Bharuki 6
6
Lidangalila la Jeremiya#6:0 Libhuku leli li ranwago gupwani Lidangalila la Jeremiya, li na ni livbandre na mavili magumi dzindrima ni dzimbili (72). La gu ganela ngudzungudzu khu silo sivili, a gu esi: Guninga tshamuselo nya wukhodwa ga mhango nya guvbagedwe va yiswa wugumbini ga Bhabhiloni, ni gulaya va na Israyeli gumba khozela vanungungulu nya malipha va khozedwago dhoropani mule va na ya manegago umo kha nga dzikhumbi. ga ava va vbagedwego
Eli khu lidangalila li nga rumedwago khu Jeremiya ga vale va nga bani va gu dongisedwa gu vbagedwa va yiswa Bhabhiloni kha nga dzikhumbi, khu guruma ga Nabhukodhonosori, mufumeli wa Bhabhiloni. Li lovidwe gasi gu va embela esi Nungungulu a mu rumidego
1Khu kotani nya sighoho mu giridego, mu wugela Nungungulu,
mu na vbagedwani mu gu yiswa Bhabhiloni,
mu ya girwa dzikhumbi khu Nabhukodhonosori, mufumeli wa Bhabhiloni. 2Gikhati mu na vbohago Bhabhiloni, mu na ya pindruga iyoyo myaga nya gulaphe,
gikhati nya gingi kala ga melana nya livbandre na mivili.
Hwane nya ugo, nyi na mi gira mu wuya mugurulani. 3Gikhati gyatshavbo gyogyo mu na ya pindrugago Bhabhiloni, mu na wona,
na va rwadwe magatani, vanungungulu nya parata, nya ndralama ni simbo,
va thelago hwanga mahedheni.
4Dzi woneleni, mu nga yedzedzeli vathu vovo nya valombo,
gasi mu si modwi khu hwanga nya vanungungulu vovo. 5Avbo mu na wonago talo nya vathu na va gu gamana vbafuvbi ni vanungungulu vovo gasi gu va khozela,
ganelani khu monyoni gwanu, khenu: “Khuwe basi, Pfhumu, hi yelago gu gu khozela.”#6:0 Gukhugela ndrima yeyi nya livbandre kala mahegiso nya libhuku, mulovi a gu vbweta gu hi yeyedza gukhuye vanungungulu nya malipha khandri gilo, ni wukhozeli wu giredwago avo, wupumbu. Wona gambe: Gut 13:10-19 6Khu lisine, girumwa gyangu gyomo vbakari gwanu,
gambe khigyo gi na vhikelago guvbanya gwanu.
7Lidimi la vanungungulu vovo li di vatwa khu mandza ya mukhandri.
Aholu, avo, ambari sawe va gu va ndralama ni parata, khya malipha, kha va kodzi gu ganela. 8Kha nga idzo gu girwago ga gyagadzyana gi mburisedwago khu dziphera,
va gu dzega ndralama, va gira khiyo hari gasi gu yi vega hungoni ga vanungungulu vawe. 9Gu manega gu vaphasi nya mhamba va ba ndralama ni parata,
va yi thumisa siloni gwawe, kala va gu vboha avbo nya gu yi ningele ga vanyamayi nya maphuphulu.#6:0 Ga mayigo nya mahedheni va di romo vanyamayi va musinyumbanani nya miphaso ya vanungungulu nya malipha va ningago livelego mwendro nya guvelegise sifuyo. Va di gukhodwa gukhavo mwama a guya lala nyumbani mule nya miphaso ni nyamayi wa umomo, a na dandrisa livelego tigoni. Gu gira gukhwatshi khavo va thudwago gupwani “vanyamayi nya maphuphulu.” 10Va gu mburisela khu guambala nya wufumu vanungungulu vovo nya parata ni ndralama mwendro nya simbo, gukhwatshi vathu. 11Ambari va gu va ambagisela myendra nya giwunguwungu,
kha va vbulugi gu hodzwa khu pfhurelo mwendro khu muhwa.
Va gu va bavbulela khovbeni gasi gu phuphutha kudzudzwane wu thegago vbatshani gwawe nyumbani nya miphaso. 12Oyu nungungulu a na ni ndronga mandzani gukhwatshi
mwamangulu nya gipandre nya litigo, aholu kha dzi kodzi gu tsayisa wule a mu wugelago. 13Pharide mandzani ngala ni litshari, aholu kha dzi kodzi gu dzi vhikela ga valala mwendro ga dzimbafa. 14Khu satshavbo sesi, gu ngu dzi wonegisa gwadi gupwani khandri vanungungulu. Khu guralo kha mu yeli gu va thava.
