Dhewuteronome 1
1
I. HUWELELO NYA GUHEGULE WA MOSI PANINI GA JORIDHANI
Mosi a ngu ganela matimo ya Israyeli
1Khayo aya magana a ganedego Mosi ga tshangano watshavbo nya vathu va na Israyeli, vari tshatugo gwa Joridhani, giwulani, tigoni ga Arabha, thonono ni yiphwa ya Sufe mbeli ga Parani, Tofeli, Labani, Hazeroti ni Dhi-Zahabhe. 2Pfhuka nya gudingane liendro nya likhumi na limwedo matshigu gukhugela Horebhi, khu ndzila nya gigomo gya Seyiri kala Kadhesi-Bharineya.
3Khu mwaga nya magumana, khu litshigu nya guhegule nya ngima nya likhumi na moyo, Mosi a di ganela ga sanana sa Israyeli, gukhedza khu satshavbo iso a nga rumwago khu Pfhumu Nungungulu gu va embela, 4hwane nya gu bani na songidwe Seyoni, mufumeli wa Vaamori, a nga bani a gu vbanya Hesibhoni, ni Ogi, mufumeli wa Bhasani, a nga bani a gu vbanya Asitaroti, tigoni ga Edhireyi.
5 # Wona gambe: Mit 21:21-35. Khu tshatugo gwa Joridhani, tigoni ga Mowabhi, Mosi a di rwala thumo nya gu tshamusele nayo yoyu, a va embela, khuye:
6 Pfhumu Nungungulu wathu a hi embede na hiri gigomoni ga Horebhi, khuye: “Mu khade gikhati nya gingi mugigomoni momu.” 7Olu khugani mu hongola sigomoni sa Vaamori, gumogo ni sa vaakelane vawe, ni panini, ni tigoni nya sigomo, ni releloni, ni Marandzi ni gitsongwanani gya bambe nya yiphwa, litigo la Vakhanani, ni Libhanoni kala tsongo nya wukhongolo wa Ewufrate.
8Khilo eli litigo nyi li vegidego mbeli gwanu; belani mu fumela litigo Pfhumu Nungungulu, a ningidego khu gu sambanya ga vababe vanu, Abrahama, Isaki ni Jakobe, gwawe ni ga livelego lawe li nga gutago.
Guemiswa ga valamuli gasi gu phasedzela Mosi
(Ekisodha 18:13-27; Mitengo 11:16-17)
9Khu gikhati gyogyo gya gimwegyo, nyi mi embedeni gukheni: Eni nyenga kha nyi na dzi kodza gu mi thangelani mwatshavbo. 10Pfhumu Nungungulu wanu, a mi andriside ngudzu, muhuno mu vathu nya vangi ngudzu kha nga dzinyeledzi dza ndzadzini. 11Pfhumu Nungungulu wa vababe vanu, a na mi gire mu andra guvbindra likhumi mazana dzinyondro dzi wuyeledwago khu likhumi mazana guvbindra tengo mu gu uwo, bwelo a mi kategisa, kha nga a mi tumbisidego khidzo. 12Nyi di hadza gu wu kodza kharini nyenga rwalo wanu, ni mayunga yanu? 13Hathani vama nya guti, nya gugengele ni gupima, gukhedza khu mahundzu yanu, gasi va khala vathangeli vanu.
14Khavbo avbo, mu di nyi hakha mu nyi embela, khenu: Gwadi gu landrisa magana u hi embedego. 15Khu guralo, nyi hathide vathangeli nya mahundzu yanu, vama nya guti ni mapimo, nyi va gira vathangeli vbakari gwanu, vathangeli nya likhumi mazana, vathangeli nya lizana, vathangeli nya livbandre magumi, vathangeli nya likhumi ni manganagana, gukhedza khu mahundzu yanu.
16Khu gikhati gya gimwegyo, nyi leletede valamuli vanu, nyi va embela, kheni: Upwani mahungu ya vandriyanu, mu va lamula khu gululama vbakari ga muthu ni ndriyaye mwendro muluveli a vbanyago naye. 17Mu nga lamuli khu gihathela, yingisani uye nya dugwana kha nga uye nya khongolo; mu nga thavi khovbe ya muthu, kholu gulamula khwa Nungungulu; aholu mahungu ma na gu mu garadzelago ma reseni eno gwangu, eni nyi nata ma yingisa. 18Khu guralo, khu gikhati gyogyo, nyi mi leletedeni silo satshavbo mu yelago gu gira.
Mosi a ngu rumela likhumi na vavili vama gasi guya sola litigo la Khanani
(Mitengo 13:1-24)
19Khavbo avbo, hi di khuga khu Horebhi hi gimbila khu giwula gile nya gikhongolo nya guthise mu gi wonidego, khu ndzila nya sigomo sa Vaamori kha nga idzo Pfhumu Nungungulu wathu, a hi leletedego khidzo; kala hi vboha Kadhesi-Bharineya. 20Khavbo avbo, eni nyi di mi embelani, gukheni: Na mu vbohide mayigoni nya sigomo sa Vaamori, aya Pfhumu Nungungulu wathu, a hi ningago. 21Wona nya gukhuwe Pfhumu Nungungulu wago, a gu ningide litigo leli. Gwela, u ya li dzege, u li fumula kha nga idzo a ganedego khidzo Pfhumu Nungungulu wa vababe vago: U nga thavi, gambe u nga thurugi.
22Khu guralo, enu mwatshavbo mu dzudego gwangu mu ta ganela, khenu: Hi na phela khu gu rumela vama mbeli gwathu, gasi guya sola litigo, gasi va ta hi embela khu yevbini ndzila hi yelago gu bela khiyo ni gu khu mevbini madhoropa hi yelago gu hongola.
