Dhewuteronome 2
2
Gulegalega ni giwula
(Mit 14:29-30; 20:14-21)
1 # Wona gambe: Mit 21:4. Khavbo avbo, hi di thendregedza, hi bwelela nyaluphye hi hongola giwulani khu ndzila yi thononago Yiphwa nya Gufuvile, kha nga idzo Pfhumu Nungungulu a nga hi rumago khidzo, hi khade gikhati nya gingi bambe nya gigomo gya Seyiri.
2Khavbo avbo, Pfhumu Nungungulu a di nyi embela, khuye: 3Kha nga mi khadego gikhati gingi na mu randrede gigomo gegi; olu thendregedzani mu khedza Wuronga. 4#Wona gambe: Gen 36:8. Leletela vathu, khuwe: Vbindrani khu mivbinganoni ga vandriyanu, sanana sa Esawu, va khalago gigomoni gya Seyiri; avo va na khala hwanga khu enu, khu guralo dzi woneleni gwadi. 5Mu nga va dwanisini, kholu kha nyi na mi ninga litigo lawe ambari nari gipimo nya ngondro basi; kholu Esawu nyi mu ningide kha nga thomba yaye gigomo gya Seyiri. 6Guhodza mu na hodzago, rengani khu dzitsapawu avbo gwawe, ni mati gambe mu na selago ma rengeni nayo khu dzitsapawu.
7Kholu Pfhumu Nungungulu wago, a gu kategiside ga thumo watshavbo nya mandza yago; Uye a ngu dziti nya gukhuye u ngu legalega giwulani momu nya gikhongolo; Pfhumu Nungungulu wago, a diri ni uwe ndrani nya myaga yatshavbo yoyo nya magumana; gimwalo ni gimwegyo gi gu kiyeledego.
8Khavbo avbo, hi di tsemakanya litigo la vandriyathu va na Esawu, hi bela khu ndzila ya Elati ni Eziyoni-Gebheri hi thendregedza hi thonona giwula gya Mowabhi.
9 # Wona gambe: Gen 19:37. Khavbo avbo, Pfhumu Nungungulu a di nyi embela, khuye: U nga khuti va na Mowabhi, a gu situgulwana sa Loti ambari gu va dwanisa, kholu kheni nyi va ningidego gipandre gegi gya Ari gambe kha nyi na gu ninga ni gipandryana gimwegyo nya litigo lawe.
10Khu gale ga matshigu gu di gu vbanya tigoni ga Ari va na Emi, vathu nya tshivba ni wungi wawe, na vari ni giemo nya gulaphe kha nga situgulwana sa gidandrangulu Anaki. 11Avo va di tidwa kha nga va na Refayini, aholu avo va diri situgulwana sa Anaki; va na Mowabhi va di gu va rana khavo va na Emi. 12Gigomoni gya Seyiri, khu gale va di gu vbanya mule Vahori, aholu va dita tutumiswa khu sanana sa Esawu si nga va mbembisago si khala avo wulangani gwawe, kha nga idzo a nga girago Israyeli ga litigo Pfhumu Nungungulu a va ningidego li khala thomba yawe.
13Olu, khugani, tshatugani gitsongwana gya Zeredhi; khu guralo, hi di tshatuga gitsongwana gya Zeredhi.
14 # Wona gambe: Mit 14:28-35. Gikhati hi vbedzidego na hi gu gimbila, gukhugela Kadhesi-Bharineya kala hi tshatuga gitsongwana gya Zeredhi, gu di vbindra magumararu na livbandre na miraru myaga, kala va vbela khu gufa vatshavbo vama vale nya gudwane nyimbi vbakari nya lizumbo, kha nga edzi Pfhumu Nungungulu a va sambanyedego khidzo. 15Gyandza gya Pfhumu Nungungulu gi di romo vbatshani gwawe, kala va mbembiswa vatshavbo vbakari nya lizumbo.
Gutsemakanya Ari ni Arinoni
16Khu guralo, na ma mbembisidwe masotshwa yatshavbo vbakari nya lizumbo, 17Pfhumu Nungungulu a di ganela, a nyi embela, khuye: 18Muhuno, u na tsemakanya Ari, khu mivbinganoni ga Mowabhi, 19#Wona gambe: Gen 19:38. u gu vboha mbeli ga sanana sa Amoni; u nga va dwanisi gambe u nga va khuti, kholu litigo la sanana sa Amoni kha nyi na gu ninga li khala thomba yago, kholu nyi li ningede ga sanana sa Loti kha nga thomba yawe.
