1 Makabhewu 9
9
Gufa ga Judha
1Avbo Dhemetriyo a nga tiviswago gupwani Nikanori fude, ni gupwani masotshwa yaye ma vbede yatshavbo khu gu songwa litungani, a di rumela gambe Bhakidhe ni Alisimo tigoni ga Judheya vaya thangela masotshwa yaye nya tshivba nya gu ma tumbe ngudzu. 2Va di bela khu ndzila yiyago Ghiligali, vaya ghova tigoni ga Aribhela, na va gu wona Mesaleti mbeli gwawe. Va di wandra lidhoropa va gu songa vama nya vangi ngudzu va tigoni. 3Khu ngima nya guphele nya mwaga nya lizana ni livbandre magumi na mivili (152), va dita randrela Jerusalema, 4aholu, khu hwane nya ugo, va di bwelela hwane va hongola Bhereya na vari ni lizana ni magumavili mazana (120.000) vama ni magumavili mazana (2.000) vakhileli nya dzikavalu. 5Judha a di bani na ghovide tigoni ga Elasa, nari ni magumararu mazana (3.000) vama nya guhathedwe. 6Gikhati va nga wonago talo nya masotshwa ya valala, va di tala khu hwanga. Nya vangi va di thava va duga lizumboni, gu tshala basi pimo nya livbandre na mararu mazana (800) vama.
7Judha, na wone gukhuye masotshwa yaye ma ngu phalalega gikhati gile nya guvbwete gu dwana litunga; a di beledwa khu rerema monyoni gwaye, kholu gu di si ningi gikhati nya gutshanganise nyaluphye masotshwa ma nga bani na ma thavide. 8Na tade khu wusiwana, a di embela avo va nga bani va tshade, khuye: “Hongoleni hi dhumele valala hi wone mwendro hi na dzi kodza gu va pala!” 9Aholu avo va di zama gu mu ganedza, khavo: “Ahihi, kha hi dzi kodzi. Hongoleni olu hi vbanyise womi wathu, hi na wuya gwadi gumogo ni vandriyathu, hita dwana litunga, kholu olu hi va dugwanana ngudzu.” 10Aholu Judha a di va hakha, khuye: “A na nyi vbulugise Nungungulu gu gira silo nya nga isoso, nyi thava mbeli gwawe, gya gu bani gi vbohide gikhati gyathu, hi nafe kha nga dzingwazi, hi fela vandriyathu, aholu hi nga nyenyezisi wuzundzo wathu.”
Gufa ni gudzingwa ga Judha
11Masotshwa ya nala ma di duga lizumboni, mata sasamedzwa mbeli ga Vajudha; vakhileli nya dzikavalu va di kabanega khu sipandre sivili; va nya matshari ni vanyawulaho va di thanga mbeli; vama vatshavbo nya tshivba va dita sasamedzwa khu mbeli. 12Bhakidhe a diri khu phuvbo ga nyamudye, gu di wombwa mipundru, dzindzarara dza mudzibambe dzi phela gu gimbila khu maphuvbo ya mavili. Masotshwa ya Judha ma di womba nayo mipundru. 13Mafu ma di kutsungwa khu tshivba nya mbetano nya matshari, li di dwanwa litunga gukhugela ni dzimindru kala ni silambo. 14Judha a di tugula gukhuye Bhakidhe ni tsawa nya vale va mu vhikelago womo khu phuvbo ga nyamudye, a di randredwa khu masotshwa yaye nya tshivba ngudzu. 15A di gunyula gipandre gya nyamudye ya valala a gi pala, a va lundra kala gigomoni gya Asidhodhi. 16Aholu avo va nyambade va di wona nya gukhavo avo va nyamudye va padwe, va di thendregedza va gu landra Judha ni masotshwa yaye khu hwane. 17Litunga li di engedzelana gudwanwa khu tshivba ni tshivba, gufa vathu nya vangi ngudzu maphuvbo ya mavili.
