Isaya 17
17
Giprofeto khu Dhamasiko ni Efrayimi
(Jeremiya 49:23-27; Amosi 1:3-5; Zakariya 9:1)
1Mahungu mayelano khu lidhoropa la Dhamasiko:
Wonani gukhenu Dhamasiko gu na fuviswa gu si khali gambe lidhoropa,
aholu, gu na khala marumbi basi.
2Madhoropani ya Aroweri kha gu na khala gambe muthu;
ma na khala malanga nya mitshambi,
yi zumba umo, nyamba thurugisedwa khu vathu.
3 # Wona gambe: Jer 49:23-27; Amos 1:3-5; Zak 9:1. Likhokhola la Efrayime li na fuviswa,
gumogo gambe ni mufumo wa Dhamasiko;
ni mitshaledwa ya Siriya, yi na mana wudhumo nya gufanane ni
wa sanana sa Israyeli,
a ngu ganela kharato Pfhumu Nungungulu nya
Tshivba Yatshavbo.
4Khu litshigu lolo, wudhumo wa Jakobe wu na vbungudwa,
a na wondra a tshala khu marambo.
5Gu na fanana ni muvbweri a vbwerago tirigu,
a wungedzelago mahwatshu khu mandza yaye,
fanana gambe ni wule a vbwerago tirigu
kovani ga Refayimi.
6Aholu gu na tshala gwaye vadugwana nya guvbanye,
gukhwatshi khu gu bani gu havedwe
wuguhu gu tshaledzela wumbe nya gukari dzitshokhani nya matamo.
Wa gu kutsungwa gu tshala dzikhongoba dzimbili mwendro
dzitharu khu matamoni ya vbatshani,
ni dzina mwendro livbandre, khu dzitshokhani
nya matamo nya gunave.
A ngu ganela Pfhumu Nungungulu wa Israyeli.
7Khu litshigu lolo, muthu a na khedza Muvangi waye,
maho yaye ma na khedza Nyaguage wa Israyeli.
8Kha va na khedza gambe sihuru sawe nya miphaso,
esi va nga dzi girelago khu mandza yawe,
ambari gu khedza gifananiso gya Asitaroti gi nga girwa
khu dzinyala dzawe,
ambari gu khedza
giluvelo nya guvbisele libani.
9Khu litshigu lolo, madhoropa yawe nya makhokhola ma na khala kha nga malanga nya marumbi ya khabini, ni dzitshokani nya sigomo, umo va nga tutumelago umo khu gu thava va na Israyeli,#17:9 Vambe vari, khavo: Kha nga gu nga giregago galegaleyo ga madhoropa ya Vahevhi ni Vaamori, mbeli ga sanana sa Israyeli. gu na tshala nari giwula basi.
10 # Wona gambe: Isa 1:9. Kholu u divade Nungungulu
nya guvbanyiswe gwago,
u divaledwa khu Likhokhola nya wuthavelo wago.
Khu guralo, u di lima marembwe nya misimbo nya wumburi,
u yala dzimbewu nya gudhumise vanungungulu va nya mayigo.
11Ambari iso u na si yalago,
si vbiredzela gudandra,
khu litshigu li landrelago si thela wenge,
iso u na vbwerago si na mwalalega
khu litshigu nya gutshaniseke ni wuvi nyamba vbela.
12Yowe! Gupwala huwa nya sidzemo nya mayigo nya mangi;
kha nga gudzuma nya linene,
ni ligwaha nya vathu nya mayigo,
va dzumago kha nga mavimbi!
13Vathu nya mayigo va na gulumela kha nga
gudzuma nya mavimbi, aholu Uye a na va kawuka,
va tutuma va hongola hwindzo,
gu fanana ni mungu wa gigomoni wu
phalalegiswago khu phuvbo.
14Vbasilambotunu va gu thedwa rerema,
aholu na gu si gugi, va gu mwalalega.
Esi khiso si na dugelelago avo va hi saselago
ni vale va hi phangago.
Currently Selected:
Isaya 17: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