15Kha nga khali ya gu pandrega yi gu mwalo gambe thumo,
khidzo gambe ni vanungungulu vovo, va vegidwego mudzinyumbani gwawe nya miphaso. 16Maho yawe ma tade khu kudzudzwane wu wuswago khu migondro ya avo vatago vata mu wona. 17Kha nga ulo ma khothwago malimba nya lipaso ga muthu a lamuledwego gu songwa khu kotani nya gughohele mufumeli,
kharato nugo, vaphasi nya mhamba va gu sega dzinyumba nya miphaso khu migonyo ni sikwinyaro nya dzisimbi,
gasi gu himbedzela dzimbafa guta ba vanungungulu. 18Va gu khondrisela dzikandriya nya dzingi ngudzu ga vanungungulu vovo,
guvbindra edzi va dzi khondriselago avo vamune, ambari sawe vanungungulu va si dzi kodzigo gu wona mweyo basi. 19Va gu gira kha nga madingo nya nyumba yawe nya miphaso,
khu ndrani gakone ma hodzidwego khu muhwa. Gupwani siwungu si dugago khu mafuni sa gu lita si ya hodza guambala gwawe, avo nyamba sipwa. 20Khovbe yawe ya gu sivbala khu wutshi wu gwelago khu nyumbani nya miphaso. 21Milini ni hungoni gwawe gu vbuvbela makoha, dzindrewulewu ni simbe sinyoni, ni siwonga gambe sa gu ndragela umo. 22Khu satshavbo sesi, mu ngu dzi kodza gu wona gukhenu khandri vanungungulu.
Khavbo avbo, kha mu yeli gu va thava.
23Ndralama va namegedwego, yi va mburiselago,
ya gu khedziga basi ya gu mana muthu nya gu yi guhe.
Avo vamune gima kha vapwa gilo, gikhati va nga bani va nyiviligiswa. 24Va rengidwe khu tengo nya wungi ngudzu,
gambe va mwalo liphuvbo nya womi ndrani gwawe. 25Kha nga va gu mwalo mawundru, va gu vbagarwa magatani,
va wonegisa kharati givalo gyawe, va gu thela dzitshoni vale va va khozelago. 26Va gu thega vbavbatshi, kha va kodzi gu dzi wusa vabune;
muthu a gu va emisa khu mawundru, kha va kodzi gu gimbila;
va gu noga, kha va kodzi gu ololoka, gambe va gu hakha miningelo va bikedwago, kha nga sirumbi nya vathu va fudego. 27Aholu, vaphasi nya mhamba va gu rengisela dzinyama nya miningelo gasi gu dzi phasa avo vamune, vagadzi vawe va gu gira makakuwa, va hengedzela, aholu kha va ningi gilo ga sisiwana. 28Ambari ni vanyamayi va wonago migima mwendro va ngari gu velegago, va ngu phara miphaso yeyi.
Kha nga mu dzitigo nya gukhenu khandri vanungungulu, mu nga va thavi. 29Gu va rana kharini gukhethu vanungungulu? Vanyamayi va ngu dusela vanungungulu vovo miningelo nya parata, ndralama ni misimbo! 30Vaphasi nya mhamba va gu gimbilagimbila dzinyumbani nya miphaso na va ambade dzingandzu nya guhagale, na va vbaludwe hungoni ni giledzu! 31Va gu rana va kwangula mbeli ga vanungungulu vawe gukhwatshi tshangano nya gililo.
32Vaphasi nya mhamba va gu tshulela dzingandzu vanungungulu vawe gasi gu ambagisa vanyamayi ni sanana sawe. 33Muthu a gu va girela nya sadi mwendro guvivba, avo kha va dzi kodzi gu mu bweledzela.
Kha va dzi kodzi gu hatha ambari gu dusa vafumeli. 34Gambe kha va dzi kodzi gu ninga dzisagwati nya wuzundzo,
ambari khu gikwangwangwa nya nyalidede guvbindra satshavbo.
