Isaya 24
24
IV. GUTULEDWA GWA ISAYA
Gumbembiswa nya litigo
(Isaya 34—35; Ekisodha 8—39)
1Wonani nya gukhenu! Pfhumu Nungungulu a na mbembisa litigo a li gira marumbi,
a vbindrugedza litigo ni gu phalalegisa vavbanyi vaye.
2Esi si na dugelelago ga vathu, si na dugelela gambe ga
muphasi nya mhamba;
ga githumi nya mwama, kha nga ga mune waye; ga githumi nya nyamayi,
kha nga ga mune waye;
ga murengi, kha nga ga murengisi;
ga uye a lombisago, kha nga ga mulombi;
ga mufiyarisi, kha nga ga uye a fiyarigo.
3Mafu ma na khala giwula nya guvbelele,
kholu Pfhumu Nungungulu ganede magana yaya.
4Mafu momo gililoni ma bwelo khavbo ma wu na;
litigo li rerekide li vbela tshivba,
vakhongolo nya vathu va tigoni va vbede tshivba.
5Kholu mafu ma nyenyezide
khu kotani ya vavbanyi vaye,
kholu va yeyiside milayo ni gu hambanisa sileletelo,
va kavila gidzumeledzwano nya gupindruge.
6Khu kotani nya isoso, guvivba gu midzide mafu,
ni avo va vbanyago umo, va mane nandru;
vavbanyi va tigoni va na dagarela khu nilo,
gu na tshala vathu vadugwana basi.
Gulamudwa nya lidhoropa
(Genesi 7:11; Amosi 5:19)
7Vbinyu yi ngu lila
miuvha nya yiphya yi ngu wu na;
ni wadwa wu na kala ngudzu,
ava va nga bani va tsaka va ngu lila.
8Gudzuma nya singomana kha gu pwali gambe,
livbede ligwaha la vale va tsakago,
gitendre kha gi ngo wombwa gambe.
9Kha gu nga gu sedwa gambe vbinyu na gu embeledwa dzindzimo;
kholu wadwa nya guvave wu nga bani wu gu sedwa, kha wu nga gutshamba gambe ga vale va wu selago.
10Lidhoropa nya gutale khu pfilupfilu li khungumudwe,
malimba yatshavbo ma segidwe,
mwalo a dzi kodzago gu bela umo.
11Vathu va gu lila mudzindzilani khu gu hamugega vbinyu;
gutsaka gwatshavbo gu vbede,
yi fuvisidwe mihagano yatshavbo ya mafuni.
12Lidhoropa li khade marumbi,
ni malimba yaye ma pandreledwe.
13Gu na girega kharato, omu mafuni, vbakari nya mayigo yoyo,
kha nga idzo va girago
umo nya simbo nya olivha,
mwendro gikhatini nya guvbedze guvbwera mihandro.
Gunengela ga va nya gululama
14Avo va na khusedza lito va embelela khu gutsaka;
khu kotani nya wudhumo wa Pfhumu Nungungulu,
na va gu womba huwa gukhugela phwani.
15Khu guralo, dhumisani Pfhumu Nungungulu
khu phuvbo ga Khugadambo,
ni sidwani sa phwani, huwelelani lina la Pfhumu,
Nungungulu wa Israyeli.
16Gukhugela mahegiso nya litigo, hi pwide na gu embeledwa, gupwani:
“Wudhumo ga uye a lulamidego!”
Aholu eni nyari, kheni: Nyi vbede tshivba,
nyi vbede tshivba! Libango langu!
Valogovedzi, va ngu nyi logovedza!
Kholu va gu logovedza, kha va garali khu nyi logovedza.
17Kholu, enu vavbanyi va mafuni,
mu liredwe khu hwanga nya guthavise, liphala ni lizinga.
18Uye a na thavago lito nya tshanisa a na thegela phalani,
ni uye a na dugago khu phalani, a na modwa khu lizinga;
kholu sihogo sa ndzadzini si tulegide, gu tsekatseka siseketelo nya mafu.
19Mafu yatshavbo ma na pandrega,
ma kabanega khu vbakari,
ma kutsungwa, ma tsekatseka khu tshivba.
20Mafu ma na khuyuga ma dhedhereka kha nga muthu nya guleve,
ma na kutsungega gu fanana ni mwendra nya gu vhikele dzitshuna;
ma na lemedwa khu sighoho saye,
ma na thega nyamba kodza gu wuga gambe.
21Khu litshigu lolo, Pfhumu Nungungulu a na lamula
mabutho ya ndzadzini,
gumogo ni vafumeli nya mafu, tigoni.
22Va na tombaniswa dangamwedo gu fanana ni sibotshwa
si rinywago phalani,
va khothedwa pasoni,
va tshudwa hwane nya gu bani gu vbindride matshigu nya gutale.
23Khu guralo, ngima wu na khala dzitshoni,
ni lidambo li na hembuludwa,
kholu Pfhumu Nungungulu nya Tshivba Yatshavbo,
a na fuma gigomoni gya Siyoni ni dhoropani ga Jerusalema;
a na yeyedza wudhumo waye mbeli ga madhota yaye.
Currently Selected:
Isaya 24: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
