1 Makabhewu 8
8
Pwanano ni Varoma
1Ma di vboha dzindzeveni ga Judha, mahungu nya ndruma ya Varoma, gupwani va diri ni tshivba nya yikhongolo ngudzu, va di wonegisa wuhindzi ga vale va pwananago navo, gambe va di thangana wupari ni vatshavbo vathu va nga bani na va guta gwawe,#8:1 Varoma va diri ni giolovedzo nya guphasedzele vawugeli nya mifumo ya mayigoni ma nga bani ma si gu khozi ga Roma, gasi gu vbungula tshivba yawe, va kodza gu ma gurumedza gulandra milayo ya Roma. Khigyo givangelo gi nga girago Roma a hakha gwadi Judha a mu phasa gu wugela mufumo wa Siriya. kholu khu lisine tshivba yawe yi diri yikhongolo ngudzu.
2Va di mu embeledzela khu mahungu nya dzinyimbi dzawe, ni mayunga nya makhongolo va nga girago Galiya,#8:2 mayunga ya tigoni ga Galiya, França ga muhuno, phuvbo ga Muhwadambo, mayunga yaya ma dwanidwe matshiguni ya mufumeli nya khongolo Juliyu Kesari. Vambe va gu ganela khu mayunga ya tigoni ga Galasiya, litigo la Aziya, phuvbo ga Khugadambo nya Yiphya ya Medhiterrani. va nga palago va gu li gira litigo nya valuveli. 3Va di va embela gambe ni satshavbo va giridego Varoma tigoni ga Espanya, iyo va nga wandrago mighodhi nya parata ni ndralama yi nga bani yi romo iyo, va gu dzega litigo latshavbo lile khu guti ni gutiya gwawe, 4ambari li nga bani liri hwindzo ngudzu navo. Va di mu embeledzela gambe, idzo Varoma va nga palago khidzo vafumeli, va ngatago khu mahegiso nya mafu, vata va dhumela, va gu va pala va va mbembisa, vambe va gu va gurumedza gu livba khupo nya mwaga ni mwaga. 5Filipi ni Perisewu, vafumeli va Makedhoniya ni vambe, va di wugela Varoma, aholu va di padwa navo va khoziswa. 6Antiyoko nya Khongolo, mufumeli wa Aziya, a nga dwana navo litunga, nari ni lizana ni magumavili (120) dzindzofu ni vakhileli nya dzikavalu, ni dzikareta nya nyimbi ni talo nya mabutho nya masotshwa, a di padwa nuye khu Varoma. 7Va di mu hunga na nga gu vbanya, va mu gurumedza uye ni vale va nga fumago hwane gwaye, gulivba ndruwo nya tengo nya wungi ngudzu, ni gu ningela sibotshwa, ni sipandre nya sikhongolo nya mayigo, a gu esi: 8Indiya, ni Medhiya, ni Lidhiya ni sipandrengulu sawe, esi Varoma va nga ningelago ga mufumeli Ewumene.#8:8 Ewumene II a diri mufumeli wa tigoni ga Pergamo gukhugela khu mwaga nya lizana ni livbandre na mana maguni ni livbandre na mivili (197) kala khu mwaga nya lizana ni livbandre magumi ni livbandre na miraru (158) na si gu velegwi Kristo. 9Vagereki va di hungide gikungo nya gudhumele Varoma gasi gu va vbedza; 10aholu Varoma va di si tugula, va gu rumela moyo nya muthangeli nya khongolo nya nyimbi, ata va dhumela a songa vathu nya vangi ngudzu; a vbagela vagadzi vakone ni sanana sawe, a va yisa wugumbini; a di phanga litigo latshavbo a gu li khozisa, a khungumulela makhokhola, a gu gira dzikhumbi vathu kala na muhuno. 11Khu magirelo ya mamowo, va di tshiphisa ni gu khozisa mambe mayigo yatshavbo ni sidwani ma nga dwanago navo. 12Aholu va di simama va tumbega ga dzipari dzawe ni vale va pwananago navo, va di dandrisa wufumu wawe ga mayigo ya vbafuvbi ni ya hwindzo, vathu vatshavbo va nga bani na va gupwa ndruma nya lina lawe, va di thava. 13Vale va nga golago gu va phasa gu khala vafumeli, va di gufuma, aholu vale va ngamba va gola va di va dusa vbasikhalotunu gwawe nya wufumu. Khu magirelo yoyo, va khade vathu nya tshivba ngudzu.
