Isaya 13
13
III. NUNGUNGULU A NGU LAMULA MAYIGO
(13-23)
Giprofeto khu mahungu ya Bhabhiloni
(Jeremiya 50:39; Matewu 29; Luka 21:25; Gutuledwa 6:12)
1Aya Mahungu nya gupfhungumudwe ga Bhabhiloni ma nga woniswago ga Isaya, mwamana wa Amosi:
2“Ghwimbani ngavbya vbatshani nya gigomo
nyambana misimbo;
khusani lito, va khweneteni khu mandza,
gasi va ta bela khu myanya ya vathu nya guthavisege.
3Nyi ningide nayo sihathwa sangu,
ina, nyi ranide dzindrena dzangu,
edzi dzi dwanelago wugulu wangu,
gasi va thuma thumo nya likhulo langu.
4Yingisani ligwaha li pwalago vbatshani nya sigomo,
la gu fanana ni ligwaha nya gidzemo nya gingi,
ligwaha nya mifumo nya mayigo ma tombanidego.
Pfhumu Nungungulu nya Tshivba Yatshavbo,
a nga gu simama gu rana masotshwa nya nyimbi.
5Va guta khu mayigoni ya hwindzo nya mahegiso nya lidambo.
Khu Pfhumu Nungungulu ni matshari nya likhulo laye,
a tago guta sasela litigo latshavbo.
6 # Wona gambe: Ezek 30:2-3; Joy 1:15; Sof 1:14-18; Mal 3:2; Gutu 6:17. Wombani huwa khu guvbisega, kholu Litshigu la Pfhumu Nungungulu li vbohide;
la guta khiyo ga uye nya Tshivba Yatshavbo gasi guta mbembisa.
7Khu guralo, vathu vatshavbo va na vbela tshivba,
vathu vatshavbo va na pilega hwambo.
8Va na thurugiswa ngudzu;
va modwa khu sigaradzo,
va saniseka gu fanana ni nyamayi nya gulumwe,
va na khedzisana khu gyawe na va gu samala,
dzikhovbe dzawe dzi ngangamela kha nga nilo.
9Wonani, li nguta Litshigu la Pfhumu Nungungulu,
litshigu nya guthise ni likhulo li khondrago,
gasi gu vbindrugedza litigo li khala marumbi,
gumogo ni gu mbembisa sighohi si vbanyago umo.
10 # Wona gambe: Ezek 32:7; Mat 24:29; Mark 13:24-25; Luk 21:25; Gutu 6:12-13; 8:12. Kholu dzinyeledzi ni dzithandra dzaye,
kha dzi na wenengedza gambe;
lidambo li na pfhupedziswa li nga gu duga,
ni ngima kha wu na wenengedza gambe.
11Nyi na tsayisa litigo khu kotani nya guvivbe gwaye,
ni va nya guvivba khu kotani nya gughohe gwawe,
nyi fuvisa matshandza ya avo va dzi khusedzago,
nyi thela dzitshoni avo va dzi gugumugisago ni va nya dzihanyi.
12Nyi na gira vathu va kala guvbindra ndralama nya guhutwe,
va na hamugega guvbindra ndralama ya Ofiri.
13Khu guralo, nyi na ndrendremedzisa damboni;
mafu ma na khuga wulangani gwaye,
khu kotani nya likhulo la Pfhumu Nungungulu
nya Tshivba Yatshavbo,
ni kotani nya litshigu nya likhulo laye nya guthise.
14Moyo ni moyo a na thava kha nga yisya, a fanana
ni tshambi wu gu mwalo muhavisi;
muthu ni muthu, a na bwelela ga va na gyawe,
vatshavbo va thavela tigoni gwawe.
15Uye a na manwago a na songwa,
vatshavbo va na modwa va paywa khu matshari.
16Sanana sawe sa beleni si na pfareledwa mbeli gwawe,
dzindranga dzawe dzi na phangwa,
vagadzi vawe, va na
pfinywa va sagaredwa.
17Wona, nyi na va ranela Vamedhi,
avo va si khathaligo khu parata, ambari gudogorela ndralama.
18Malaho yawe va na songa khayo madzaha;
gima kha va na pwa gisiro khu sanana si ngarigu ndrani;
maho yawe kha ma na tsetsa sanana sa beleni.
19 # Wona gambe: Gen 19:24. Bhabhiloni, oyu a gu mburi ga mifumo yatshavbo,
lidhoropa nya matshandza ya Vakalidhiya ni wuzundzo wawe,
li na fanana ni Sodhoma ni Ghomora, ayo Nungungulu a nga ma mbembisago.
20Gima kha gu na khala gambe muthu umomo,
vathu kha va na vbaha umo kala gupindruga;
ambari Vaarabhi kha va na nga tsitsa gambe mitshatsha yawe umo,
ni vahavisi kha va na gira gambe umo mazumbo nya mitshambi.
21 # Wona gambe: Isa 34:14; Sof 2:14; Gutu 18:2. Aholu, sirengo sa giwulani si na lala umo,
dzinyumbani gwawe gu na tala khu mapfhuguli;
gu na lala umo masekwa, ni vamangulwe va na ndragandraga umo.
22Dzinyumbani gwawe nya wufumu, gu na emba migehe,
makhokholani gwawe, gu na emba vanyadugwi;
gikhati gyawe gyomo vbafuvbi ni gu vboha, ni matshigu yawe ma rode.”
Currently Selected:
Isaya 13: BGG2014
Highlight
Share
Copy
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
