Isaya 2
2
Wudhumo nya gigomo gya Pfhumu Nungungulu
(Jeremiya 3:17; Mikeya 4:1-3)
1Aya khu magana nya giwoniso gya Isaya, mwamana wa Amosi, mayelano khu Judha ni Jerusalema.
2Khu matshigu nya guhegise,
gigomo gegi, yi vbahedwego avbo Nyumba ya Pfhumu Nungungulu,
gi na tiyiswa vbatshani nya sigomo,
gi khusedzwa vbatshani nya sigomwana,
mafumbo yatshavbo nya mayigo
ma na khirimelana guya iyoyo.
3 # Wona gambe: Zak 8:20-22; 14:16. Mafumbo nya mangi nya mayigo, ma nata ganela, khayo: Hongoleni hi gwele gigomoni ga Pfhumu,
hiya Nyumbani ga Nungungulu wa Jakobe,
gasi a hi hevbudze dzindzila dzaye,
hi gimbila khu dzindzila dzaye,
kholu, nayo wu na duga khu Siyoni,
magana ya Pfhumu Nungungulu, ma na duga
khu Jerusalema.
4 # Wona gambe: Joy 3:10. Uye a na khala mulamuli vbakari nya mayigo,
ni gu tsayisa mafumbo nya mangi.
Matshari yawe ma na vbindrugedza ma khala mavbadza,
ni siholoma sawe si khala sivbwero;
li mwalo litigo li na gu wugelago litigo li kwawe,
ambari vathu kha va na hevbula gu dwana nyimbi.
5Enu livelego la Jakobe deluni,
hi gimbile guwonegelani ga Pfhumu Nungungulu.
Litshigu la Pfhumu
6Kholu uwe Pfhumu Nungungulu, u digide vathu vago va nyumbani ga Jakobe,
kholu va dzegelede mavbanyelo nya tumbunugo
wa mambe mayigo ya Khugadambo,
va gu thumisa wunyanga kha nga Vafilisitiya,
va thangana wupari ni va nya mayigo.
7Litigo lawe li tade khu parata ni ndralama,
dzithomba dzawe dzi mwalo mahegiso;
li tade gambe khu dzikavalu,
ni dzikareta dzawe, dzingi guvbindra tengo.
8Litigo lawe gambe, li tade khu sihuru nya sifananiso,
va gu khozela thumo nya mandza yawe,
iso va si giridego kamwe khu dzinyala dzawe.
9Khu kotani nya isoso, vathu vatshavbo va na theswa vbavbatshi,
ni muthu nya guthavisege,
a na hembuludwa.
Khu guralo, kha va na tsetseledwa!
10 # Wona gambe: Gutu 6:15. Sihalani dziphagoni nya siwindri,
belani vbavbatshi nya mavbala,
mu thava likhulo la Pfhumu Nungungulu
ni wudhumo nya wugulu waye.
11Khu litshigu lolo, maho ya va nya matshandza
ma na poyidwa,
ni vathu va dzi khusedzago, va na vbwasamiswa;
Pfhumu Nungungulu khuye basi a na gu khusedzwago khu litshigu lolo.
12Kholu Litshigu la Pfhumu,
Nungungulu nya Tshivba Yatshavbo,
li nata ga va nya matshandza
ni ga va nya gu dzi khusedza, ni ga vatshavbo va nya gu dzi gugumugisa
gasi va vbwasamiswa;
13ni ga misimbo yatshavbo nya gulaphe ngudzu
nya misena ya Libhanoni,
ni miguhu yatshavbo ya tigoni ga Bhasani;
14ni vbatshani nya sigomo satshavbo nya gulaphe
ni sigomwana nya gukhugege,
15ni vbatshani nya makhokhola yatshavbo nya gulaphe
ni ga mabhiyo nya gutiye;
16ni vbatshani nya mataro yatshavbo ya Tarisisi
ni ga satshavbo iso si wonegago na si mburide
mahoni ga vathu.
17Khu litshigu lolo, vathu va dzi khusedzago
va na thedwa dzitshoni,
ni avo va dzi gugumugisago va na vbwasamiswa.
Pfhumu Nungungulu khuye basi a na
khusedzwago.#2:17 Muprofeti a gu kawuka matshandza ni gu dzi guumugisa nya vathu mbeli ga Pfhumu Nungungulu, a ma pimanisa ni wugulu nya sivangwa, misimbo nya yikhongolo ni sigomo nya gulaphe ni sigiro nya vathu a gu mabhiyo nya gulaphe ma yeyedzago matshandza ni tshivba nya vathu. 18Sifananiso satshavbo nya vanungungulu nya malipha si na khungumuledwa muphelo. 19Avbo, vathu va naya sihala dziphagoni nya siwindri,
ni vbavbatshi nya mavbala,
khu gu thava likhulo nya guthise
li tago khu ga Pfhumu Nungungulu,
ni gungangamela nya wugulu waye,
gikhati a na tago guta thusa litigo.
20Khu litshigu lolo, vathu va na dzudzugela
ga magondzo ni makoha
sifananiso nya vanungungulu
nya parata ni ndralama,
iso va nga si girago gasi gu si khozela.
21Vathu va na bela dziphagoni nya siwindri
ni mavbalani nya sigomo,
khu gu thava likhulo la Pfhumu Nungungulu
ni gungangamela nya wugulu waye,
gikhati a na tago guta thusa litigo.
22Khu guralo, mu nga tumbi muthu a
hefemulago khu dzithonvu.
Kholu, giphaso muni a gu nagyo uye?
Currently Selected:
Isaya 2: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
