Dhewuteronome 21
21
Milayo khu muthu a songwago nyamba tidwa musongi
1Avbo u na ya belago ga litigo eli Pfhumu Nungungulu wago, a gu ningago gasi gu li fumela, wa gu tshuka u bela khabini, u mana muthu na fude, nu si muti uye a nga mu songago, 2gu na duga madhota ni valamuli vago va ya pima pfhukha nya gukhugele avbo a songedwego avbo, kala madhoropani yale ma manegago vbafuvbi ni girumbi. 3Khavbo avbo, madhota nya lidhoropa lile li guromo vbafuvbi ni girumbi, ma na dzega gimombyana nya ngadzi gi si gu pheligo guthumiswa, ambari gu rwala kanga, 4va relela nagyo kovani gu gu ni nondrwa nya mati ma khulungago gikhati gyatshavbo, gu ngamba limwa ni gu yadwa gilo; iyoyo va naya pila thamo nya gimombyana tsongoni momo. 5Khu hwane, vaphasi vatshavbo nya mhamba, a gu va na Levhi, va na duga vaya wulanga wowo, kholu khavo va hathidwego khu Pfhumu Nungungulu wago, gasi va mu thumela ni gu kategisa vathu khu lina la Pfhumu Nungungulu, gambe magana yawe khayo ma gu na ni fanelo nya gulamule mevbini ni mevbini mahungu nya gu vbenyisane ni gubayisana. 6Madhota yatshavbo ya dhoropani momu ma guromo vbafuvbi ni girumbi, ma na hamba mandza vbatshani nya gimombyana gi pidwego thamo kovani, 7na va gu ganela, khavo: Khandri mandza yathu ma vbaladzidego novba yoyu, ni maho yathu kha ma wu wona ni gu vbalaga. 8Pfhumu Nungungulu, tsetselela vathu vago va na Israyeli, avo uwe u va dzegisidego, u nga dzumeli gukhuwe novba nyambana nandru wu thegela vbatshani gwathu ethu vathu vago, va na Israyeli. Nandru nya novba wule wu na tsetseledwa. 9Khu guralo, u na fuvisa gighoho nya novba nyambana nandru vbakari gwago, kholu u na gira iso si lulamidego mbeli ga Pfhumu Nungungulu.
Milayo mayelano ni nyamayi nya gibotshwa
10Wa gu duga guya dwana ni valala vago, Pfhumu Nungungulu wago, a gu va ningela mandzani gwago, wa gu va mola u va gira dzikhumbi, 11wa gu tshuka u wona vbakari gwawe nyamayi nya wumburi, u mu dogorela gu khala mwangadzi wago, 12mu dzege u mu yisa gaya gwago, uye a na vbalula ndzudzu ni gu pila samba, 13a na tshula guambala gwaye nya wubotshwa, a khala gaya gwago. A na vbedza gipimo nya ngima na gu lila babe ni mayi waye. Khu hwane nya ugo, u ngu dzi kodza gu tshangana naye a khala mwangadzi wago; uwe nuwe u khala mwama waye. 14“Aholu a gumba gu tsakisa, u na mu diga a hongola khu gu dzina gwaye, kholu uwe u mwalo fanelo nya gu mu rengise khu dzitsapawu, ambari gu mu tshanisa, kholu u mu poyide.”
Dzifanelo nya matiwula
15“Mwama a gu dzega vanyamayi vavili, a gola moyo a nyenya mumbe, na velegide nave sanana, egi nya matiwula nari gya wule nya gu mu nyenye, 16litshigu a kabanisago thomba ga sanana saye, a nga tshuki a dzega fanelo nya matiwula a ningela ga gyanana gya wule nya gu mu gole mbeli ga uye a si mu goligo. 17A na ninge githawo ga gyanana nya matiwula gya nyamayi wule a si mu goligo, a mu ninga nyondro mbili nya thomba yaye yatshavbo. Kholu oyu matiwula nya tshivba yaye; gi na ni fanelo nya matiwula.”
Sanana nyamba yingisa
18“Muthu a gu bani nari ni gyanana nyamba yingisa lito la babe ni mayi waye, ambari gya gu tsayiswa gi si va yingisi, 19babe ni mayi waye, va na gi dzega, vaya nagyo ga madhota nyangwatunu nya lidhoropa lawe, 20vaya va embela, khavo: Gyanana gegi, muyeyisi ni gumba yingisa, mwalo githawo ambari gu hi yingisa, a na ni makolo ni wudhakwa.” 21Khavbo avbo, vathu vatshavbo va dhoropani gwaye, va na gi pfara khu siwindri kala gifa; khu guralo, u na vbedza guvivba vbakari gwago; va na Israyeli vatshavbo va na sipwa va khala hwanga.
Yimbe milayo
22Muthu a gu ghoha, nandru nya guyele gu songwa, a gu lamudwa a konwa khu mahungu fanede gu ya songwa khu gu hungwa ngodzi a vbayegwa vbasimbotunu. 23#Wona gambe: Gal 3:13. Girumbi gyaye gi nga khali vbasimbotunu wutshigu watshavbo; aholu gi na dzingwe litshigu lolo; kholu oyu a vbayegidwego vbasimbotunu vadwe khu Nungungulu; u nga nyenyezisi litigo eli u ningidwego kha nga thomba khu Pfhumu Nungungulu wago.
Currently Selected:
Dhewuteronome 21: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
