Isaya 25

Ndzimo nya gubonge wuhindzi wa Nungungulu

1Uwe Pfhumu, khuwe Nungungulu wangu;

nyi na khusedza ni gudhumisa lina lago,

kholu u giride silo nya gusamadzise;

u landriside khu gutumbega ni gutiya makungo

u ma hungidego khu gale.

2U giride lidhoropa,

li khala litala nya siwindri,

ni lidhoropa nya likhokhola, u li pfhungumudwe li khala marumbi,

lidhoropa nya gutiye la va nya mayigo,

li thegide, khandri lidhoropa gambe,

gima kha li na wusedzwa gambe.

3Khidzo kharato, vathu nya dzitshivba va na gu dhumisa;

lidhoropa nya tsindza wa va nya mayigo nya dzihanyi li na gu ninga githawo.

4Kholu u wuthavelo nya sisiwana,

ni likhokhola ga wule a hamugago gutshanisekani gwaye,

u wuthavelo wawe matshiguni nya phuvbo nya gingulu,

ni mutsa litshigu nya lihani.

Kholu, lunya nya vathu nya guvivbedwe khu monyo

la gu fanana ni phuvbo

nya guthise yi furugedzago ndzari, #25:4 Lunya, liphuvbo nya guvivbe la vathu nyambasi vadi.

5kha nga guvbisa nya lihani mugiwulani.

Uwe u ngu degudza ligwaha la va nya mayigo,

kha nga idzo u vbungulago khidzo guvbisa khu mutsa nya lipfhi,

si na girega kharato sizimba sa va nya mayigo.

Buzo nya khongolo

(1 Vakorinto 15:26,54; 2 Thimoti 1:1; Gutuledwa 7:17)

6Gigomoni momu, Pfhumu Nungungulu nya Tshivba Yatshavbo, a na dongisela buzo nya khongolo ga vathu vatshavbo va tigoni, buzo nya nyama nya gunone, ni vbinyu nya gutshambe gwadi, guhodza nya mafura nya guphudwe gwadi, vbinyu nya guvave nya gutshambe gwadi.

7 Pfhumu Nungungulu a na pferula gigomoni momu mwendra nya gilendra, wu fenengedzago vathu nya mayigo yatshavbo ni mwendra wu fenengedzago mafumbo yatshavbo nya mayigo.

8 # Wona gambe: 1 Kor 15:54; Gutu 7:17; 21:4. A na fuvisa gufa kala gupindruga; Mune Pfhumu Nungungulu a na bavbula marongo dzikhovbeni gwatshavbo, a na dusa dzitshoni ga vathu vaye mafuni gwatshavbo, kholu Pfhumu Nungungulu ganede kharato.

9Khu litshigu lolo, va na ganela, khavo: “Wonani, oyu khu Nungungulu wathu, hi mu tumbidego a na hi vbanyisa, khuye Pfhumu Nungungulu, oyu hi mu viredego, hi na tsake hi nengele khu guvbanyisa gwaye!”

10Kholu gyandza gya Pfhumu Nungungulu, gi na handzegwa vbatshani nya gigomo gegi; aholu Mowabhi, a na gandredzedwa avbo a guromo, kha nga idzo va gandredzelago khidzo mwasi talani nya ndzilo.

11Vbakari nya isoso, Mowabhi a na thawuludza mandza yaye, kha nga idzo muhambi a thawuludzago khidzo a gu bani a gu hamba mayaka; aholu Pfhumu Nungungulu a na vbwasamisa gu dzi khusedza gwaye, gumogo ni wugengeli nya mandza yaye.

12 # Wona gambe: Isa 15:1—16:14; Jer 48:1-47; Ezek 25:8-11; Amos 2:1-3; Sof 2:8-11. A na khungumula makhokhola nya mabhiyo yawe; a na ma khungumula ma thega mafuni ma khala kudzudzwane nya mafu.

Currently Selected:

Isaya 25: BGG2014

Highlight

Copy