14Ambari ulo, mwalo na moyo wawe a nga ambalago hari nya wufumu, mwendro myendra nya siwunguwungu gasi gu dzi khusedza. 15Va vegide huwo nya madhota yi hungago mahungu vbatshani ga vatshavbo, matshigu yatshavbo, ma gu tshangana mazana mararu ni magumavili (320) madhota gasi gu hevbula mahungu nya gidzemo ni magimbidziselo nya mufumo. 16Khu mwaga ni mwaga va di ninga tshivba yatshavbo nya mufumo mandzani ga mwama moyo basi, oyu a di fumela litigo latshavbo, gambe vatshavbo va di yingela mwama yoyu wa moyo, gu di si manegi lidiwo ni wufu vbakari gwawe.
Gidzumeledzwano gya Vajudha ni Varoma
17Judha a di hatha Ewupolemo, mwamana wa Johane, gyanana gya Hakosi, ni Johane mwamana wa Eliyazari, a gu va rumela Roma gasi guya gira pwanano nya wuhengeli ni gidzumeledzwano ni Varoma, 18gasi guya lomba gukhuye va vbulugise Vajudha gutshaniswa khu Vagereki, kholu va di wona gukhavo gikungo gya Vagereki a diri egi nya gukhozise Israyeli muwugumbini.
19Hwane nya liendro nya gulaphe ni gugaradza, Ewupolemu ni Johane va di vboha Roma. Va diya bela tshanganoni nya huwo nya madhota, va gu ganela, khavo: 20“Judha, a tidwago khu lina nya gupwani Makabhewu ni vandriyaye, ni vathu vatshavbo va Israyeli, va hi rumide gasi guta hunga nanu pwanano nya gurule, ni gu mi lomba gukhethu mu hi wonani kha nga dzipari dzanu nya pwanano.”
21Magana yaya ma di tsakisa Varoma. 22Varoma va di ruma gu lovetela avbo nya sikete magana nya lidangalila leli, va ma rumela Jerusalema, gasi si ya khala gialakanyiso nya gurule ni pwanano ga Vajudha, khavo: 23“Gu na manege gurula kala gupindruga, ga Varoma ni Vajudha, mafuni ni linene, matshari ni valala ma na khalele hwindzo gwawe gikhati gyatshavbo. 24Ya gu wuswa nyimbi nya guwugele Varoma mwendro vale va hungidego pwanano navo malangani gwatshavbo nya mufumo wawe, 25Vajudha va na ema ni Varoma, va gu va phasedzela khavbo va na gu dzi kodzago khavbo, khu gutumbega gwatshavbo. 26Kha va na ninga mwendro gu rengisela valala vawe, guhodza, matshari, dzitsapawu, dzingalava gukhedza khu edzi Varoma va na gu bani va hungide khidzo; Vajudha va na vegisa sisambanyo nya pwanano yoyu nyamba hakha gilo. 27Kharato gambe, ya gu manega nyimbi nya guwugele Vajudha, Varoma va na ema gumogo navo va dwana khu tshivba yawe yatshavbo gukhedza khu idzo va na gu dzi kodzago khidzo. 28A navo kha va na ninga valala guhodza, matshari, dzitsapawu, dzingalava, gukhedza khu edzi Roma a na gu hungago khidzo; sisambanyo si na landriswa khu gutumbega gwatshavbo.” 29Khuwo owu pwanano wu hungago Varoma ni Vajudha. 30Hwane nya esi, gani khu Varoma, gani khu Vajudha, va gu vbweta gu engedzela mwendro gu vbungula gilo avbo nya pwanano yoyu, va na phela khu gu ningana mawonelo; esi si na engedzedwago mwendro gu vbungudwa, si na gurumedza vatshavbo.
31Gasi khu mahungu yatshavbo nya guvivbe ma girwago ga Vajudha khu mufumeli Dhemetriyo, olu hi mu lovede, hi mu embela khethu: Khu ginani u lemedzago khu rwalo nya wukhongolo ngudzu Vajudha a gu dzipari dzathu hi hungidego navo pwanano? 32“Va gu kala va gu thela gambe ketso, ethu hi na va lamulela, hi va dwanela khu mafuni ni matini.”
Currently Selected:
1 Makabhewu 8: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.