18Judha nuye a difa, vambe va di phalalega. 19Jonatane ni Simoni va di dzega girumbi gya ndriyawe Judha vaya dzinga thowoni ga vavelegi vaye tigoni ga Modhini. 20Israyeli watshavbo a di mu lila; va di gira gililo nya gikhongolo matshigu nya gutale, na va gu ganela, khavo: 21“Yi fude kharini ngwazi yi nga bani na yi gu vbanyisa Israyeli!”
22Eyi yimbe mithumo yatshavbo nya gusamadzise ya Judha, ni mayunga yaye, ni sigiro si wonegisago wungwazi waye kha sa lovetedwa, kholu si tade ngudzu guvbindra tengo.
III. MITHUMO YA JONATANE
(9:23—12:53)
Jonatane a ngu tshikhedza Judha
23Hwane nya gufe gwa Judha, tsawa nya vale va nga bani va danga tumbunugo wawe nya wujudha, va di dugelela gambe tigoni ga Israyeli, ni vatshavbo vale va nga bani na va gu gola gu gira guvivba, va di khusedza mihungo va dzi wonegisa. 24Ga matshigu yale, gu di manega ndzala nya yikhongolo ngudzu, litigo latshavbo li di dzi ningela ga nala. 25Bhakidhe a di hatha vama nya guvivbedwe khu monyo a va vega kha nga vathangeli. 26Avo va di dzi garadza khu gu vbweta dzipari dza Judha, vaya dzi ningela ga Bhakidhe, uye a di dzi phodzela gwawe ni gu va hembulula. 27Gu di manega tshanisa nya yikhongolo ngudzu tigoni ga Israyeli, nya gu gima yi si gu wonegi tshanisa nya nga iyoyo gukhugela va mwalalega vaprofeti vawe. 28Dzipari dza Judha dzatshavbo dzi di tshangana dzi embela Jonatane, khidzo:
29“Hwane nya gufe ndriyago Judha, kha manega mumbe nya nga uye gasi gu dwana ni valala vathu, ni Bhakidhe ni vatshavbo vale va vengago lifumbu lathu. 30Khu guralo, ethu muhuno hi ngu gu hatha gu khala uwe muthangeli ni mugimbidzisi nya dzinyimbi dzathu.” 31Jonatane a di dzumela rwalo yoyo, a gu tshikhedza wulanga wa ndriyaye Judha. 32Bhakidhe a di tiviswa mahungu yoyo, a gu vbweta mano nya gusonge Jonatane. 33Aholu Jonatane, ni ndriyaye Simoni ni vangana vawe vatshavbo va di thavela giwulani gya Tekowa,#9:33 Litigo a nga velegedwa umo Muprofeti Amosi, Marandzi gwa Khugadambo ga Bhetlehema, litigo nya giwula li relelago kala Phwani nya Gufe. Khavbo ma nga thavela avbo masotshwa ya Dhavhidhe (1 Sam 24:26). Matshiguni nya wuwugelo nya wuvili wa Vajudha (132-135) nya guwugele Varoma, vadwani nya nyimbi va Bhari Kokiba va khade wulanga wowo kha nga woghovelo wawe. vaya zumba iyo vbafuvbi ni lidhamo nya nambo wa Asifari. 34Bhakidhe a di va tugula a gu tshatuga tsongo wa Joridhani ni libutho laye latshavbo nya nyimbi, khu litshigu nya Sabhadho. 35Khavbo avbo, Jonatane a di rumela ndriyaye, muthangeli nya gidzemo, ga Vanabheti, a gu dzipari dzaye, aya va lomba gu sayisa sombo sawe a nga bani nari singi ngudzu. 36Aholu sanana sa Jambiri si nga bani si gu vbanya tigoni ga Madhaba, si di duga si gu va dhumela si hunga Johane, si wunga satshavbo a nga bani ari naso, si hongola naye.
