Dhewuteronome 28

Sikategiso ga vale va yingisago

(Levhi 26:3-13; Dhewuteronome 7:12-26)

1Mosi a di ganela, khuye: “Wa gu yingisa gwadi lito la Pfhumu Nungungulu wago, u sayisa gwadi milayo yaye nyi gu ningago muhuno, Pfhumu Nungungulu wago, a na gu khusedza vbatshani nya mifumo yatshavbo ya mafuni. 2Wa gu yingisa lito la Pfhumu Nungungulu wago, makategwa yaya yatshavbo ma na tshiga vbatshani gwago.

3Uwe u na kategiswa dhoropani gwago

u kategiswa gambe ni mahangeni gwago.

4Wu na kategiswa melego wago,

ni mihandro ya thembweni gwago,

ni mihandro nya sifuyo sago,

a gu marole nya dzimombe dzago ni dzinvuta dzago.

5Gi na kategiswa gitundru gyago

ni mbiya yago nya gusugele wuguvbi.

6U na kategiswa gikhati u belago ni gikhati u gudugago, 7Pfhumu Nungungulu a na gu ninga tshivba nya gupale valala vago va na gu wugelago; va nata khu ndzila mweyo gasi guta dwana nago, aholu va na phalalega va thava khu livbandre na dzimbili dzindzila.

8 Pfhumu Nungungulu a na rumela makategwa sithungani gwago ni ga yatshavbo mithumo ya mandza yago; a na gu kategisa ga litigo u ningwago khu Pfhumu Nungungulu wago.

9Wa gu vegedza milayo yaye, Pfhumu Nungungulu a na gu emisa u khala litigo laye nya guage, kha nga idzo a sambanyidego khidzo Pfhumu Nungungulu wago, wa gu gimbila khu dzindzila dzaye. 10Mayigo yatshavbo ya mafuni ma na gu wona na wu gu ranwa khu lina la Pfhumu Nungungulu, ma na gu ninga githawo. 11Pfhumu Nungungulu a na andrisa mihandro nya melego gwago, sifuyo sago si na velegelana, ni mahangeni gwago gu na fuma mihandro nya yingi, ga litigo eli Pfhumu Nungungulu a sambanyidego ga vababe vago gu gu ninga.

12 Pfhumu Nungungulu a na gu tulela thomba yaye nya yadi, ndzadzini, a gu ninga ndzadzi tigoni gwago khu gikhati gyakone ni gu kategisa thumo watshavbo nya mandza yago; u na fuyarisa mayigo nya mangi, aholu uwe khu na fuyari gilo. 13Wa gu yingisa milayo ya Pfhumu Nungungulu wago, nyi gu rumago muhuno gu yi vegedza ni gu yi landrisa, Pfhumu Nungungulu a na gu khusedza vbatshani a gu vega avbo nya gikhalo gya mbeli, na siri gya hwane. 14U nga ndreyi uya nyamudye mwendro nyambade ga magana yatshavbo nyi gu ningago muhuno, khu gu landrisela vambe vanungungulu u va khozela.

Tsayiso khu gumba yingisa

(Levhi 26:14-46)

15Aholu, wa gumba yingisa lito la Pfhumu, Nungungulu wago, u si khathali khu gu landrisa milayo ni sileletelo saye nyi gu ningago muhuno, dzitshanisa dzi na gutago vbatshani gwago khedzi:

16U na vadwa madhoropani gwago

u na vadwa gambe ni marembweni gwago.

17Gu na vadwa gitundru

ni mbiya yago nya gusugele umo wuguvbi.

18Gu na vadwa ni handro nya melego wago,

ni mihandro nya mafu yago,

ni marole nya dzimombe ni dzinvuta dzago.

19U na vadwa wa gu bela,

u vadwa wa gu duga.

