Isaya 14
14
Ndzimo nya gughiye khu guthega ga Bhabhiloni
1Kholu Pfhumu Nungungulu a na pwela gisiro nyumba ya Jakobe, a dzi hathela va na Israyeli, va ta vbaha tigoni gwawe nya mavelego, va nya mayigo va nata tshangana gumogo navo, va dzi patanisa ga lihundzu la Jakobe.
2Va nya mayigo va na va dzega va va yisa malangani gwawe, aholu vathu vovo nya vama ni vanyamayi, va na fumedwa khu nyumba ya Israyeli, tigoni ga Pfhumu Nungungulu. Va gira dzikhumbi vale va nga girwago khavo dzikhumbi, bwelo khavbo va tshanisa avo va nga tshaniswago khavo.
3Litshigu Pfhumu Nungungulu a na gu bani a mi ningide guhefemula ga mithumo yanu yatshavbo, ga tshanisa yatshavbo, ni ga wugumbi watshavbo va mi giredego, 4mu na emba ndzimo yeyi nya gutsorodzele mufumeli wa Bhabhiloni, khenu:
Mutshanisi thegede hayi! Ni dzihanyi dzaye dzi vbede kharini!
5 Pfhumu Nungungulu fanyeledzede ndronga ya va nya guvivbedwa khu monyo,
ni ndronga ya vakhozisi.
6Yile yi nga bani yi veta vathu khu dzihanyi,
a va thela dzimbanga nyamba vbola,
a fumela mayigo khu gigaha,
a va tshanisa nyamba himbedzedwa khu muthu.
7Olu litigo latshavbo lomo gurulani!
Va gu womba mikulungwane va embelela khu gutsaka.
8Ambari ni misimbo nya mindziri yi ngu tsaka,
ni misena ya Libhanoni yi ngu samala, khiyo:
Gukhugela avbo u thegidego,
mwalo a tago a ta hi koka.
9Lithowo li dzi emisede guta gu hakha,
gasi li duga li ta gu hakha avbo u natago,
khu kotani gwago ilo li ngu wusa vatshavbo va fudego
ni vathangeli vatshavbo va mafuni,
vafumeli vatshavbo va mafuni, va na khuswa khu vbasikhalotunu gwawe nya wufumu.
10Vatshavbo va na gu embela, khavo:
Gasi uwe nuwe u dwade kha nga ethu, gani?
Uwe nuwe u ngu fanana ni ethu, gani?
11Matshandza yago ma rinyidwe phalani,
ma patwa ni gudzuma nya dzimbila dzago,
lidawu lago khu guhina, siwungu i vholo wago.
12 # Wona gambe: Gutu 8:10; 9:1. Uwe u gu thandra nya gugye,
nyamahegyane nya Wuronga,
u thegide kharini khu ndzadzini!
Uwe u thesidego mayigo nya mangi,
u thegide kharini vbavbatshi!
13Kholu u di gu ganela khu monyoni gwago, khuwe:
Nyi na khugega nyiya kala ndzadzini,
gikhalo gyangu nya wufumu nyi na gi khusedza
vbatshani nya dzinyeledzi dza Nungungulu,
nyi na khala gigomoni nya tshangano,
khu phuvbo ga Wuronga.
14Nyi na khugega nyi vbindra ni mapfhi,
nyi fanana ni oyu a Khusegidego Ngudzu.
15 # Wona gambe: Mat 11:13; Luk 10:15. Aholu, u na rinywa thowoni nya vafi,
phalani nya guete ngudzu.
16Avo va na gu wonago va na samala, khavo:
Khandruye oyu a nga bani a ndrendremedzisa mafu,
a kutsunga ni mifumo, gani?
17A nga bani a gira litigo li khala giwula, madhoropa ma khala marumbi,
a nga bani a si tshuli dzikhumbi
dzaye dzi bwelela magaya gwawe, gani?
18Vafumeli vatshavbo nya mayigo, va dzingidwe khu wuzundzo,
moyo ni moyo thowoni gwaye.