37Hwane nya isoso, va dita embela Jonatane ni ndriyaye Simoni, khavo sanana sa Jambiri si ngu gira buzo nya wukhongolo nya dzegano, gukhugela Nadhabati, va ngu yisa gighiyane nya gikhongolo va vbwelegedza nyamahegyane, gyanana gya moyo nya linganagana nya likhongolo la Khanani. 38Va di dundruga novba wa ndriyawe Johane, va gu duga vaya mugigomoni vaya sihala. 39Va di khusa maho va gu wona talo nya vathu nya gighiyane. A diri lidzaha li nga bani na li gu duga, na li gu bangaladzwa khu dzipari dzaye nya dzingi ni vandriyaye, li gu khinga mwangadzi waye, ni dzingoma ni sombo satshavbo nya guwombe ni sitshangu nya singi.
40Khavbo avbo, vabangaladzi va Jonatane va di duga khu gu sihalani gwawe, va gu va dhumela, va di songa ni gu bayisa nya vangi, avo va nga vbulugago, va di thavela mugigomoni. Gikhati gyogyo, avo va nga palago va di kabanelana phango nya sombo sawe. 41Avbovbo, buzo nya dzegano, wu di vbindrugedza wu khala gililo, dzindzimo nya gutsake dzi di vbindrugedza dzi khala dzihuwa nya wuvi. 42Vajudha va di phodza kharato novba wa ndriyawe, va gu bwelela gambe matsongoni ga Joridhani. 43Bhakidhe na ma tide mahungu yoyo, a di hongola khu litshigu nya Sabhadho ni talo nya masotshwa yaye, kala vbafuvbi ni tsongo wa Joridhani. 44Khu guralo, Jonatane a di embela vangana vaye, khuye: “Hongoleni hi khuge hi dwanela guvbanya gwathu, kholu muhuno khandridzo saye ni mambe matshigu. 45Wonani gukhenu hi randredwe khu nala, ha gu wona litunga mbeli gwathu ni hwane gwathu, kheno womo nondrwa nya tsongo wa Joridhani, kheyi momo maraga nya ginyogovela, hi mwalo yimbe ndzila nya guvbuluge. 46Lombani ndzadzini gasi Nungungulu a hi vbulugise ga valala vathu.”
47Gu di dwanwa litunga nya tshima tshima. Jonatane a di khusa libogo gasi gu paya Bhakidhe, aholu uye a di ndreya a mu vhika. 48Khu vbale, Jonatane ni vangana vaye, va di bela nondrwani wa Joridhani va tsemakanya khu mayaka va tshatuga khisikheyi nya tsongo, aholu valala kha va nga tshatuga tsongo va va landra.
49Litshigu lolo, gu fude tanga nya likhumi mazana (1.000) vama nya masotshwa ya Bhakidhe. Uye a di bwelela Jerusalema, 50aya vbaha madhoropa nya guvhikedwe khu makhokhola tigoni ga Judheya, a gu aya: Likhokhola la Jeriko, Emawusi, Bheti-Horoni, Bheteri, Timinata, Paratoni ni Tefoni gumogo ni mabhiyo nya gulaphe vbatshani, ni malimba ni migonyo. 51A di vega umo masotshwa gasi gu dhumela Israyeli. 52A di tiyisa nayo madhoropa ya Bheti-Suri ni Gezeri ni likhokhola a nga tshiyago iyo masotshwa ni sisangala nya guhodza. 53A di mola sanana nya dzindranga nya dzikhongolo dza tigoni si khala sibotshwa saye, a ya si khothela likhokholani la Jerusalema. 54Khu mwaga nya lizana ni livbandre magumi na miraru (153), khu ngima nya wuvili, Alisimo a di rumela gukhungumula libhiyo la ndrani li vhikelago Wulanga nya Guage. Khu magirelo yoyo, a di khungumula thumo watshavbo wa vaprofeti. Va di phela gu khungumula libhiyo. 55Aholu khu gikhati gyogyo furi, Alisimo a di vetwa khu phevbo ni gitshira, yi emisa guralo mithumo yaye yatshavbo, likana laye li di ema li dumara, nyamba dzi kodza ni gu ganela lito, mwendro gu ninga sileletelo ndrangani gwaye. 56Alisimo a difa hwane nya matshigwana madugwana, na gu tshaniswa khu wuvi nya wukhongolo ngudzu.