20 Pfhumu Nungungulu a na resa libango vbatshani gwago, pfilupfilu, gutshaniseka ni gu luzekedwa khu mithumo yatshavbo ya mandzani gwago, kala u mbembiswa khu guvbiredza, khu kotani nya mithumo yago nya guvivbe u yi giridego khu guhambana ni eni. 21Pfhumu Nungungulu a na gu rumela tungu wu gu namarela, kala wu gu fuvisa ga litigo u yelago guya li dzega u li fumela. 22Pfhumu Nungungulu a na gu veta khu madwali nya gikhohola, dzedzedze, gindrendrewane, gisimba mwendro giwumbwa ni guvbisa nya guthise, ni gu hina nya dzimbewu, dzinyimbi ni mitungu yi na gu lundrago kala u fuva. 23Ndzadzini gu na banga gukhwatshi sugu vbatshani nya hungo wago, ni mafu vbavbatshi nya migondro yanu ma na banga kha nga simbi. 24Pfhumu Nungungulu a na diga gu wisa ndzadzi tigoni gwago, a gu resela kudzudzwane ni nguma, esi si na gu thegela kala si gu mbembisa.

25 Pfhumu Nungungulu a na gu thesa mbeli ga valala vago; khu ndzila mweyo u na duga guya dwana ni valala vago, aholu u naya tutuma mbeli gwawe khu livbandre na dzimbili dzindzila; khu guralo, u na khala gihegiso ga mayigo yatshavbo ya mafuni. 26Girumbi gyago gi na khala guhodza nya sinyoni sa damboni ni sirengo sa mafuni, mwalo a na kodzago gu si tutumisa. 27Pfhumu Nungungulu a na gu veta khu mitungu ya tigoni ga Egipito; gumogo ni sithunya ni mbatata, ni gighwere ni gu dzi tshuvela si si kodzwigo gu halawugiswa. 28Pfhumu Nungungulu a na gu veta khu lihure, ni wukhumu, a gu handrugisa ni gupepuga mapimo 29mihani u na phiphithela khwatshi u gikhumu gi phiphithelago mugidemani, mudzindzilani gwago gima khu na dugelela, aholu u na mana basi gutshaniseka ni gubedwa matshigu yatshavbo nya guvbanye gwago; mwalo a na ta gu vbanyisago.

30U na lowola nyamayi, aholu a ta lala ni mumbe mwama; u na vbaha nyumba, aholu gima khu na lala umo; u na lima lithembwe, aholu u si hodzi mihandro yakone. 31Mombe yago yi na songwa na wu gu yi wona, aholu khu na hodza nyama yaye; buru yago yi na bidwa nu gu yi wona, aholu kha yi na wuya gambe avbo gwago; dzinvuta dzago dzi na ningedwa ga valala vago; aholu mwalo a na ta gu vbulugisa. 32Sanana sago nya sikhwathana ni vanyamahegyane si na ningedwa ga mambe mafumbu; aholu maho yago ma na wona isoso, ma vbela tshivba khu gusuva matshigu yatshavbo; aholu mandza yago gi mwalo ma na gu gi kodza gu gira. 33Mihandro ya mahangeni gwago, ni thumo wa mandzani gwago, si na hodzwa khu vathu u gumba vati; uwe u na tshaniswa ni gu tshonigiswa matshigu yatshavbo; 34u na handruga khiso u na si wonago khu maho yago. 35Pfhumu Nungungulu a na gu khuyusela dzikhungumudzi ni dzinyonga, a na gu veta khu sithunya nya gunyenyeze, avbo u na gumba si kodza gu si vbodzisa, gukhugela gitshinandroni kala vbatshani nya hungoni gwago.

36 Pfhumu Nungungulu a na gu dzega uwe gumogo ni mufumeli, u na mu emisago gu khala mufumeli wago, a gu yisa ga vathu u gu gima uwe ni vababe vago mu si gu vati; iyoyo u na ya khozela vambe vanungungulu nya guvatwe khu misimbo ni siwindri. 37U na khala gipoyilo ni gisamadziso, vbakari nya vathu vale Pfhumu Nungungulu, a na gu yisago gwawe.