19Aholu uwe wa gu dzudzugwa hwindzo ni lithowo lago,
u fanana ni litamo nyamba phasa gilo,
girumbi gyago gi na rinywa phalani nya siwindri,
gi fenengedzwa khu sirumbi sa avo va nga songwa khu matshari,
avo sirumbi sawe si relelago phalani, si pfareledwa khu siwindri.
20Khu na dzingwa navo,
kholu u sasede litigo lawe u songa vathu vawe.
Livelego la va nya guvivba, gima kha li na alakanywa gambe.
21Lulamisani wulanga nya gusongele avbo
sanana sawe,
si livba nandru nya sighoho sa vavelegi wawe,
gasi va si wugi va fuma litigo
va tadza litigo khu madhoropa yawe.
22Kholu, Pfhumu Nungungulu nya Tshivba Yatshavbo,
a ngu ganela, khuye: “Nyi na va wugela,
nyi fuvisa lina la Bhabhiloni,
nyi songa mitshaledwa yaye,
livelego laye ni situgulwana.”
A ngu ganela Pfhumu Nungungulu.
23 # Wona gambe: Isa 47:1-15; Jer 50:1—51:64. Nyi na li gira li khala
wuvbahelo nya mapfhuguli.
Li na vbindrugedza li khala wulanga nya mati nya guhine,
nyi na li vbiyela khu piyelo nya gumbembise,
a ngu ganela Pfhumu Nungungulu nya Tshivba Yatshavbo.
Giprofeto khu Asiriya
24 # Wona gambe: Nah 1:1—3:19; Sof 2:3-5. Pfhumu Nungungulu nya Tshivba Yatshavbo, a di sambanya, khuye:
Makungo yaya nyi ma pimisidego, ma na tadzisega,
ni esi nyi hungidego, si na girega.
25Nyi na fanyeledzela Vaasiriya, va guromo tigoni gwangu,
nyi va gandredzela khu migondro musigomoni gwangu,
gasi va rula kanga va hungidego Israyeli,
ni gu rula rwalo magatani gwaye.
26Aya khu makungo ma hungidwego tigoni gwatshavbo;
egi khu gyandza gi thawuludzidwego ga mayigo yatshavbo.
27 # Wona gambe: Isa 10:5-34; Nah 1:1—3:19; Sof 2:13-15. Pfhumu Nungungulu nya Tshivba Yatshavbo a si hungide;
khu mani a na gu si ganedzago, na?
Gyandza gyaye a gi thawuludzide;
khu mani a na gi bweledzago hwane?
Giprofeto khu Vafilisitiya
28 # Wona gambe: 2 Dzipf 16:20; 2 Dzik 28:27. Mwaga a fudego khuwo mufumeli Akazi,
ma tivisidwe mahungu yaya, gupwani:
29Enu Vafilisitiya mwatshavbo mu nga nengeli,
kholu yi fanyeledzedwego ndronga yi nga bani yi mi tshanisa,
kholu girumbi nya nyoga gya gu dusa wuhungu,
ni umo nya litandra nya nyoga gu duga mwamilambo.
30Matiwula nya sisiwana ma na khura,
ni sisiwana si na lala ligovbe nya gutenge,
gasi enu Vafilisitiya, nyi na mi songa khu ndzala,
mitshaledwa yanu, yi na mbembiswa.
31 # Wona gambe: Jer 47:1-7; Ezek 25:15-17; Joy 3:4-8; Amos 1:6-8; Sof 2:4-7; Zak 9:5-7. Womba huwa uwe nyangwa,
lila uwe lidhoropa,
ndrendremelani enu Vafilisitiya mwatshavbo;
kholu, gu nguta wutshi khu Wuronga,
ni moyo a nga khugi khu wulangani gwaye.
32Va na ningwa phindrulo muni avo va
rumedwago khu va nya mayigo vovo?
Pfhumu Nungungulu khuye a vbahidego lidhoropa la Siyoni,
gasi va mana wuthavelo vale va tshanisekago vbakari ga vathu vaye.
Currently Selected:
Isaya 14: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
