetago, gani?
Mwendro uye a va songide kha nga idzo a songidego
khidzo avo va mu songidego, gani?
8Kha va veta guvbindra pimo, a di va yisa wugumbini,
a di va dzega khu phuvbo yaye nya tshivba
nya gufanane ni gingulu nya gute khu Khagadambo.
9Khidzo kharato, nandru wa Jakobe wu na handzwa,
owu a nga bani nari handro nya gutsetseledwe sighoho saye,
si na dzi yeyedza khu gu va khungumulela siluvelo satshavbo,
va pandrelela siwindri sakone si khala wuguvbi,
va sigulela madingo ya nungungulu nya malipha Asitaroti
ni sifananiso nya lidambo, si thega vbavbatshi.
10Kholu lidhoropa nya gutiye li khade marumbi,
kha gu na khala gambe muthu umo,
li vbindrugedzide li khala giwula,
va na havisela umo dzimombe, dzi lala umo,
dzi hodza matamo ma tshadego.
11Avbo ma na bangago matamo yaye,
va na ma fanyeledzela,
va ta vanyamayi va ta vasa khayo nilo va ma gira dzikhuni,
kholu vathu vava khandri vathu nya mapimo,
khu guralo, mugiri wawe kha na va pwela gisiro,
ni muvangi wawe kha na va tsetselela.
12Khu litshigu lolo, Pfhumu Nungungulu a na vbula mavbila
yaye gukhugela tsongoni wa Ewufrate,
kala tsongoni wa Egipito;
Gasi enu va na Israyeli, mu na roledwa khu moyo ni moyo.
13Khilo litshigu lile gu na wombwago pundru nya wukhongolo,
avo va nga bani va dzimede tigoni ga Asiriya,
ni vale va nga bani va vbagedwe va yiswa tigoni ga Egipito,
va na wuya va ta khozela Pfhumu Nungungulu,
gigomoni nya gukatege gya Jerusalema.
Currently Selected:
Isaya 27: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