38Mahangeni gwago u na yala dzimbewu nya dzingi; aholu uwe u na vbwera dzidugwana, kholu dzi na bani dzi hodzidwe khu dzimbera. 39U na lima u yala miuvha nya mingi, aholu uwe gima khu na sela wadwa wakone, ambari gu havela dziuvha dzakone, kholu dzi na bani dzi hodzidwe khu siwungu. 40Mitshafura yi na manega mivbinganoni gwago gwatshavbo; aholu uwe khu na tola mafura yakone, kholu dzitshafura dzaye dzi na thegelela. 41U na velega sanana nya sikhwathana ni vanyamahegyane, aholu gima khu na khala navo, kholu va na vbagedwa va yiswa wugumbitunu. 42Misimbo yatshavbo yi ningago mihandro ya tigoni gwanu, yi na hodzwa khu mbasa.

43Muluveli a vbanyago vbakari gwago a na khusedzwa ngudzu, gasi uwe u na vbwasamiswa. 44Uye a na gu fuyarisa silo saye, aholu uwe khu na dzi kodza gu mu fuyarisa gilo, uye a na thanga mbeli, aholu uwe u na khala mahegisela.

45Uwe u na landreledwa khu mabango yatshavbo yaya, kala ma gu mana, ma gu mbembisa, kholu khwa yingisa lito la Pfhumu Nungungulu wago, gasi u vegisa ni gu landrisa milayo yaye ni sileletelo esi a gu ningidego. 46Silo sesi si na dugelela ga uwe gumogo ni situgulwana sago kha nga giyeyedzo ni gisamadziso kala gupindruga. 47Kholu uwe khwa khozela Pfhumu Nungungulu wago, khu gutsaka ni monyo wago watshavbo, gikhati a nga mi kategisa khu gu fuma satshavbo. 48Khu guralo, u na thumela valala avo Pfhumu Nungungulu a na gu va rumela avbo gwago, va ta gu tshanisa khu ndzala, lidora, wuhagadzo ni wusiwana nya wukhongolo ngudzu; avo va na gu rwega kanga nya dzisimbi nya gulemele thamoni gwago, kala va gu mbembisa.

49 Pfhumu Nungungulu a na guresela khu hwindzo, khu mahegiso nya litigo, mufumo wu vbuvbago gu fanana ni lighama; vathu vaye u si litigo ni lidimi va ganelago, 50mufumo nya dzihanyi ni khovbe nya guvivbe nyamba pwela gisiro gikhosane ambari gu tsetsa sanana! 51Vathu vovo va nata hodza mihandro nya sifuyo sago ni mihandro ya mahangeni gwago kala u gumbembiswa; kha va na gu tshiyela ambari ni tirigu, vbinyu, mafura, sifuyo sago nya dzimombe ambari ni sanana nya dzinvuta dzago kala a gumbembiswa. 52Va na gu randrela madhoropani gwago gwatshavbo, kala ma thega mabhiyo yago nya gulaphe tigoni gwatshavbo ni makhokhola u na bani u gu ma tumba, a na gu randrela ga litigo latshavbo eli Pfhumu Nungungulu wago a nga gu ningago.

53U na hodza ni handro wa mahembeni gwago ni nyama nya sanana sago nya sikhwathana ni sagadzyana, esi Pfhumu Nungungulu wago a gu ningidego, gikhati valala vago va na gu randrelago. 54Mwama nya ndruda, nya monyo nya wadi ngudzu vbakari gwanu, a na khala ligungo, a khedza ndriyaye khu maho nyambasi yadi, a vengelela mwangadzi waye nya gu mu haladze gumogo ni sanana saye si na gu bani si nga tshade, 55kholu kha na vbweta gu kabana naso, nyama ya sanana saye a hodzago; kholu kha nga tshiyedwa gilo gikhati u nga randredwa khu valala madhoropani gwago gatshavbo. 56Nyamayi nya ndruda ngudzu ni wukheta vbakari gwanu, a si vbwetigo ni gu gandra vbavbatshi khu ngodro waye khu kotani nya gu dzi tshandze gwaye, a na gira ligungo, a na khedzisa khu maho nyambasi yadi mwama waye nya gu mu haladze, sanana saye nya sikhwathana niso nya sagadzyana; 57a na hodza khu gisihaledza satshavbo ambari lighulu li dugago khu mahembeni gwaye ni sanana a ngari gu velegago; khu gu hamugega nya silo satshavbo, khu kota nya gurandredwe khu valala madhoropani gwago.