Muthu a gumba landrisa sisambanyo a giridego gwawe, avo ni guphodza kha va kodzi. 35Kha va vbulugisi muthu lufu, gambe kha va vhikeli muthu nya ndrendre mandzani ga oyu nya tshivba. 36Va mwalo tshivba nya gutule maho sikhumu, mwendro nya guvbulugise muthu mhangoni. 37Kha va pweli wusiwana noni, gambe kha va gireli nya sadi khulungu. 38Vomo kha nga siwindri sa mugigomoni vanungungulu vava nya misimbo nya gubhamwe khu ndralama mwendro khu parata. Vale va va khozelago, va na hegisa khu gu thedwa dzitshoni. 39Va ngu dzi kodza kharini gukhodwa mwendro gu ganela khavo vanungungulu?
40Avo vamune Vakalidhiya va ngu va hembulula. Gikhati va mu bikelago muthu nya gidudu, a si kodzigo gu ganela, va gu mu yisa ga Bheli,#6:40 Bheli (Bel) lina la nungungulu nya khongolo wa Bhabhiloni, khu gale a nga bani a ranwa pwani Mardhuki. Wona: Isa 46:1-2; Jer 50:2; Dhan 14:1-22 va mu lomba gukhavo a mu ninge guganela, nga khwatsi uye a gupwa. 41Ambari va sitigo satshavbo sesi, kha va dzi kodzi gumba gira kharato, kholu va mwalo mapimo. 42Vanyamayi va hungidego dzingodzi giwununi va guya khala bambe nya dzindzila, va vbisedzela muru.#6:42 Avba gu thudwa vanyamayi nya sibhayi va mudzinyumbani nya miphaso va nga bani va gu thumiswa ngudzu khu wukhodwa nya tumbunugo wa Khugadambo, ngudzungudzu Bhabhiloni, va di tidwa khu gu hunga ngodzi giwununi, khu vbatshani nya dzingandzu dzawe. Gihena gegi nya wuhedheni gi ngu kawukwa ngudzu umo nya Milowo nya Guage. Wona: 1 Dzipf 14:24; Ezk 6:8-10; 16:2; Hos 1:2-9, 4:13. 43Gikhati moyo wawe a dzegwago khu muvbindri nya ndzila aya lala naye, a gu tsorodzela mungana waye kholu a ngamba mana wuzundzo wa wumowo, ni olu va ngamba piledwa ngodzi yaye. 44Malipha satshavbo esi va girago ni vanungungulu vovo. Va ngu dzi kodza kharini kharato, gu khodwa mwendro gu ganela gukhavo vanungungulu? 45Va di wumbwa khu mandza ya vakhandri ni vapfhuli nya ndralama, kha va dzi kodzi gu khala gimbe gilo vbavbandze nya gukhale kha nga idzo vakhandri vawe va vbwetago khidzo. 46Vale va va girago kha vavbanyi kala va gumba, gu kodzega kharini gu khala vanungungulu sigiro nya mandza yawe? 47Kha va na nga tshiyela gimbe gilo situgulwana, vbavbandze nya wukanganyisi ni dzitshoni basi. 48Dza gu vboha dzinyimbi mwendro mitungu nya gukari, vaphasi nya mhamba va gu ganedzisana khu gu vbweta mano ni wulanga nya guthavele avbo, va ya sihala ni vanungungulu vawe. 49Gu ngu kodzega kharini, kharato, gukhodwa gukhuwe vanungungulu vale va si kodzigo gu dzi vbulugisa ga nyimbi mwendro ni dzimbe dzimhango? 50Khu hwane nya matshigu gu nata tugudwa gupwani vanungungulu nya malipha nya gugirwe khu simbo nya gulondrwe khu ndralama mwendro parata, wukanganyisi basi. Gambe mahoni ga vathu nya mayigo yatshavbo ni ya vafumeli gu na wonega safani gupwani khandri vanungungulu, aholu sigiro nya mandza nya vathu, ni gupwani gumwalo gilo nya wunungungulu gwawe. 51Khu mani a si wonigo gwadi gukhuye avo khandri vanungungulu? 52Avo kha va dzi kodzi gu pharisa ndronga muthu, va mu khadzisa vbagikhalotunu nya gufumele litigo nya gukari, mwendro gu ninga ndzadzi vathu. 