20Gambe, litigo leli la gu tidwa kha nga litigo la va na Refayimi; khu matshigu ya gale, va di gu vbanya umo va na Refayimi, Vaamoni va di gu va rana gukhavo Vazamuzini, 21vathu nya gutale nya sidandrangulu kha nga Vaanaki; Pfhumu Nungungulu a di va mbembisa mbeli ga va na Amoni; avo, va di va tutumisa, va khala avo wulangani gwawe; 22a di gira kharati kha nga idzo a nga girago ga sanana sa Esawu si nga bani si vbanya tigoni ga Seyiri, a nga mbembisago Vahori mbeli gwawe na si va tutumiside, si di khala iso wulangani gwawe kala na muhuno; 23Vakafitori navo, va nga dugago khu tigoni ga Kafitori va di mbembisa Vahavhi, va nga bani va vbanya sidhoropanani nya guye kala Gaza, va khala avo wulangani gwawe.#2:23 Vakafitori khidzosaye ni gupwani Vahavhi ni Vakereti.
Guwandrwa nya mayigo ya khisikheyi nya tsongo wa Joridhani
(Mitengo 21:16-35)
24“Khugani, gimbilani mu tshatuga gitsongwana gya Arinoni, wonani nyi ningede mandzani gwanu Seyoni, Muamori, mufumeli wa Hesibhoni, ni litigo laye, dwanani naye mu mu wandrela litigo. 25Muhuno, nyi na phela gu thela likhulo ni hwanga khu uwe ga vathu va vbanyago mafuni; avo va na pwago ndruma yago va na ndrendremela ni gu thava mbeli gwago.
Israyeli a ngu pala Seyoni
(Mitengo 21:21-30)
26Khu guralo, nyi rumede myango gukhugela giwulani gya Kedhemoti ga Seyoni, mufumeli wa Hesibhoni, ni magana nya gurule yi ya, khiyo: 27Nyi digeni nyi tsemakanya khu tigoni gwanu; nyi na bela khu ndzila basi; kha nyi na ndreya nyamudye ambari nyambade. 28Guhodza nyi na hodzago u na nyi rengisela khu dzitsapawu ni mati nyi na selago u na nyi rengisela nayo khu dzitsapawu; nyi dige basi nyi tsemakanya khu migondro, 29kha nga edzi va nyi giredego sanana sa Esawu, si vbanyago tigoni ga Seyiri, gumogo ni va na Mowabhi, va vbanyago tigoni ga Ari; kala nyi tshatuga tsongo wa Joridhani, hi hongola ga litigo Pfhumu Nungungulu wathu a hi ningago. 30Aholu Seyoni, mufumeli wa Hesibhoni, kha hi diga hi vbindra khu tigoni gwaye, kholu Pfhumu Nungungulu wanu, a di bangisa hefemulo wawe, a bangisa myonyo yawe, gasi a kodza gu mu ningela mandzani gwanu, kha nga si wonegago kala na muhuno.
31Khu guralo, Pfhumu Nungungulu a di nyi embela, khuye: Wona, nyi phede gu gu ninga Seyoni gumogo ni litigo laye; mu dwanise u mu pala gasi u fumela litigo laye.
32Khavbo avbo, Seyoni a di duga a hi khinga gumogo ni vathu vaye vatshavbo, gasi guta hi dwanisa tigoni ga Jasa. 33Khu guralo, Pfhumu Nungungulu wathu, a mu ningede mandzani gwathu, hi mu pade, ni sanana saye gumogo ni vathu vaye vatshavbo. 34Khu gikhati gyogyo, hi di wandra madhoropa yaye, ga lidhoropa ni lidhoropa hi di li pfhungumula gumogo ni vathu vaye, vanyamayi ni sanana; nyamba tshiya ni moyo a vbanya. 35Hi di dzega basi sifuyo si khala sathu ni gu phanga madhoropa hi nga bani hi ma wandride. 36Gukhugela Aroweri, li guromo bambe nya kova wa Arinoni, gumogo ni lidhoropa li guromo umo, kala Gileyadhi, li diri mwalo ni limwedo lidhoropa li nga vbulugago mandzani gwathu; satshavbo sesi khu Pfhumu Nungungulu wathu, a hi ningidego. 37Vbavbandze basi ga litigo la sanana sa Amoni, kha mwa bela umo; ambari wubambe watshavbo nya gitsongwana gya Jabhoki, mwendro ga madhoropa ma guromo mayigoni nya sigomo, ambari ni wulanga nya gukari owu a hi himbedzedego Pfhumu Nungungulu wathu.
Currently Selected:
Dhewuteronome 2: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.