58Wa gumba khathala khu gu landrisa magana yaya nya Nayo, ma lovidwego libhukuni momu, khu githawo ga lina nya wuzundzo ni wudhumo la Pfhumu Nungungulu wago, 59Pfhumu Nungungulu a na gu veta khu mitungu nya gu samadzise, uwe gumogo ni situgulwana sago; mitungu yeyi nya yikhongolo nya gusimame ni madwali nya gugaradze nya mangi ngudzu nyamba saywa. 60U na bayiswa khu mitungu yatshavbo ya tigoni ga Egipito, mitungu yeyi yi nga bani yi gu thavisa, olu u na dwala khiyo. 61Pfhumu Nungungulu a na gu rumela gambe ni mambe madwali ni sitshaniso ma ngamba lowa ga libhuku nya Nayo yoyu, kala u mbembiswa. 62Va na tshala vadugwana vathu vbakari gwanu va na vbulugago, hwane nya gu na mu engedzelane mu khala vangi kha nga dzinyeledzi dza ndzadzini; satshavbo sesi khu kotani u ngamba yingisa lito la Pfhumu Nungungulu wago, 63Kha nga olu Pfhumu Nungungulu a tsakago khu gu mi kategisa, a mi andrisa, khidzo gambe kharato Pfhumu Nungungulu a na tsaka khu gu mi pfhungumula ni gu mi mbembisa; a nenu mu na duswa ga litigo mu yago ga ilo guya li fumela.#28:63 Pfhumu a gu tivisa va na Israyeli iso si na gu va dugelelago gikhati va na gu bani vari mandzani ga valala vawe, esi sa gu yeyedza gukhwatsi khu hwane nya esi, a gu vona iso si na gu va dugelelago na vari wugumbitunu.

64 Pfhumu Nungungulu a na mi phalalegisa ga mayigo yatshavbo gukhugela mahegiso kala mambe mahegiso nya litigo; iyoyo mu na ya thumela vanungungulu nya guvatwe khu misimbo ni siwindri, avo mu si vatigo ambari vababe vanu navo va ngamba vati. 65Ambari vbakari nya mayigo yoyo, khu na ya mana gurula, ambari wulanga nya guvege gitshinandro nya ngondro wago. Kholu iyoyo Pfhumu Nungungulu a na gu ninga monyo nya gundrendremele, ni maho nya gupfhupele, ni hefemulo wu vbisegago. 66Guvbanyani gwago gwatshavbo u naya pwa gundrendremela wutshigu ni mihani, u si mani lisine nya gusimame guvbanya. 67Vbadzimindrutunu, u na ganela, khuwe: Li na pfola lini; ni kala gupfolani nya lidambo, u na ganela, khuwe: Gu nagya lini! Satshavbo soso khu kotani nya tshanisa nya monyo wago ni silo u na si wonago khu maho yago. 68Pfhumu Nungungulu a na gu bweledza khu mataro tigoni ga Egipito, ndzila nyi gu embedego, kheni: Gima khu na yi wona gambe. Avbovbo mu na ya dzi rengisani ga valala vanu, mu khala dzikhumbi nya vama ni vanyamayi, aholu mu na hamuga muthu nya gu mi renge.

IV. HUWELELO NYA WUNA WA MOSI

Nungungulu a ngu gira gidzumeledzwano nya giphya ni vathu

(Josuwa 1:7; 1 Dzipfhumu 2:1-4)

69Aya khu magana nya gidzumeledzwano, egi Pfhumu Nungungulu a rumidego Mosi gu gi tiyisa ni va na Israyeli, tigoni ga Mowabhi, gu diga nya gidzumeledzwano a gi tiyisidego navo gigomoni ga Horebhi.

Currently Selected:

Dhewuteronome 28: BGG2014

Highlight

Copy

Compare