53Kha va dzi kodzi gu lamula mahungu yawe vabune ambari gu dzi phodzela va gu hosedwa, kholu va mwalo tshivba mwendro lipindru, gu fanana ni vanyamahigonganye va vbuvbago ndrengelengeni, vbakari ni vbakari nya ndzadzi ni mafu. 54Gwa gu vbiswa luvbya nyumbani nya miphaso ya vanungungulu vovo nya simbo nya gulondrwe khu ndralama mwendro parata, vaphasi vawe nya mhamba va gu zama gu thava, va dwanela gu vbanyisa womi wawe, aholu, vanungungulu va guvbya va tsagamiswa khu nilo gumogo ni madingo ni minaneko nya nyumba. 55Kha va na nga tiyela gu dwana ni mufumeli mwendro ni valala. 56Gu ngu kodzega kharini gu dzumela ambari gu pimisa basi gukhuwe vanungungulu? 57Vanungungulu vava nya simbo, nya gulondrwe khu parata mwendro khu ndralama, kha va dzi kodzi gu dzi vhikela ga dzimbafa mwendro ga sighevenga. Dzimbafa ni sighevenga dzi na ni tshivba gu va vbindra, dza gu va dzegela ndralama ni parata ni guambala va fenengedzedwego, dzi duga dzi hongola, aholu vanungungulu vovo nyamba tshunguhedza, kha va dzi vhikeli vabune. 58Mufumeli womo wulangani nya wutshukwana ngudzu guvbindra vanungungulu nya malipha, kholu a ngu dzi kodza gu thumisa tshivba yaye; gambe i tshukwana ngudzu gu khala gyombo gya nyumbani, gi thumiswago khu mune wakone; mwendro gu khala lidimba nya nyumba, li vhikelago esi si guromo ndrani; mwendro gu khala simbo nya lidingo nyumbani ga mufumeli, guvbindra gu khala nungungulu nya malipha.
Vanungungulu nya malipha vomo vbavbatshi nya dzinyeledzi
59Lidambo, Ngima ni Dzinyeledzi si ngu wenengedza, si tadzisa kharato tumbunugo wawe nya guthumele. 60Ni libara nilo, li mburago gikhati gu lasago, phuvbo yi furugedzago ga sipandre satshavbo nya litigo; 61ni mapfhi ma rumwago khu Nungungulu gu enedza litigo latshavbo, ma gu tadzisa thumo ma ningidwego. 62Gikhati nilo wu rumedwago guta vbisa magabi ya musigomoni, wa gu gira thumo wu rumidwego. Vanungungulu nya malipha kha va dzi kodzi gu pimaniswa khu wumburi mwendro khu tshivba ni gimwegyo basi nya sivangwa soso. 63Egi khu gighelo gi girago gu si yeli gu khodwa ambari gu ganela gukhethu vanungungulu, kholu kha va kodzi gulamula mwendro gu ninga giphaso vathu. 64Khu kharato, khu gu dzitini gukhenu khandri vanungungulu, mu nga va thavi. 65Vanungungulu nya malipha kha va dzi kodzi gu kategisa mwendro gu vala vafumeli. 66Kha va kodzi gu yeyedza mayigo siwoniso sa ndzadzini; kha va ngangameli kha nga Lidambo, gambe kha va wenengedzi kha nga Ngima. 67Ni sirengo sa khabini si na ni lisima ngudzu gu va vbindra, kholu si ngu dzi kodza gu dzi vbanyisa khu gututumela wusihaloni gwawe. 68Khu guralo, gimwalo gilo gi wonegisago gupwani vanungungulu. Khavbo avbo, mu nga va thavi. 69Kha nga githombe gi vegidwego vbakari nya lithembwe gi si ghadhigo gilo, kharato navo vanungungulu vovo nya misimbo nya gulondrwe khu ndralama mwendro parata. 70Vanungungulu vovo nya misimbo nya gulondrwe khu ndralama mwendro parata va ngu fanana ni simbo nya miba thembweni, wu ta mbakedwago khu sinyoni satshavbo, mwendro ni girumbi gi rinyidwego wulangani nya gidema. 71Khu mwendra nya giwunguwungu wu hagalago vbatshani gwawe, mu na dzitini gukhenu khandri vanungungulu. Avo va na hegisa khu gu pfuguruledwa, va khala gihegiso nya litigo. 72I tshukwana makhalelo nya muthu nya wuzundzo a gu mwalo vanungungulu nya malipha, kholu gikhati gyatshavbo a na vbuluga gu khala gihegiso.
Currently Selected:
Bharuki 6: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.