57Avbo Bhakidhe a nga wonago nya gukhuye Alisimo fude, a di fuluga a hongola ga mufumeli, litigo la Judheya li di vbanya mugurulani gipimo nya myaga mivili.
Bhakidhe a ngu padwa khu Jonatane
58Vatshavbo vale va nga dzi pambula va di lemba, khavo: “Jonatane ni vathu vaye va gu vbanya mugurulani na va tangade, hongoleni hi londrole gikhati gegi, gasi gu rana Bhakidhe ata va mbembisa khu gumogo vbakari nya wutshigu.” 59Va di hongola vaya wonana ni Bhakidhe, va mu embela gikungo gegi. 60Uye a di dzegela gubela ndzilani ni libutho nya likhongolo nya masotshwa. Khu gisihaledza, a di rumela myango ga va na gyawe, gasi va hunge Jonatane ni vangana vaye. Aholu kha va dzi kodza gu gira gilo, kholu gikungo gyawe gi di tugudwa. 61Kha nga gitsayiso, livbandre magumi vathangeli nya vakhongolo nya nembo wowu, va di modwa va gu songwa. 62Khu gulandrela, Jonatane a di thava ni ndriyaye Simoni gumogo ni gikwata gyaye vaya Bheti-Bhasi mugiwulani. Va diya wusa marumbi va vbahedza lidhoropa va li vhikela.
63Bhakidhe a dita tiviswa mahungu yaya, a ramba vathu vaye, a embela gambe ni dzipari dzaye dza Judheya. 64A diya ghova vbafuvbi ni Bheti-Bhasi, a gu dhumela lidhoropa, a hunga lirandrelo matshigu nya gulaphe ni makina nya nyimbi, a gu dhumela likhokhola. 65Jonatane a di tshiya ndriyaye Simoni ndrani nya lidhoropa, uye a duga vbavbandze ni tsawa nya wudugwana nya vama. 66A di songa Odhomera ni vandriyaye mitshatshani gwawe, a songa gambe ni sanana sa Fasironi; tshivba yaye yi diya na yi gu engedzelana khu litunga ni litunga.
67Khu gyawe gipandre, Simoni nuye ni vangana vaye va di duga khu dhoropani, vaya vbisedzela makina nya nyimbi. 68Va di dhumela Bhakidhe va mu pala, va mu pwisa wuvi nya wukhongolo khu gu wona nya gukhuye gikungo gyaye ni thumo watshavbo kha wa mu dugela gwadi. 69Khavbo avbo, a di goroga ngudzu khu kotani nya Vajudha nyambasi vadi va nga mu kutsedzelago guta tigoni gwawe. A di ruma gukhuye va songwa nya vangi vawe, a gu bwelela tigoni gwaye. 70Jonatane na pwide mahungu yaya, a di rumela myango ga Bhakidhe, gasi guya mu embela mahungu nya pwanano nya gurule ni gu bweledza sibotshwa. 71Bhakidhe a di va hakha, a gu dzumela mawonelo yaya, a gu sambanya gukhuye gima kha na nga va girela gambe guvivba matshigu yatshavbo nya guvbanye gwaye. 72A di bweledza vale a nga va girago sibotshwa gikhati a nga dhumela Judheya, a vbedza, a gu bwelela tigoni gwaye, nyamba dzina gambe gu wuya tigoni nya Vajudha. 73Nyimbi yi di vbela tigoni ga Israyeli, Jonatane a diya vbaha dhoropani ga Makima. Khavbo avbo, a nga phela gufumela litigo ni gu vbedza vathu nya guvivbedwe khu monyo va na Israyeli.
Currently Selected:
1 Makabhewu 9: BGG2014
Highlight
Copy
Compare
Share
Want to have your highlights saved across all your devices? Sign up or sign in
Gitonga DC Bible © Bible Society in Mozambique, 2014.