23Esi nyi di si wona na si khade gwadi; avbo nyi nga dzegago vbakari gwanu, likhumi na vavili vama, khu ga lihundzu ni lihundzu. 24Avo va di hongola va bela khu ndzila nya sigomo, na va vbedzide gusola litigo, va dita kala kovani wa Esikoli, 25va phara mandzani gwawe mihandro ya tigoni mule, va hi resela, va hi tivisa, khavo: “Litigo hi ningwago khu Pfhumu Nungungulu wathu khyadi!”
Gu bikedwa nya thumo wu nga girwago khu vasoli
(Mitengo 13:25-33)
26 # Wona gambe: Dhet 9:23; Hebh 3:16. Aholu enu kha mwa dzinani gu hongola, mu di kanyisa sileletelo sa Pfhumu Nungungulu wanu. 27Mu di ngurangura khu mitshatshani gwanu, mu ganela, khenu: “Pfhumu Nungungulu a ngu hi zondra; Khidzo kharato, a hi dusidego khidzo tigoni ga Egipito, gasi guta hi ningela mandzani ga Vaamori va hi mbembisa. 28Hi na hongola hayi? Vandriyathu va hi pide hwambo, khavo: Vangi gambe sidandrangulu; madhoropa yakone makhongolo na ma bhiyidwe khu makhokhola kala damboni. Hi wonide gambe iyoyo vathu nya sidandrangulu sanana sa gidandrangulu Anaki.”
29Khavbo avbo, eni nyi mi embedeni, kheni: Mu nga thurugini gambe mu nga va thavi. 30Pfhumu Nungungulu wanu, a na thanga mbeli gwanu, Uye a na mi dwanelani kha nga iso a hi giredego, na mu gu si wona khu maho yanu, tigoni ga Egipito, 31#Wona gambe: Mith 13:18. niso a giridego gambe giwulani, avbo mu wonidego nya gukhenu Pfhumu Nungungulu wanu, Uye a mu pharide khu libogo kha nga muthu a pharago gyanana gyaye khu libogo, ndzilani gwatshavbo mu gimbidego, kala mu ta vboha wulanga wowu.
32 # Wona gambe: Hebh 3:19. Aholu ambari khu guralo, kha mwa khodwa gilo ga Pfhumu Nungungulu wanu, 33a thangidego mbeli gwanu ndzilani gwatshavbo, gasi gu mu vbwetela wulanga mu yelago gu ghova avbo; vbawutshigutunu, a di mu thangela khu nilo, gasi gu mi yeyedza ndzila mu yelago gu gimbila khiyo, aholu vbamihanitunu a di mi thangela khu lipfhi.
Tsayiso wa Nungungulu
(Mitengo 14:20-35)
34Avbo Pfhumu Nungungulu, a nga pwago magana yanu, a di goroga, a sambanya, khuye: 35#Wona gambe: Hebh 3:18. Khu lisine, ni moyo nya vathu vava nya gitugulwana nya guvivbedwe khu monyo kha va na wona litigo nya ladi nyi sambanyidego gu li ningela ga vababe vanu, 36vbavbandze ga Kalebi, mwamana wa Jefoni; uye a na li wona, litigo a li gandridego khu ngondro waye, nyi na mu ninga uye gumogo ni sanana saye, kholu uye simamide gu landrisa Pfhumu Nungungulu.
37Khu kotani yanu, Pfhumu Nungungulu a gorogede gambe ni eni, khuye: Uwe nuwe khu na gubela. 38Josuwa, mwamana Nuni, a guromo mbeli gwago, uye a na gu bela; mu tiyisedze, kholu uye khuye a na gu gira gu va na Israyeli va li hakha li khala thomba yawe. 39Sanana sanu, mu nga khenu si na khala pfimba wa valala vanu; sanana sanu si si kodzigo gu hambanisa iso nya sadi niso nyamba sadi, iso si na gu bela. Khiso nyi na si ningago litigo leli, si li fumela.
40Gasi enu, bwelelani nyaluphye muya giwulani mu belani khu ndzila yi thononago Yiphwa nya Gufuvile.
Gupadwa ga va na Israyeli
(Mitengo 14:39-45)
41Khu gikhati gyogyo, enu mu di nyi hakhani, khenu: Hi ghohede Pfhumu Nungungulu wathu, aholu olu, hi dzi emisede guya dwana, kha nga idzo a hi leletedego khidzo. Moyo ni moyo nya enu a di phara litshari laye a tutumela gu hongola musigomoni.
42Aholu Pfhumu Nungungulu a di nyi embela, khuye: “Va embele gukhuwe va nga hongoli, ambari guya dwana nyimbi va nga padwa, kholu eni nyi mwalo vbafuvbi gwawe.”
43Eni Mosi nyi mi embedeni, aholu enu kha mwa dzina gu nyi yingisa, mu kanyisa sileletelo sa Pfhumu Nungungulu, mu gwela na mu tiyide mu thonona musigomoni. 44Aholu, Vaamori va nga bani va vbanya umomo va di duga va mi khinga; va mi lundra kha nga dzimifi gukhugela khu Seyiri kala Horima va mi palani. 45Avbo mu nga wuyago mu di ta thela ketso mbeli ga Pfhumu Nungungulu, aholu uye kha hakha gilo ketso yanu ambari gu mi yingisa. 46Khidzo kharato, nyi khadego gikhati nya gingi ngudzu tigoni gwa Kadesi.
Currently Selected:
Dhewuteronome 1: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
