Dhewuteronome 23
23
Vathu va si dzumedziswigo gu bela tshanganoni nya guage
1Mwama wule a nga thenwa khu guphwatiswa mwendro gu pidwa wama mwalo fanelo nya gubele tshanganoni wa Pfhumu Nungungulu.
2Muthu wule a velegidwego wubhayini a nga dzumedziswi gu bela tshanganoni wa Pfhumu Nungungulu; ambari ni situgulwana saye kala gitugulwana nya likhumi, kha va na bela tshanganoni wa Pfhumu Nungungulu.
3Vaamoni ni Vamowabhi va mwalo fanelo nya gubele avba vathu va Pfhumu Nungungulu va tshanganidego avbo; ambari situgulwana sawe kala ga gitugulwana nya likhumi kha va na nga dzumedziswa gu bela kala gupindruga. 4Kholu kha va mi khingamedza ni guhodza ni mati ndzilani, gikhati mu dugidego khu Egipito; gambe va mi rengelede Bhalahama, mwamana wa Bheyori, a khalago Peyori tigoni ga Mesopotamiya, gasi a ta mi vala. 5Khu guralo, Pfhumu Nungungulu wago, kha yingisa guvala ga Bhalahama; aholu, a di vbindrugedza givalo khu gikategiso, kholu Pfhumu Nungungulu wago a di gu mi gola. 6Khu kotani nya isoso, u nga va ningi gurula ambari wuwadi ga matshigu yatshavbo nya guvbanye gwago kala gupindruga.
7U nga nyenyi Muedhomi, kholu i ndriyago; ambari gu nyenya Mugipiti, kholu u khade muluveli tigoni gwaye. 8Sanana va na velegago, gukhugela melana nya wuraru si na dzumedziswa gu bela tshanganoni wa Pfhumu Nungungulu.
9“Gikhati li dugago libutho guya dwana ni valala vanu, dzi woneleni, mu nga giri silo nya guvivbe.”
Guaga nya lizumbo
10“Vbakari gwanu a gu manega moyo a ngamba aga khu gu bani na dzi lorede ni vbakari nya wutshigu, a na duge lizumboni; a nga beli gambe umo. 11Aholu, ni silambo a na dzi agisa khu guhamba khu mati; na li pfode lidambo a ngu dzi kodza gu bela lizumboni. 12Gambe u na bani uri ni wulanga vbavbandze nya lizumbo, avbo mu na dugelago avbo. 13Vbakari nya matshari yago u fanede nuri ni lifosola; gasi wa gu vbweta guya dzi ruma, u kemba liphala, hwane nya gu nu dzi rumide, u futela manyanya. 14Kholu, Pfhumu Nungungulu wago, womo vbakari nya lizumbo gasi gu gu vhikela, ni gu ningela valala vago mandzani gwago; khu kharato, lizumbo lago gu vbwetega na li agide, gasi uye a si woni ndzilo avbo gwago, a dzi hambanisa nago.”
Yimbe milayo
15“Khumbi ya gu thava ga mune waye, yi thavela ndrangani gwago u nga yi bweledzi u ya yi ningela ga mune waye. 16Iyo yi na khala gumogo nago, vbakari nya vathu vago, gambe yi na ni fanelo nya guhathe wulanga yi na wu golago ga limwedo nya madhoropa yago; u nga yi tshanisi.”
17Vbakari nya sanana nya sagadzyana mwendro nya sikhwathana sa na Israyeli, gu nga tshuki gu manega ni moyo nya gu dzi ningedzele thumoni nya wubhayi wa wulangani nya wukhongeli nya malipha. 18#Wona gambe: Levh 19:29. Khu guralo, u nga tshuki u yisa Nyumbani ga Pfhumu Nungungulu wago, dzitsapawu dzi manwago khu ndzila yeyi nya wubhayi nya vanyamayi mwendro nya vama, mwendro gulivba khidzo gusambanya gwago; kholu wubhemba nya wukhongeli nya malipha wu nyenyezide mahoni ga Pfhumu Nungungulu.
19U nga fuyarisi gilo ndriyago khu gu vbweta gu velegisa, dzitsapawu mwendro guhodza, ambari ni gevbini gimbe gilo gi dzi kodzago gu fuyariswa khu gufela guvelegisa. 20Muluveli, u ngu kodza gu mu lombisa khu gu vbweta guvelegisa, aholu ndriyago u nga mu fuyarisi khu gu vbweta guvelegisa, gasi gu Pfhumu Nungungulu wago, a gu kategisa ga mithumo yago yatshavbo ga litigo u na li dzegago li khala thomba yago.
Milayo mayelano khu sisambanyo
21Wa gu gira gisambanyo nya gukari ga Pfhumu Nungungulu wago, u nga hweli gu gi tadzisa; kholu khu lisine Pfhumu Nungungulu wago, kha na hwela gu gu hengula, gambe gwago gu na manega gighoho. 22Aholu, wa gu thava gu gira gisambanyo, u na bani uri mwalo nandru, 23gambe dzi garadze khu gu gira igyo u nga sambanya khu likana lago, u gira iso u sambanyidego khu gudzina gwago ga Pfhumu Nungungulu wago.
24Wa gu bela thembweni ga ndriyago, u na hodza dziuvha gukhedza khu edzi u dzinago khidzo, u na hodza kala u kodwa, aholu u nga theli gilo ravani gwago u hongola nagyo. 25Wa gu bela thembweni nya tirigu ga ndriyago, u na vbulula dzimbewu khu mandza; aholu u nga pili dzitshangi dzakone khu givbwero.
Currently Selected:
Dhewuteronome 23: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
