Bharuki 4
4
1Guti khilo libhuku nya sirumo nya Nayo wa Nungungulu
ni nayo wu guromo kala gupindruga.
Vatshavbo vale va gu landrisago va na mana guvbanya,
ni vale va gu digago, va nafa.
2Uwe, Jakobe, bwelela hwane, u ya gumbarela guti;
gimbila gungangamelani nya wenengedzo waye.
3U nga dzegi wuzundzo wago u ningela ga vambe vathu,
ambari gu ningela lisima lago ga vathu nya valombo.
4Uwe Israyeli! Hi kategide ethu,
kholu hi nguti esi si tsakisago Nungungulu!
Gitangadziso gya Jerusalema
5Tiyani longo, enu vathu vangu,
mu ranwago khu lina la Israyeli!
6Mu rengisidwe ga mayigo,
aholu khandri mu di rengisedwa gu ya mbembiswa.
Kholu mu nga wusago likhulo la Nungungulu,
mu ningedwe ga valala.
7Mu goroside muvangi wanu,
khu gu ningelani miphaso ga maphuvbo nya mandriki, mu diga Nungungulu.
8Mu divade muvangi wanu, Nungungulu nya gupindruge,
gambe mu wusede wusiwana Jerusalema, mumamisi wanu.
9Gikhati a wonidego likhulo la Nungungulu na li gu thega kha nga nyangafula vbatshani gwanu, a di ganela, khuye:
“Upwani, enu mayigo nya vaakelane va Siyoni!
Nungungulu a nyi rumede tshanisa nya yikhongolo.
10Nyi wonide guvbagedwa ga sanana sangu nya sikhwathana niso nya sagadzyana,
gu rumedwego khu Nungungulu nya gupindruge.
11Eni nyi va vangide na nyi tsakide,
nyi va vbanganide khu marongo ni gililo.
12Gu nga manegi ni moyo nya gunengele
khu kotani nya olu nyi gu noni ni olu nyi digidwego nyokha nyambana mutangadzisi!
Mwa gu nyi wona nyi khala giwula, kotani nya sighoho sa sanana sangu,
kholu si hambanide ni nayo wa Nungungulu,
13va yeyiside milayo yaye,
va hambanide ni dzindzila nya Nayo wa Nungungulu,
kha va gimbila khu sindzilana nya gihevbudzo
gukhedza khu gululama gwaye.
14Deluni, enu mayigo nya vaakelane va Siyoni!
Dundrugani wugumbi wa sanana sangu nya sikhwathana ni esi nya sagadzyana,
va rumedwego khu Nungungulu nya gupindruge.
15A va rumede vathu nya valombo nya gute khu hwindzo ngudzu,
vathu nya gikanya, nya guganele limbe lidimi nyamba handzega,
nyambana githawo ni madhota,
nyambana gisiro khu gyanana.
16Va wandrede noni sanana saye nya sikhwathana,
va yi diga yekha, nyambana sanana saye nya sagadzyana!”
17Ginani nyi na girago gasi gu phasa enu, vanavangu?
18Wule a mi resedego guvivba gogu, khuye basi a dzi kodzago gu mi vbulugisa mandzani ga valala vanu.
19Indrani, vanavangu, gimbilani ndzila yanu,
eni nyi na simama gu khala giwundzani.
20Nyi tshude guambala gwangu nya matshigu nya gurule,
nyi ambala silendra nya vale va lilago.
Nyi na lombelela ga Nungungulu nya gupindruge matshigu yatshavbo nya guvbanye gwangu.
21Vanavangu! Tiyani longo, lilani nenu ga Pfhumu Nungungulu,
gasi Uye a mi vbanyise ni gu mi vbulugisa mandzani ga valala vanu!
22Nyi ngu tumba ni gu lindrela gukheni Nungungulu nya gupindruge, a nata mi vbanyisa;
gutsaka gu na nyi tela khu ga Uye a Agidego,
kholu nyamba hwela,
Nungungulu nya gupindruge, Muvbanyisi wanu,
a na mi girelani wuhindzi. 23Nyi mi wone na mu gu khuga vbakari nya marongo ni gudilela;
khu guralo, Nungungulu, a na mi wuyisani gwangu,
khu gunengela ni litsako nyamba vbela.
24Kholu, kha nga mayigo nya vaakelane va Siyoni ma wonidego guvbagedwa gwanu,
kharati gambe va na wona nyamba hwela Nungungulu na gu mi ninga gutshulega,
na gu landredwa khu wudhumo ni gungangamela ga Nungungulu nya gupindruge.
25Vanavangu, rwalani khu gutimisela
tsayiso nya likhulo la Nungungulu.
Mu lundridwe khu valala vanu;
mu na wona, nyamba hwela, gumbemba gwawe,
mu na gandra migondro yanu vbamakositunu gwawe.
26Sanana sangu nya wurendra, si gurumedzidwe gu gimbila khu ndzila nya gugaradze,
na si gu dzegwa khu valala kha nga tshambi wu bidwago.
27Vanavangu, tiyani longo, lilani ga Nungungulu,
kholu Uye a nga mi lingani, a na mi alakanya.
28Kha nga mu nga dzinani gu hambana ni Nungungulu;
olu mu vbweteni, khu guvbisega gu wuyelelago likhumi dzinyondro;
29kholu wule a mi resedego tsayiso,
a na mi resela gambe, gutsaka nyamba vbela nya guvbanyiswe gwanu.#4:29 Avba hi ngu mana gihevbudzo nya gupwani Nungungulu khuye a tshisago vbavbatshi, khuye gambe a khusedzago, a gu tshisa vbavbatshi sighohi, va nya matshandza ni guvivbedwa khu monyo, a gu khusedza va nya gusolega, vale va dzi vegago vbavbatshi, va khodwago ni gu ninga githawo Nungungulu, vale va agidego monyoni, va landrisago milayo ya Pfhumu Nungungulu. Wona gambe: Dhet 32:39; 2 Mak 7; Gut 3:5; Isa 26:19.
30Jerusalema, tiya longo!
Wule a gu ningidego lina, a na gu tangadzisa.
31Va vadwe vale va gu tshanisidego,
va tsakidego khu gu pfhungumudwa gwago! 32Ma na vadwe madhoropa yale sanana sago si nga vbagedwago si ya khala iyo kha nga dzikhumbi!
Li na vadwe ilo li va modego li va gira sibotshwa!
33Kholu, kha nga ulo ilo li nga nengela khu gukhungumudwa gwago,
li ghiya khu gu padwa gwago,
kharato nugo, li na swihala li gu lila khu gumbembiswa gwaye.
34Nyi na vbedza matshandza yaye nya lidhoropa nya vathu nya vangi ngudzu, ni gu dzi gugumugisa gwaye gu na vbindrugedza gu khala gililo.
35Nilo nyamba vbela wu nata khu ga Nungungulu nya Gupindruge,
wu na li tsagamisa,
li na khala ndranga nya maphuvbo nya mandriki gikhati nya gulaphe.
36Uwe Jerusalema, khedzisa phuvbo ga Khugadambo;
wona gutsaka gu gu telago na guta khu ga Nungungulu.
37Wona, si ngu wuya sanana sago sile u si wonidego na si gu hongola,
sa gu wuya khu Khugadambo ni Muhwadambo,
na si gu tombaniswa khu lito la Wule a Khusegidego Ngudzu,
na si tade khu gunengela khu kotani nya wudhumo wa Nungungulu.
Currently Selected:
Bharuki 4: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.