Dhewuteronome 18
18
Thomba ni dzifanelo dza vaphasi nya mamba ni Valevhi
(Levhi 6—7; Mitengo 18)
1Vaphasi nya mhamba nya Valevhi, gumogo ni lihundzu latshavbo la na levhi, kha va na mana gipandre mwendro thomba tigoni ga Israyeli; va na hodza miningelo nya guvbisedwe Pfhumu Nungungulu, ni sile si va lumbago. 2#Wona gambe: Mit 18:20. Khu guralo, kha va na nga mana thomba vbakari ga vandriyawe; Pfhumu Nungungulu khuye thomba yawe, kha nga a va embedego.
3Khu guralo, vaphasi nya mhamba, esi va yelago gu si mana ga vathu va ningelago miphaso khu mombe mwendro nvuta, khesi: Siphanga, hungo ni gisusu. 4U na va ninga mihandro nya guhegule nya tirigu yago, vbinyu yago, mafura yago gumogo ni mawoya nya guhegule nya dzinvuta dzago. 5Kholu Pfhumu Nungungulu wago, a mu hathide vbakari nya mahundzu yago gasi gu a thuma khu lina la Pfhumu Nungungulu, matshigu yatshavbo, uye gumogo ni sanana saye.
6A guta Mulevhi nya gukari khu ga limwedo nya madhoropa yago ya Israyeli watshavbo, umo uye a vbanyago umo, a guta khu ligolo nya monyo waye watshavbo ga wulanga Pfhumu Nungungulu a wu hathidego, 7a ta thuma khu lina la Pfhumu Nungungulu waye, gu fanana gambe ni vatshavbo vandriyaye, va na Levhi, va manegago vbale mbeli ga Pfhumu Nungungulu, 8uye a na mana guhodza nya gudingane ni gwa Valevhi vakwawe, vbavbandze ga sile a si manago khu gurengisa silo nya thomba yaye.
Guloledziswa nya sihena sa va nya mayigo
9Avbo u na belago ga litigo eli Pfhumu Nungungulu wago, a na gu ningago, u ngayi uya yedzedzela mavbanyelo nya guvivbe ya vathu va tigoni momo. 10#Wona gambe: Levh 19:26; Eks 22:18. A nga manegi vbakari gwanu ni moyo nya gugire phaso khu guvbisa mwamana waye mwendro nyamahegyane waye niloni, gambe a nga manegi oyu nya guthumise wunyanga, ni gulola dzisolo, va nya gufemba ni wuloyi; 11#Wona gambe: Levh 19:31. nya gugire sisamadziso, va nya gutshwayina, va nya sikwembu, dzinyanga ni va nya guwudzisa vafi; 12kholu vatshavbo avo va na girago isoso, manyala ga Pfhumu Nungungulu, kholu khu kotani nya manyala nya nga aya, Pfhumu Nungungulu wago, tutumiside va nya mayigo mbeli gwago. 13#Wona gambe: Mat 5:48. Uwe gu vbwetega gu khala na wu lulamide mbeli ga Pfhumu Nungungulu wago. 14Kholu vathu nya mayigo yaya u na guya ma khozisa, va gu yingela magana ya va nya gusasula ni gufemba; aholu Pfhumu Nungungulu wago kha si vbweti isoso.
Gitumbiso nya gu resedwe muprofeti nya khongolo
15 # Wona gambe: Mith 3:22; 7:37. Pfhumu Nungungulu wago, a na gu wusela muprofeti vbakari gwago ni ga vandriyago, nya gufanane ni eni; guvbweta u mu yingisa, 16gukhedza khu satshavbo esi u lombidego ga Pfhumu Nungungulu wago, gigomoni ga Horebhi, khu litshigu nya tshangano avbo mu nga, khenu: Kha nyi vbweti gupwa gambe lito la Pfhumu Nungungulu wangu, ambari gu wona nilo wowu nya khongolo, kholu nyi ngafa.
17Khavbo avbo, Pfhumu Nungungulu a di nyi embela, khuye: Va ganede gwadi satshavbo esi va ganedego. 18Nyi na va wusela muprofeti vbakari ga vandriyawe, nya gufanane ni uwe, kanani gwaye nyi na thela magana yangu, uye a na va embela satshavbo nyi na gu mu rumago. 19#Wona gambe: Mith 3:23. A gu manega uye a na gumba yingisa magana yangu, aya uye a na gu ganelago khu lina langu, eni nyabune nyi na mu rana nyita mu wudzisa.
Vaprofeti nya malipha
20Aholu muprofeti a na gu tshuka a ganela khu lina langu nya sa mu ruma, mwendro gu ganela khu lina la vambe vanungungulu, muprofeti yoyo a na songwa afa.
21Wa gu ganela khu monyoni gwago, khuwe: “Nyi na mati kharini magana yaya, olu Pfhumu Nungungulu a ngamba ganela? 22Dziti gwadi nya gukhuwe muprofeti yoyu a gu ganela khu lina la Pfhumu Nungungulu, aholu magana yaye ma si landriswi, ni gumba dugelela kha nga idzo a nga profetago khidzo, gu yeyedza gupwani magana yoyo khandri ya Pfhumu Nungungulu; a ma ganede khu matshandza yaye muprofeti yoyu; u nga thedwi hwanga khuye.”
Currently Selected:
Dhewuteronome 18: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
